Psalmyn 104 - Yn Vible Casherick 1775 1819

PSAL. CIV

¹ Bannee yn Chiarn, O m’annym: O Hiarn my Yee, t’ou erskyn-towse gloyroil, t’ou er ny choamrey lesh Ard-ooashley as onnor.

² T’ou dy choamrey oo hene lesh soilshey myr lesh garmad: as skeayley magh ny niaughyn myr curtan;

³ Ta soiaghey beamyn e hiamyryn ayns ny ushtaghyn: as jannoo ny bodjallyn e ainagh, as goll er skianyn ny geayee.

⁴ T’eh jannoo e ainleyn spyrrydyn: as e hirveishee lossey dy aile.

⁵ T’eh er hoiaghey undinyn y thallooin: nagh bee eh ec traa erbee er ny scughey.

⁶ Choodee oo eh lesh y diunid myr lesh garmad: ta ny ushtaghyn lhie ayns ny croink.

⁷ Ec yn oghsan ayd’s t’ad chea ersooyl: ec coraa dty haarnagh ta aggle orroo.

⁸ T’ad goll seose cha ard as ny croink, as sheese gys ny coanyn: eer gys yn ynnyd t’ou er phointeil daue.

⁹ T’ou er hoiaghey ny cagliaghyn oc nagh jed ad harrish: ny chyndaa reesht dy choodaghey yn thalloo.

¹⁰ T’eh cur ny geillyn gys ny awinyn: ta roie mastey ny croink.

¹¹ Ta ooilley beïyn y vagher giu jeu: as ta ny assylyn feïe cuir nyn baa.

¹² Lioroo vees nyn gummal ec eeanlee’n aer: as nee ad bingys mastey ny banglaneyn.

¹³ T’eh gushtaghey ny croink veih yn yrjid: ta’n seihll er ny lhieeney lesh mess dt’obbraghyn.

¹⁴ T’eh cur magh faiyr son y maase: as messyn y vagheragh son ymmyd dooinney;

¹⁵ Dy vod eh beaghey y chur lesh magh ass y thalloo, as feeyn ta gerjaghey cree dooinney: as ooil dy chur da eddin ghennal, as arran dy niartaghey cree dooinney.

¹⁶ Ta biljyn y Chiarn myrgeddin lane dy hoo: dy jarroo cedaryn Libanus t’eshyn er hoiaghey;

¹⁷ Ayndoo ta ny eeanlee jannoo nyn idd: as ta ny biljyn-juys ynnyd-cummal son y stork.

¹⁸ Ta ny croink ard oayll son ny goair feïe: as myr shen ta ny creggyn son ny conninyn.

¹⁹ Ren eh yn eayst y phointeil son imbaghyn shickyr: as shione da’n ghrian yn traa dy lhie.

²⁰ T’ou jannoo dorraghys dy chur stiagh yn oie: ayn ta ooilley beïyn y cheyll rouail mygeayrt.

²¹ Ta ny lionyn garveigagh son nyn spooilley: shirrey nyn meaghey veih Jee.

²² Ta’n ghrian girree, as t’ad cosney rhymboo cooidjagh: as lhie sheese ayns nyn ooigyn.

²³ Ta dooinney goll magh gys e obbyr, as gys e laboraght: derrey’n astyr.

²⁴ O Hiarn, cre cha ymmodee ta dt’obbraghyn: ayns creenaght t’ou er n’yannoo ad ooilley, ta’n seihll lane jeh dty verchys!

²⁵ Myr shen ta’n faarkey mooar as feayn myrgeddin: ayn ta cretooryn snauee gyn earroo, beishtyn chammah beg as mooar.

²⁶ Shen y raad ta ny lhongyn shiaulley, as ayns shen ta’n Leviathan: t’ou uss er n’yannoo dy ghoaill yn reamys echey ayn.

²⁷ T’ad shoh ooilley farkiaght ort: dy vod oo beaghey y chur daue ayns imbagh cooie.

²⁸ Tra t’ou dy chur daue eh, t’ad dy haglym eh: as tra t’ou fosley dty laue, t’ad jeant magh lesh mie.

²⁹ Tra t’ou follaghey dt’eddin, t’ad seaghnit: tra t’ou goaill ersooyl yn ennal oc, t’ad geddyn baase, as t’ad chyndaït reesht gys nyn ooir;

³⁰ Tra t’ou lhiggey magh dt’ennal, bee ad er nyn groo: as t’ou cur eddin noa da eaghtyr y thallooin.

³¹ Nee Ard-ooashley gloyroil y Chiarn farraghtyn son dy bragh: nee yn Chiarn boggey ’ghoaill ayns e obbraghyn.

³² Bee yn thalloo er-creau ec e hilley: my nee eh agh bentyn rish ny sleityn, bee ad ayns jaagh.

³³ Goym arrane da’n Chiarn choud as s’bio mee: nee’m my Yee y voylley choud as vee’m er-mayrn.

³⁴ As shen myr nee my ghoan eshyn y wooiys: bee my voggey ayns y Chiarn.

³⁵ Er son peccee, bee adsyn er nyn goyrt mow veih’n thalloo, as hig jerrey er ny mee-chrauee: cur uss moylley da’n Chiarn, O m’annym, cur moylley da’n Chiarn.