Psalmyn 103 - Yn Vible Casherick 1775 1819

PSAL. CIII

¹ Bannee yn Chiarn, O m’annym: as ooilley ny ta cheu-sthie jee’m bannee e Ennym casherick.

² Bannee yn Chiarn, O m’annym: as ny jarrood ooilley e hoyrtyssyn;

³ Ta leih ooilley dty pheccah: as slaanaghey ooilley dty ghoghanyn;

⁴ Ta sauail dty vioys veih toyrt-mow: as dy dty choamrey lesh myghin as kenjallys-ghraihagh;

⁵ Ta jannoo magh dty veeal lesh nheeghyn mie: jannoo oo aeg as lajer myr urley.

⁶ Ta’n Chiarn cooilleeney cairys as briwnys: er nyn son ocsyn ooilley ta tranlaasit lesh aggair.

⁷ Hoilshee eh e raaidyn da Moses: e obbraghyn da cloan Israel.

⁸ Ta’n Chiarn lane dy hymmey as dy vyghin: surranse-foddey, as jeh mieys vooar.

⁹ Cha bee eh kinjagh corree: chamoo t’eh freayll e yymmoose son dy bragh.

¹⁰ Cha vel eh er ghellal rooin lurg nyn beccaghyn: ny er chooilleeney shin cordail rish nyn mee-chraueeaght;

¹¹ Son jeeagh cre cha ard as ta niau ayns co-soylaghey jeh’n thalloo: wheesh cheddin ta e vyghin dauesyn ta goaill aggle roish.

¹² Jeeagh cre cha lhean as ta’n shiar veih’n sheear: choud cheddin t’eh er hoiaghey nyn beccaghyn voïn.

¹³ Dy jarroo, myr ta chymmey ec ayr er e chloan hene: myr shen ta’n Chiarn myghinagh dauesyn ta goaill aggle roish.

¹⁴ Son shione da cre jeh ta shin jeant: t’eh cooinaghtyn nagh vel shin agh joan.

¹⁵ Cha vel laghyn dooinney agh myr faiyr: son t’eh gaase myr blaa yn vagher.

¹⁶ Son cha leah as ta’n gheay goll harrish, te ersooyl: as cha der yn ynnyd ve ayn enney er ny sodjey.

¹⁷ Agh ta mieys myghinagh y Chiarn farraghtyn son dy bragh as dy bragh orroosyn ta goaill aggle roish: as e chairys er cloan chlienney;

¹⁸ Orroosyn dy jarroo ta freayll e chonaant: as ta smooinaghtyn er e annaghyn dy yannoo ad.

¹⁹ Ta’n Chiarn er hoiaghey seose e stoyl-reeoil ayns niau: as ta e reeriaght reill harrish ooilley.

²⁰ O bannee-jee yn Chiarn, shiuish e ainleyn, shiuish ta pooaral ayns niart: shiuish ta cooilleeney e harey, as ta geaishtagh rish coraa e ghoan.

²¹ O bannee-jee yn Chiarn, ooilley shiuish e heshaght flaunys: shiuish e harvaantyn ta cooilleeney e aigney.

²² O loayr-jee dy mie jeh’n Chiarn, ooilley shiuish e obbraghyn, ayns dy chooilley ynnyd jeh e reiltys: bannee yn Chiarn, O m’annym.