Nehemiah 6 - Yn Vible Casherick 1775 1819

CAB. VI

¹ Nish haink eh gy-kione, tra cheayll Sanballat, as Tobiah, as Gesham yn Arabian, as y chooid elley jeh nyn noidyn, dy row mee er hroggal y voalley, nagh row brishey erbee faagit ayn, (ga ec y traa cheddin cha row mee er hoiaghey seose coollaghyn er ny giattyn).

² Dy dug Sanballat, as Geshem fys hym, gra, Tar, lhig dooin meeiteil cooidjagh ayns unnane jeh ny baljyn, ayns cheer-rea Ono; agh v’ad kiarail olk m’oï.

³ As hug mee chaghteryn hucsyn, gra, Ta mee mysh obbyr vooar, myr shen nagh voddym cheet sheese hiu: cre’n-fa veagh yn obbyr ny haaue, choud as aag-ym’s eh, dy choyrt meeiteil diuish?

⁴ Ny-yeih, hug ad y fys cheddin hym kiare keayrtyn; as hug mee yn ansoor cheddin daue.

⁵ Eisht hug Sanballat e harvaant hym myrgeddin yn wheiggoo cheayrt, lesh screeuyn foshlit ayns e laue:

⁶ Ayn va scruit; Te goo cadjin mastey ny ashoonee, as ta Gashmu lhiassaghey erriu, dy vel uss as ny Hewnyn kiarail dy irree-magh; son yn oyr shoh t’ou coamrey yn voalley, dy vod oo hene ve yn ree oc, myr ta’n goo goll jeed.

⁷ As t’ou myrgeddin er phointeil phadeyryn dy ockley magh my-dty-chione ec Jerusalem, gra, Ta ree ayns Judah; as nish hig shoh gys clashtyn y ree. Tar nish er-y-fa shen, as lhig dooin cur nyn goyrle dy cheilley.

⁸ Eisht hug mee fys huggey, gra, Cha vel fockle dy lheid as t’ou lhiassaghey, agh t’ou er hroggal yn goo shoh ass dty chree hene.

⁹ Son v’ad ooilley smooinaghtyn dy chur shin fo aggle, gra, Bee ny laueyn oc er nyn lhaggaghey ’syn obbyr, nagh jed ad er nyn doshiaght. Nish, er-y-fa shen, O Yee, niartee my laueyn.

¹⁰ Eisht hie mee gys thie Shemaiah, mac Delaiah, mac Mehetabel, dooinney croutagh; as dooyrt eh, Lhig dooin meeiteil cooidjagh ayns thie Yee, cheu-sthie jeh’n chiamble, as jannoo shickyr dorryssyn y chiamble: son hig ad dy dty varroo, eer ayns yn oie, hig ad dy ghoaill dty vioys.

¹¹ As dooyrt mee, Cre, lheid y dooinney as mish dy choyrt cooyl? quoi’n dooinney ’syn oik cheddin, ragh stiagh ’sy chiamble dy hauail e vioys? Cha jem stiagh ayn.

¹² As hug mee my-ner, nagh nee Jee ren y choyrt eh, agh dy row eh jeh hene er hroggal yn phadeyrys shoh m’oï: son va Tobiah as Sanballat er vailley eh.

¹³ As son shoh v’eh failt dy m’y agglaghey, dy eiyrt er y choyrle aggairagh shoh, as oyr ’ve oc dy hroggal drogh ghoo jee’m, as dy my oltooaney.

¹⁴ My Yee smooinee er Tobiah as Sanballat, cordail rish nyn obbraghyn, as er phadeyrys Noadiah, as y chooid elley jeh ny phadeyryn, bailliu m’y agglaghey.

¹⁵ Myr shoh va’n voalley dy slane coamrit er y wheiggoo laa as feed jeh mee Elul, ayns daa laa jeig as da-eed.

¹⁶ As haink eh gy-kione, tra cheayll ooilley nyn noidyn jeh shoh, as tra honnick ny ashoonee va mygeayrt-y-mooin, kys hie shin er, chaill ad dy bollagh nyn gree: son hoig ad, dy row laue yn Jee ain ’syn obbyr shoh.

¹⁷ Mysh y traa shen myrgeddin hie screeuyn er screeuyn eddyr mooaralee Yudah as Tobiah:

¹⁸ Son va ymmodee ayns Judah ayns conaant rish, er-yn-oyr dy row eh cleuin Shechaniah mac Arah; as va e vac Johanan er phoosey inneen Meshullam, mac Berechiah.

¹⁹ Myrgeddin loayr ad dy mie jeh kiongoyrt rhym, as hoilshee ad my ghoan’s dasyn; as hug Tobiah ny screeuyn shoh dy my agglaghey.