Psalmyn 17 - Yn Vible Casherick 1775 1819

PSAL. XVII

¹ Eaisht rish cairys my chooish, O Hiarn, smooinee er my accan: as clasht rish my phadjer, nagh vel goll magh ass meillyn molteyragh.

² Lhig da’n vriwnys aym’s cheet magh veih dt’enish: as lhig da dty hooillyn jeeaghyn er shen ny ta cairal.

³ T’ou er phrowal as er ronsaghey my chree ayns imbagh ny hoie; t’ou er my hirrey magh as cha vow veg yn olkys aynym: son ta mee dy slane kiarit nagh jean-ym foill lesh my hengey.

⁴ Kyndagh rish obbraghyn deiney ta jeant noi goan dty veillyn: ta mee er reayll mee hene veih raaidyn y stroider.

⁵ Cum uss seose my immeeaght ayns dty raaidyn: nagh jean my chesmadyn skyrraghtyn.

⁶ Ta mee er n’eamagh ort, O Yee, son nee oo m’y chlashtyn: croym dty chleaysh hym, as eaisht rish my ghoan.

⁷ Soilshee dty chenjallys-ghraihagh erskyn insh, uss yn saualtagh ocsyn ta coyrt nyn dreishteil aynyd: veih nyn lheid ocsyn as ta shassoo noi dty laue yesh.

⁸ Jean m’y reayll myr clagh ny sooilley: follee mee fo scaa dty skianyn.

⁹ Veih’n vee-chrauee ta dy my voirey: ta my noidyn chionney orrym er dy chooilley heu dy ghoaill ersooyl my vioys.

¹⁰ T’ad dooint ayns y reuïd oc hene: as ta’n beeal oc loayrt reddyn mooaralagh.

¹¹ T’ad lhie farkiaght ayns y raad ain er dy chooilley heu: chyndaa nyn sooillyn sheese gys y thalloo.

¹² Myr y lion ta jollyssagh er e helg: as myr y lion aeg ta lhie gyn-yss ayns ynnydyn follit.

¹³ Seose, Hiarn, cur e haaseyn mow, as ceau sheese eh: livrey m’annym veih’n vee-chrauee, ta myr cliwe ayns dty laue;

¹⁴ Veih deiney dty laue, O Hiarn, veih ny deiney, ta mee gra, as veih’n drogh heihll: ta’n toghyr oc ’sy vea shoh, ny builg oc t’ou dy lhieeney lesh dty verchys follit.

¹⁵ Ta cloan oc lurg nyn aigney: as t’ad faagail ny ta er-mayrn jeh nyn merchys da nyn luight.

¹⁶ Agh er my hon’s, neem’s fakin dt’eddin ayns cairys: as tra nee’m doostey seose lurg dty chaslys, yioym yn slane soylley jeh.