Psalmyn 149 - Yn Vible Casherick 1775 1819PSAL. CXLIX 1 O gow-jee arrane noa gys y Chiarn: lhig da agglish ny nooghyn eshyn y voylley. 2 Lhig da Israel boggey ’ghoaill aynsyn ren eh y chroo: as lhig da cloan Sion ’ve gennal ayns nyn Ree. 3 Lhig daue moylley yn Ennym echey ayns y daunsin: lhig daue arraneyn-moyllee ’ghoaill huggey lesh tabret as y chlaasagh; 4 Son ta taitnys ec y Chiarn ayns e phobble: as t’eh cooney lhieusyn ta jeh cree imlee. 5 Lhig da ny nooghyn ’ve gennal dy gloyroil: lhig daue boggey ’ghoaill er nyn lhiabbaghyn. 6 Lhig da arraneyn-moyllee Yee ’ve ayns nyn meeal: as cliwe dy ghaa foyr ayns nyn laue; 7 Dy ghoaill cooilleeney er ny ashoonee: as dy cherraghey yn pobble; 8 Dy chiangley ny reeaghyn oc ayns geulaghyn: as ny deiney ooasle oc lesh driaghtyn yiarn; 9 Dy ghoaill cooilleeney orroo, myr te scruit: Lheid yn ooashley t’ec ooilley e nooghyn. |
First published in 1775, revised and published by the British and Foreign Bible Society in 1819.
British & Foreign Bible Society