Psalmyn 19 - Yn Vible Casherick 1775 1819

PSAL. XIX

¹ Ta ny niaughyn fockley magh gloyr Yee: as ta’n aer soilshaghey obbyr e laueyn.

² Laa lurg laa te er ny hoilshaghey: as ta oie lurg oie cur toiggal jeh.

³ Cha vel edyr goan ny glare: raad nagh vel ny coraaghyn oc er nyn glashtyn.

⁴ Ta’n sheean oc er gholl magh gys dy chooilley heer: as ny goan oc gys ny ardjyn sodjey magh jeh’n theihll.

⁵ Ayndoo t’eh er hoiaghey cabbane son y ghrian: ta cheet magh myr dooinney-poosee ass e hiamyr, as goaill boggey myr dooinney lajer dy roie e choorse.

⁶ T’eh goll magh veih’n ayrn sodjey jeh’n aer, as goaill combaase mygeayrt ny ardjyn echey reesht: as cha vel nhee erbee follit veih’n chiass echey.

⁷ Ta leigh yn Chiarn ny leigh gyn foill, niartaghey yn annym: ta recortyssyn y Chiarn shickyr, as coyrt creenaght da’n vee-hushtagh.

⁸ Ta slattyssyn y Chiarn jeeragh, as coyrt boggey da’n chree: ta sarey yn Chiarn ynrick, as coyrt soilshey da ny sooillyn.

⁹ Ta aggle y Chiarn glen, as farraghtyn son dy bragh: ta briwnyssyn y Chiarn firrinagh as cairagh ooilley dy cheilley.

¹⁰ Ny smoo t’ad dy v’er nyn yeearree na airh, dy jarroo, na mooarane airh ghlen: ny s’miljey neesht na mill, as y kere-volley.

¹¹ Lioroosyn myrgeddin ta dty harvaant ynsit: as ayns freaylley ad ta leagh vooar.

¹² Quoi oddys ginsh earroo e loghtyn? O glen mee veih my pheccaghyn follit.

¹³ Freill dty harvaant myrgeddin veih peccaghyn dy ghaanys, nagh vow ad barriaght harrym: myr shen bee’m seyr, as gyn loght veih’n peccah trome.

¹⁴ Lhig da goan my veeal, as smooinaghtyn my chree: ve dy kinjagh booisal ayns dty hilley,

¹⁵ O Hiarn: my niart as my Er-kionnee.