Psalmyn 101 - Yn Vible Casherick 1775 1819

PSAL. CI

¹ Bee m’arrane jeh myghin as briwnys: hood’s, O Hiarn, goym arrane.

² O lhig da tushtey y ve aym: ayns y raad dy chraueeaght.

³ Tra nee oo my niartaghey: nee’m gimmeeaght ayns my hie lesh cree ynrick.

⁴ Cha goym drogh chooish erbee ayns laue: ta dwoaie aym er ny peccaghyn dy neu-firrinys: cha jean veg nyn lheid lhiantyn hym.

⁵ Bee cree camlaagagh er n’eiyrt ass m’enish: cha bee ainjys aym rish drogh phersoon.

⁶ Quoi-erbee ta cooyl-chassid e naboo: eshyn nee’m y stroie.

⁷ Quoi-erbee myrgeddin t’echey shilley mooaralagh as cree ard: cha surr-ym eh.

⁸ Ta my hooillyn jeeaghyn orroosyn ta ynrick ’sy cheer: dy vod ad cummal mârym.

⁹ Quoi-erbee ta leeideil bea chrauee: eshyn vees my harvaant.

¹⁰ Cha jean persoon erbee molteyragh cummal ayns my hie: cha surr-ym breagerey dy ve ayns my hilley.

¹¹ Stroie-ym dy leah ooilley’n vee-chrauee ta ’sy cheer: dy voddym ooilley ny drogh-yantee y astyrt ass ard-valley’n Chiarn.