Psalmyn 113 - Yn Vible Casherick 1775 1819

PSAL. CXIII

¹ Moylley-jee yn Chiarn, shiuish e harvaantyn: O moylley-jee Ennym y Chiarn.

² Bannit dy row Ennym y Chiarn: veih’n traa shoh magh er son dy bragh.

³ Ta Ennym y Chiarn er ny voylley: veih irree gys lhie ny greïney.

⁴ Ta’n Chiarn ard erskyn dy chooilley ashoon: as ta e ghloyr erskyn ny niaughyn.

⁵ Quoi ta casley rish y Chiarn y Jee ain, ta e ynnyd-vaghee cha ard: as ny-yeih t’eh ginjillaghey eh-hene dy chur-my-ner ny reddyn t’ayns niau as er y thalloo?

⁶ T’eh goaill seose yn fer imlee ass y joan: as troggal yn ymmyrchagh veih’n thorran;

⁷ Dy vod eh eshyn y hoiaghey seose mastey ny princeyn: dy jarroo mastey princeyn e phobble.

⁸ T’eh cur er y ven ghennish dy reayll thie: as dy ve ny moir ghennal dy chloan.