Psalmyn 130 - Yn Vible Casherick 1775 1819

PSAL. CXXX

¹ Veih’n diunid ta mee er n’eamagh hood’s, O Hiarn: Hiarn, clasht rish my choraa.

² O lhig da dty chleayshyn geill y choyrt: da coraa m’accan.

³ My vees uss, Hiarn, gyere dy ghoaill tastey jeh nyn shaghrynys: O Hiarn, quoi oddys shassoo fo?

⁴ Agh mayrt’s ta myghin: shen-y-fa bee aggle er ny ghoaill royd.

⁵ Ta mee jeeaghyn son y Chiarn, ta m’annym farkiaght er e hon: ayns e ghoo ta my hreishteil.

⁶ Ta my chree chea gys y Chiarn: roish arrey yn voghrey, ta mee gra, roish arrey yn voghrey.

⁷ O Israel, cur dty hreishteil ayns y Chiarn, son marish y Chiarn ta myghin: as mârishyn ta livrey-ys niartal.

⁸ As livreyee eh Israel: veih ooilley e pheccaghyn.