Psalmyn 109 - Yn Vible Casherick 1775 1819

PSAL. CIX

¹ Ny bee uss dty host, O Yee my voylley: son ta beeal ny mee-chrauee, dy jarroo, ta beeal yn vooinjer volteyragh er ny osley m’oï.

² As t’ad er loayrt m’oï lesh chengaghyn foalsey: t’ad er jeet mygeayrt-y-moom lesh focklyn dwoaiagh, as er chaggey m’oï gyn oyr.

³ Son y ghraih v’aym orroosyn, cur-my-ner, t’ad nish shassoo m’oï: agh ta mish dy chur mee hene seose gys padjer.

⁴ Myr shoh t’ad er chooilleeney dou olk son mie: as goanlys er son my aigney-mie.

⁵ Nee dooinney mee-chrauee reill y ymmyrkey harrish: as shassee Noid-ny-hanmey ec e laue yesh.

⁶ Tra vees briwnys er ny choyrt er, bee eh er ny gheyrey: as bee’n phadjer echey er ny hyndaa gys peccah.

⁷ Bee e laghyn giare: as gowee fer elley yn oik echey.

⁸ Bee’n chloan echey gyn ayr: as y ven echey treoghe.

⁹ Bee’n chloan echey nyn gercheenyn, as shooyl ny dhieyn son jeirk: shirree ad eh ayns buill fadane.

¹⁰ Nee’n dooinney tranlaasagh ooilley ny t’echey y chur mow: as nee’n joarree e laboraght y spooilley.

¹¹ Cha gow dooinney erbee chymmey jeh: ny erreeish y hoilshaghey da e chloan gyn ayr.

¹² Bee’n sluight echey er ny chur naardey: as ayns yn nah heeloghe bee’n ennym echey dy bollagh er ny yarrood.

¹³ Bee olkys ny ayraghyn echey er ny reayll ayns cooinaghtyn ayns shilley’n Chiarn: as cha bee peccah e voir er ny cheiltyn.

¹⁴ Bee ad dy kinjagh kiongoyrt rish y Chiarn: dy vod eh yn imraa jeu y astyrt dy bollagh jeh’n ooir.

¹⁵ As shoh, son nagh row e aigney dy yannoo mie: agh ren eh tranlaase er y voght gyn cooney, dy voddagh eh eshyn y stroie va seaghnit ayns cree.

¹⁶ Va e haitnys ayns gweeaghyn, as hig eh er: cha bynney lesh bannaght, shen-y-fa bee eh foddey voish.

¹⁷ Choamree eh eh-hene lesh gweeaghyn myr lesh garmad: as hed eh stiagh ayns e vynnagh myr ushtey, as myr ooil ayns e chraueyn.

¹⁸ Bee eh da myr y cloagey t’eh dy cheau: as myr y cryss ta dy kinjagh mysh.

¹⁹ Shoh myr nee eh taghyrt da my noidyn veih’n Chiarn: as dauesyn myrgeddin ta loayrt dy olk noi m’annym,

²⁰ Agh dell uss rhym’s, O Hiarn my Yee, cordail rish dty Ennym: son s’millish ta dty vyghin.

²¹ O livrey mee, son ta mee ymmyrchagh as gyn cooney: as ta my chree guint cheu-sthie jee’m.

²² Ta mee goll ass shoh myr y scadoo ta scughey ersooyl: ta mee eiyrit noon as noal myr y locust.

²³ Ta my ghlioonyn annoon lesh trostey: ta my eill shymlit son laccal soo.

²⁴ Haink mee myrgeddin dy ve oltooan daue: adsyn va jeeaghyn orrym chrie ad nyn ghing.

²⁵ Cooin lhiam, O Hiarn my Yee: O jean uss mish y hauail cordail rish dty vyghin.

²⁶ As bee fys oc dy nee shoh dty laue: as dy nee uss, Hiarn, t’er n’yannoo eh.

²⁷ Ga dy vel adsyn gweeaghyn, ny-yeih jean uss bannaghey: as lhig daue ve er nyn goyrt gys nearey ta girree seose m’oï; agh lhig da dty harvaant boggey ’ghoaill.

²⁸ Lhig da my noidyn ve er nyn goamrey lesh nearey: as lhig daue ve coodit lesh nyn scammylt hene myr lesh cloagey.

²⁹ Er my hon’s, ver-ym mooarane booise da’n Chiarn lesh my veeal: as nee’m eshyn y voylley mastey earroo yn phobble.

³⁰ Son shassee eh ec laue yesh y voght: dy hauail e annym veih briwnyn neu-chairagh.