Psalmyn 22 - Yn Vible Casherick 1775 1819

PSAL. XXII

¹ My Yee, my Yee, jeeagh orrym; cre’n-fa t’ou er my hreigeil: as t’ou choud veih my lhaynt, as veih goan my accan?

² O my Yee, ta mee geam fey-ny-laa, agh cha vel oo cur clashtyn: as ayns imbagh ny hoie myrgeddin cha vel mee geddyn veg y fea.

³ As t’ou uss tannaghtyn casherick: O uss ooashley Israel.

⁴ Ren ny ayraghyn ain treishteil aynyd’s: hug ad nyn marrant ort, as ren oo ad y livrey.

⁵ Deïe ad ort’s, as hooar ad cooney: hug ad nyn marrant ort, as cha row ad er nyn goyrt mow.

⁶ Agh er my hon’s, she beishteig mee, as cha nee dooinney: eer craid gheiney, as oltooan y phobble.

⁷ Ta ooilley ny ta dy m’akin, gannidys orrym: t’ad sheeyney magh nyn meillyn, as craa nyn ghing, gra,

⁸ Hreisht eh ayns Jee, dy jinnagh eh eshyn y livrey: lhig da eh y livrey, my ta taitnys echey ayn.

⁹ Agh uss eh ren m’y ghoaill ass breïn my vayrey: v’ou my hreishteil tra va mee foast er keeagh my voir.

¹⁰ Ta mee er ve fo dty chiarail er-dyn traa ruggyr mee: uss my Yee eer veih breïn my vayrey.

¹¹ O ny treig mee, son ta seaghyn er-gerrey: as cha vel unnane dy chooney lhiam.

¹² Ta ymmodee dew er jeet mygeayrt-y-moom: ta terriu lajer Vasan er hoiaghey orrym er dagh cheu.

¹³ T’ad fosley nyn meeal orrym: myr lion jollyssagh buirroogh son spooilley.

¹⁴ Ta mee deayrtit magh myr ushtey, as ta ooilley my chraueyn ass ynnyd: ta my chree neesht ayns mean my chorp eer myr kere ta lheïe.

¹⁵ Ta my niart chyrmit seose myr peesh dy haagh-craie, as ta my hengey lhiantyn gys my ghruntyn: as ver uss lhiat mee gys joan y vaaish.

¹⁶ Son ta ymmodee moddee er jeet mygeayrt-y-moom: as ta coonceil ny olkyssee cur nyn goyrle dy cheilley m’oï.

¹⁷ Hoyll ad my laueyn as my chassyn: foddym ooilley my chraueyn y choontey: t’ad shassoo gindys as jeeaghyn orrym.

¹⁸ Rheynn ad my gharmadyn ny mast’ oc: as er my chooat hilg ad lottyn.

¹⁹ Agh ny bee uss foddey voym, O Hiarn: she uss my chemmyrk; jean siyr dy chooney lhiam.

²⁰ Livrey m’annym veih’n chliwe: as my vioys deyr veih pooar y voddey.

²¹ Saue mee veih beeal y lion: t’ou er my chlashtyn myrgeddin veih mastey eairkyn ny unicornyn.

²² Neem’s dt’ennym y hoilshaghey da my vraaraghyn: ayns mean ny hagglish nee’m uss y voylley.

²³ O moylley-jee yn Chiarn, shiuish ta goaill aggle roish: cur-jee ard-voylley da, ooilley shiuish jeh sluight Yacob, as gow-jee aggle roish, ooilley shiuish sluight Israel.

²⁴ Son cha vel eh er hoiaghey beg jeh, ny er hreigeil stayd injil y voght: cha vel eh er ollaghey e eddin veih, agh tra deïe eh er, hug eh clashtyn da.

²⁵ Hood’s nee’m chebbal my voylley ayns sheshaght vooar ny nooghyn: my vreearraghyn neem’s y chooilleeney ayns yn enish ocsyn ta goaill aggle roishyn.

²⁶ Nee ny boghtyn gee, as bee ad er nyn yannoo magh: adsyn ta shirrey lurg y Chiarn, moyllee ad eh; bee’n cree eu bio son dy bragh.

²⁷ Nee ooilley ardjyn y thallooin cooinaghtyn orroo hene, as bee ad er nyn jyndaa gys y Chiarn: as ver ooilley kynneeyn ny ashoonyn ooashley kiongoyrt rish.

²⁸ Son lesh y Chiarn yn reeriaght: as she eshyn yn Kiannoort mastey yn pobble.

²⁹ Nee nyn lheid ocsyn ooilley ta berchagh er y thalloo: gee as ooashley ’choyrt.

³⁰ Nee adsyn ooilley ta er nyn injillaghey gys y joan gliooney kiongoyrt rish: as cha vel dooinney erbee er vioghey e annym hene.

³¹ Nee my luight’s eshyn y hirveish: bee ad goit stiagh son sheeloghe da’n Chiarn.

³² Hig adsyn, as nee ny niaughyn soilshaghey magh e chairys: da pobble hig er y theihll, adsyn ta’n Chiarn er chroo.