Psalmyn 150 - Yn Vible Casherick 1775 1819PSAL. CL 1 O cur-jee moylley da Jee ayns e chasherickys: moylley-jee eh ayns yrjid e phooar. 2 Cur-jee moylley da ayns e obbraghyn ooasle: moylley-jee eh cordail rish e phooar erskyn-earroo. 3 Cur-jee moylley da lesh feiyr y chayrn: moylley-jee eh er y lute as y chlaasagh. 4 Moylley-jee eh lesh ny cymballyn as daunsin: cur-jee moylley da er ny greïnyn strengit as y feddan. 5 Cur-jee moylley da er ny cymballyn shiaullit: moylley-jee eh er ny cymballyn bingey. 6 Lhig da dy chooilley nhee ta ennal ayn: moylley ’choyrt da’n Chiarn. |
First published in 1775, revised and published by the British and Foreign Bible Society in 1819.
British & Foreign Bible Society