Noo Mian 17 - Yn Vible Casherick 1775 1819

CAB. XVII

¹ As ec kione shey laa, ghow Yeesey Peddyr, as Jamys, as Ean e vraar, as hug eh lesh ad er-lheh seose er slieau ard,

² As va’n cummey echey er ny chaghlaa kiongoyrt roo, as ren yn eddin echey soilshean myr y ghrian, as va’n coamrey echey gial myr y soilshey.

³ As cur-my-ner, honnick ad Moses as Elias taggloo rish.

⁴ Eisht dreggyr Peddyr as dooyrt eh rish Yeesey, Hiarn, s’maynrey dooin dy hannaghtyn ayns shoh: my she dty aigney’s eh, lhig dooin ayns shoh troggal three cabbaneyn: cabbane er dty hon’s, as cabbane son Moses, as cabbane son Elias.

⁵ Choud as v’eh foast loayrt, ren bodjal sollys skeayley harrystoo: as cur-my-ner haink coraa ass y vodjal, gra, Shoh my vac ennoil, ayn ta mee goaill slane taitnys, eaisht-jee rishyn.

⁶ As tra cheayll ny ostyllyn eh, huitt ad sheese er nyn eddin gys y thalloo, son s’mooar yn aggle v’orroo.

⁷ As haink Yeesey as venn eh roo, as dooyrt eh, Trog-jee erriu, as ny gow-jee aggle.

⁸ As tra hrog ad seose nyn sooillyn, cha vaik ad fer erbee, agh Yeesey ny-lomarcan.

⁹ As myr v’ad cheet neose jeh’n clieau, hug Yeesey currym orroo, gra, Ny insh-jee yn ashlish da unnane erbee, derrey vees Mac yn dooinney er n’irree veih ny merriu.

¹⁰ As dênee e ostyllyn jeh, gra, Cre’n-oyr jir ny scrudeyryn dy vel Elias dy heet hoshiaght?

¹¹ Dansoor Yeesey as dooyrt eh roo, Hig Elias dy jarroo hoshiaght, as lhiassee eh dy chooilley nhee:

¹² Agh ta mish gra riu, dy vel Elias er jeet hannah, as cha dug ad geill da, agh t’ad er ghellal rish lurg nyn aigney hene: as er yn aght cheddin nee Mac y dooinney neesht surranse lioroo.

¹³ Eisht hoig e ostyllyn dy nee er Ean Bashtey v’eh cheet.

¹⁴ As tra v’ad er jeet gys y cheshaght, haink huggey dooinney dy row, gliooney sheese as gra,

¹⁵ Hiarn, jean chymmey er my vac, son t’eh ass e cheeayl, as dy mooar seaghnit: son t’eh dy mennick tuittym ayns yn aile, as dy mennick ayns yn ushtey.

¹⁶ As hug mee lhiam eh gys dty ostyllyn, as cha yarg ad eh y lheihys.

¹⁷ Dansoor Yeesey as dooyrt eh, O heeloghe vee-chredjuagh as roonagh, caïd ta mish dy ve mêriu? caïd ta mee dy hurranse diu? cur lhiat eh hym’s ayns shoh.

¹⁸ As vaggyr Yeesey er y drogh-spyrryd, as hie eh magh ass: as va’n lhiannoo er ny lheihys veih’n oor shen.

¹⁹ Eisht haink e ostyllyn gys Yeesey er-lheh, as dooyrt ad, Cre liorish nagh voddagh shinyn eh y lheihys?

²⁰ Dooyrt Yeesey roo, Kyndagh rish nyn gredjue moal: son dy firrinagh ta mee gra riu, Dy beagh nyn gredjue wheesh grine dy rass mustard, jirragh shiu rish y slieau shoh, Scugh veih shoh noon gys shid, as nee eh scughey: as cha bee nhee erbee ro ghoillee diu.

²¹ Ny-yeih cha vel y dooghys shoh dy ghrogh-spyrrydyn dy ve castit, agh liorish padjer as trostey.

²² As choud as v’ad ayns Galilee, dooyrt Yeesey roo, Bee Mac y dooinney er ny vrah gys laueyn deiney:

²³ As ver ad eh gy-baase, as y trass laa nee eh girree reesht: as v’ad feer trimshagh.

²⁴ As tra v’ad er jeet gys Capernaum, haink y vooinjer va troggal argid y cheesh gys Peddyr, gra, Nagh vel y mainshter euish geeck y cheesh?

²⁵ Dooyrt eshyn, Dy row. As tra v’eh er jeet stiagh ayns y thie, va Yeesey ro-laue rish, gra, Cre t’ou smooinaghtyn, Simon? quoi jeh ta reeaghyn y thallooin troggal custom ny keesh? jeh nyn gloan hene, ny jeh joarreeyn?

²⁶ Dooyrt Peddyr rish, Jeh joarreeyn. Dooyrt Yeesey rishyn, Eisht ta’n chloan seyr.

²⁷ Ny-yeih, son nagh bee cômys er ny chur hooin, immee uss gys y cheayn, as lhig sheese dooan, as trog y chied eeast hig hood: as tra vees oo er vosley e veeal, yiow peesh dy argid ayn; shen gow, as eeck eh er my hon’s as er dty hon hene.