Psalmyn 24 - Yn Vible Casherick 1775 1819

PSAL. XXIV

¹ Lesh y Chiarn y thalloo, as ooilley ny t’ayn: combaase y theihll, as adsyn ta baghey ayn.

² Son t’eh er hoiaghey eh er ny faarkaghyn: as er hickyraghey eh er ny thooillaghyn.

³ Quoi eh hed seose er cronk y Chiarn: ny quoi vees cooie dy hassoo ayns e ynnyd casherick?

⁴ Eshyn eh ta laueyn glen echey, as cree gyn-loght: as nagh vel er hoiaghey e aigney er foalsaght, as nagh vel er ghoaill loo dy volley e naboo.

⁵ Yiow eshyn yn bannaght veih’n Chiarn: as cairys veih Jee e haualtys.

⁶ Shoh’n sheeloghe ocsyn ta dy hirrey eh: jeusyn dy jarroo ta shirrey dt’eddin, O Yacob.

⁷ Trog-jee seose nyn ghing, O shiuish yiattyn, as bee-jee er nyn droggal seose, shiuish ghorryssyn dy bragh farraghtyn: as hig ree ny ghloyr stiagh.

⁸ Quoi ta ree ny ghloyr: yn Chiarn eh ta lajer as niartal, yn Chiarn hene niartal ayns caggey.

⁹ Trog-jee seose nyn ghing, O shiuish yiattyn, as bee-jee er nyn droggal seose, shiuish ghorryssyn dy bragh farraghtyn: as hig Ree ny ghloyr stiagh.

¹⁰ Quoi ta ree ny ghloyr: dy jarroo yn Chiarn dy heshaght-chaggee, eshyn ree ny ghloyr.