Noo Mark 16 - Yn Vible Casherick 1775 1819

CAB. XVI

¹ As tra va’n doonaght ec kione, va Moirrey Malaine, as Moirrey moir Yamys as Salome, er chionnaghey spiceyn millish, dy voddagh ad cheet dy ooilaghey eh.

² As feer voghey ayns y vadran, er y chied laa jeh’n chiaghtin, haink ad gys yn oaie ec irree ny greïney.

³ As dooyrt ad nyn mast’ oc hene, Quoi rowlys ersooyl yn chlagh jeh beeal yn oaie?

⁴ (As tra v’ad er yeeaghyn, honnick ad y chlagh rowlit ersooyl) son v’ee feer vooar.

⁵ As hie ad stiagh ayns yn oaie, as honnick ad dooinney aeg ny hoie er y cheu yesh, coamrit ayns coamrey liauyr gial: as v’ad agglagh.

⁶ As dooyrt eh roo, Ny bee aggle erriu: ta shiu shirrey Yeesey dy Nazareth, v’er ny chrossey: t’eh er n’irree; cha vel eh ayns shoh: cur-jee my-ner shoh’n boayl v’eh oanluckit ayn.

⁷ Agh immee-jee reue, insh-jee da e ostyllyn as da Peddyr, dy vel eh goll reue gys Galilee: shen y raad hee shiu eh, myr dooyrt eh riu.

⁸ As hie ad magh ayns siyr, as roie ad roue veih’n oaie, son v’ad er-creau as atchimagh: chamoo loayr ad veg rish dooinney erbee; son v’ad agglit.

⁹ Nish tra va Yeesey er n’irree er moghrey yn chied laa jeh’n chiaghtin, hoilshee eh eh-hene hoshiaght da Moirrey Malaine, ass-jee v’eh er hilgey shiaght drogh-spyrrydyn.

¹⁰ As hie ish as dinsh ee yn naight dauesyn boallagh ve sheer mârish, myr v’ad dobberan as keayney.

¹¹ As tra cheayll ad dy row eh bio, as dy row ish er vakin eh, foast cha ren ad credjal.

¹² Ny lurg shen hoilshee eh eh-hene ayns cummey elley da jees jeu, myr v’ad shooyl er y raad, as goll er y cheer.

¹³ As hie ad as dinsh ad eh da’n chooid elley jeh’n cheshaght: chamoo chred ad ad shoh.

¹⁴ Ny lurg shen hoilshee eh eh-hene da’n un ostyl yeig, myr v’ad nyn soie ec bee, as hooar eh foill daue son y vee-chredjue as y chreoghys cree oc, er-yn-oyr nagh ren ad credjal adsyn v’er vakin eh, erreish da v’er n’irree.

¹⁵ As dooyrt eh roo, Immee-jee magh trooid ooilley yn seihll, as jean-jee yn sushtal y phreacheil da dy chooilley chretoor.

¹⁶ Bee eshyn ta credjal as ta bashtit, er ny hauail; agh bee eshyn nagh jean credjal er ny gheyrey.

¹⁷ As eiyree ny cowraghyn shoh orroosyn ta credjal; Ayns my ennym’s nee ad drogh-spyrrydyn y chastey, loayree ad lesh chengaghyn noa,

¹⁸ Nee ad loaghtey ard-nieughyn, as my iu-ys ad nhee erbee pushoonagh, cha jean eh skielley daue; ver ad nyn laueyn er sleih chingey, as nee ad coural.

¹⁹ Myr shen erreish da’n Chiarn v’er loayrt roo, v’eh er ny ghoaill seose gys niau, as hoie eh er laue yesh Yee.

²⁰ As hie ad magh, as ren ad preacheil dy chooilley raad, yn Chiarn gobbraghey mâroo; as jannoo yn goo breeoil liorish ny mirrilyn va goll lesh. Amen.