Psalmyn 147 - Yn Vible Casherick 1775 1819

PSAL. CXLVII

¹ O moylley-jee yn Chiarn; son s’mie te dy ghoaill arraneyn-moyllee gys y Jee ain: dy jarroo, s’eunyssagh as gerjoilagh te dy ve booisal.

² Ta’n Chiarn troggal seose Jerusalem: as chaglym cooidjagh kynneeyn skeaylt Israel.

³ T’eh dy lheihys adsyn ta brisht ayns cree: as coyrt medshin dy laanaghey ny doghanyn oc.

⁴ T’eh coontey earroo ny rollageyn: as ta ennym echey er dagh unnane oc.

⁵ S’mooar ta’n Chiarn ainyn, as s’mooar ta e phooar: dy jarroo, ta e chreenaght erskyn earroo.

⁶ Ta’n Chiarn soiaghey seose yn vooinjer imlee: as coyrt sheese ny mee-chrauee kiart rish y thalloo.

⁷ O gow-jee arraneyn-moyllee gys y Chiarn lesh toyrt-booise: gow-jee arraneyn-moyllee er y chlaasagh gys y Jee ain;

⁸ Ta coodaghey yn aer lesh bodjallyn, as jannoo aarloo yn fliaghey son y thalloo: ta coyrt er y faiyr dy aase er ny sleityn, as lossreeyn son ymmyd deiney;

⁹ Ta coyrt foddyr da’n maase: as beaghey ny fee aegey ta geamagh huggey.

¹⁰ Cha vel eshyn soiaghey jeh troshid cabbyl: chamoo ta geill echey da cassyn y choshee bieau;

¹¹ Agh ta taitnys ec y Chiarn ayndoosyn ta goaill aggle roish: as ta coyrt nyn dreishteil ayns e vyghin.

¹² Cur moylley da’n Chiarn, O Yerusalem: cur moylley da dty Yee, O Sion;

¹³ Son t’eh er n’yannoo shickyr boltyn dty yiattyn: as er vannaghey dty chloan er cheu-sthie jeed.

¹⁴ T’eh jannoo shee ayns dty ardjyn: as dy dty yannoo magh lesh flooyr curnaght.

¹⁵ T’eh coyrt magh e harey er y thalloo: as ta e ghoo roie feer leah.

¹⁶ T’eh tilgey sniaghtey myr ollan: as skeayley yn lheeah-rio myr leoie.

¹⁷ T’eh ceau magh e rio ayns peeshyn mynney: quoi ta abyl dy hurranse y feayraght echey?

¹⁸ T’eh coyrt magh e ghoo, as dy hennue ad: t’eh sheidey lesh e gheay, as ta ny ushtaghyn roie.

¹⁹ Hoilshee eh e ghoo da Jacob: e lattyssyn as e oardaghyn da Israel.

²⁰ Cha vel eh er ghellal myr shoh rish ashoon erbee elley: chamoo t’ec ny ashoonee tushtey jeh e leighyn.