Psalmyn 148 - Yn Vible Casherick 1775 1819

PSAL. CXLVIII

¹ O moylley-jee Chiarn niau: moylley-jee eh ayns yn yrjid.

² Moylley-jee eh, ooilley shiuish e ainleyn: moylley-jee eh shiuish e heshaghtyn-caggee.

³ Moylley-jee eh, ghrian as eayst: moylley-jee eh, ooilley shiuish rollageyn as soilshey.

⁴ Moylley-jee eh, ooilley shiuish niaughyn: as shiuish ushtaghyn ta erskyn yn aer.

⁵ Lhig daue Ennym y Chiarn y voylley: son loayr eh yn fockle, as v’ad jeant; doardee eh, as v’ad er nyn groo.

⁶ T’eh er n’yannoo ad shickyr son dy bragh as dy bragh: t’eh er choyrt daue leigh nagh bee er ny vrishey.

⁷ Moylley-jee yn Chiarn er y thalloo: shiuish whaleyn, as ooilley ny ynnydyn dowiney.

⁸ Aile as sniaghtey-garroo, sniaghtey meen as kay: geay as sterrym, cooilleeney e ghoo;

⁹ Sleityn as dy chooilley chronk: biljyn messoil, as dy chooilley villey cedar;

¹⁰ Beïyn as maase jeh dy chooilley cheint: cretooryn snauee as eeanlee skianagh;

¹¹ Reeaghyn y thallooin, as dy chooilley phobble: princeyn as ooilley briwnyn y theihll;

¹² Deiney aegey as moidynyn, shenn gheiney as paitchyn, moylley-jee Ennym y Chiarn: son ta’n Ennym echeysyn ny-lomarcan ooasle, as e ghloyr erskyn niau as thalloo.

¹³ Troggee eshyn seose dy ard niart e phobble; nee ooilley e nooghyn eshyn y voylley: dy feer cloan Israel, dy jarroo yn pobble ta dy hirveish eh.