Psalmyn 139 - Yn Vible Casherick 1775 1819

PSAL. CXXXIX

¹ O Hiarn, t’ou er my ronsaghey magh, as er my hoiggal: shione dhyt’s my hoie-sheese, as my irree-seose; t’ou toiggal my smooinaghtyn foddey ro-laue.

² T’ou uss mygeayrt my chassan, as mygeayrt my lhiabbee: as fakin ooilley my raaidyn.

³ Son cur-my-ner, cha vel fockle er my hengey: nagh vel uss, O Hiarn, dy slane toiggal.

⁴ T’ou uss er my chummey cheu-chooylloo, as cheu-veealloo: as er choyrt dty laue orrym.

⁵ Dy hoiggal shoh, te ro yindyssagh as ro ard er my hon: cha voddym roshtyn huggey.

⁶ C’raad eisht nee’m chea veih dty Spyrryd: ny c’raad nee’m cosney veih dt’enish?

⁷ My hem seose gys niau, t’ou ayns shen: my hem sheese gys niurin, t’ou ayns shen myrgeddin.

⁸ My ghoym skianyn y voghrey: as tannaghtyn ayns ny ardjyn sodjey magh d’yn aarkey;

⁹ Dy jarroo ayns shen myrgeddin nee dty laue m’y leeideil: as nee dty laue yesh m’y niartaghey.

¹⁰ My jir-ym, Foddee dy jean y dorraghys m’y choodaghey: eisht bee m’oie er ny hyndaa gys soilshey yn laa.

¹¹ Dy jarroo, cha vel y dorraghys dorraghey mayrt’s, agh ta’n oie cha sollys as y laa: ta’n dorraghys as y soilshey dhyt’s co-laik.

¹² Son lhiat’s my challin: t’ou er my choodaghey ayns breïn my vayrey.

¹³ Ver-ym booise dhyt, son ta mee dy atchimagh as dy yindyssagh er my chroo: mirrilagh ta dt’obbraghyn, as s’mie ta m’annym’s dy hoiggal shen.

¹⁴ Cha vel my chraueyn er ny cheiltyn voïd’s: ga dy row mee jeant dy follit, as er my chummey heese er y thalloo.

¹⁵ Honnick dty hooillyn yn stoo aym’s, tra ve foast gyn cummey: as ayns dty lioar va ooilley my oltyn scruit;

¹⁶ Va laa lurg laa er nyn gummey: tra nagh row ad foast er jeet rish.

¹⁷ O cre cha deyr ta dty choyrleyn dooys, O Yee: O cre wheesh ta’n sym oc!

¹⁸ My hem dy choontey ad, t’ad ny smoo ayns earroo na’n gheinnagh: tra ta mee doostey ass my chadley, ta mee ayns dt’enish.

¹⁹ Nagh jean oo stroie ny drogh-yantee, O Yee: immee-jee ass m’enish, shiuish gheiney fuilltagh.

²⁰ Son t’ad loayrt dy mee-chairagh dt’oï: as ta dty noidyn goaill dt’Ennym ayns fardail.

²¹ Nagh vel dwoaie aym orroosyn, O Hiarn, ta dwoaie oc ort’s: as nagh vel mee corree roosyn ta girree magh dt’oï?

²² Dy jarroo ta slane dwoaie aym orroo: myr dy beagh ad my eer noidyn.

²³ Prow mee, O Yee, as ronsee grunt my chree: jean m’y hirrey magh, as feysht my smooinaghtyn.

²⁴ Jeeagh my ta mee ayns raad erbee dy olkys: as leeid mee gys raad yn vea dy bragh farraghtyn.