Psalmyn 129 - Yn Vible Casherick 1775 1819

PSAL. CXXIX

¹ Shimmey keayrt t’ad er chaggey m’oï veih my aegid: foddee Israel nish gra;

² Dy jarroo, shimmey keayrt t’ad er n’yannoo tranlaase orrym veih m’aegid derrey nish: agh cha vel ad er chosney orrym.

³ Ta ny errooyn er hraaue er my ghreeym: as er n’yannoo creaghyn liauyrey;

⁴ Agh ta’n Chiarn cairagh: er vrishey ribbaghyn ny mee-chrauee dy peeshyn.

⁵ Lhig dauesyn v’er nyn goyrt gys nearey as er nyn gastey: whilleen as t’ayns drogh-aigney gys Sion.

⁶ Dy jarroo, lhig daue ’ve myr y faiyr gaase er mullagh y thie: ta fioghey roish my te slane er n’aase;

⁷ Lesh cha vel y beaynee lhieeney e laue: ny eshyn ta kiangley ny bunneeyn e oghrish.

⁸ Myr shen nagh vel adsyn ta goll shaghey wheesh as gra, Dy vannee yn Chiarn diu: aïgh mie diu ayns Ennym y Chiarn.