Psalmyn 132 - Yn Vible Casherick 1775 1819

PSAL. CXXXII

¹ Hiarn, cooinee er David: as ooilley e heaghyn.

² Kys ren eh breearrey gys y Chiarn: as gialdyn casherick y yannoo da Jee Ooilley-niartal Yacob.

³ Cha jig-yms fo clea my hie: chamoo hem seose gys my lhiabbee;

⁴ Cha der-ym cadley da my hooillyn, ny saveenagh da ferrooghyn my hooill: ny cuishlinyn my ching dy ghoaill veg y fea;

⁵ Derrey yioym magh boayl son chiamble y Chiarn: ynnyd-vaghee son Jee niartal Yacob.

⁶ Cur-my-ner, cheayll shin jeh ec Ephratah: as hooar shin eh ayns y cheyll.

⁷ Hem mayd stiagh ayns y chabbane-agglish echeysyn: as tuittee mayd injil er nyn ghlioonyn kiongoyrt rish stoyl e choshey.

⁸ Trog ort, O Hiarn, gys ynnyd dt’ea: uss, as arg dty niart.

⁹ Lhig da dty haggyrtyn ’ve coamrit lesh cairys: as lhig da dty nooghyn kiaulleeaght ’yannoo lesh boggey.

¹⁰ Er graih dty harvaant Ghavid: ny chyndaa ersooyl eddin dt’Er-ooilit.

¹¹ Ta’n Chiarn er n’yannoo breearrey firrinagh da David: as cha jed eh n’oï;

¹² Jeh mess dty chorp: neem’s soiaghey er dty stoyl-reeoil.

¹³ My nee dty chloan freayll my chonaant as my recortyssyn neem’s gynsaghey daue: nee’n chloan ocsyn myrgeddin soie er dty stoyl-reeoil er son dy bragh.

¹⁴ Son ta’n Chiarn er ghoaill Sion myr reih dy ve ynnyd-vaghee da hene: t’eh er ghoaill taitnys aynjee.

¹⁵ Shoh’n raad vee’m ec fea, son dy bragh: ayns shoh nee’m cummal, son ta mee goaill boggey ayn.

¹⁶ Nee’m yn beaghey eck y vannaghey lesh bishagh: as nee’m ny boghtyn eck y yannoo magh lesh arran.

¹⁷ Ny saggyrtyn eck nee’m y choamrey lesh slaynt: as gowee ny nooghyn eck boggey lesh arraneyn-moyllee.

¹⁸ Shen y raad ver-ym er niart Ghavid dy vlaaghey: ta mee er n’oardaghey londeyr son my Er-ooilit.

¹⁹ Er son e noidyn, nee’m adsyn y choodaghey lesh nearey: agh er hene nee’n attey echey cur magh blaa.