Nehemiah 5 - Yn Vible Casherick 1775 1819

CAB. V

¹ As hug ny deiney, as ny mraane oc stiagh plaiynt trome noi nyn mraaraghyn ny Hewnyn.

² Son dooyrt paart jeu. Ta shin hene, nyn mec, as nyn inneenyn ymmodee; ta shin, er-y-fa shen êginit dy choonrey ad son arroo, dy vod mayd gee as ve bio.

³ Dooyrt paart myrgeddin, Ta shin er choyrt yn thalloo ain, ny garaghyn-feeyney, as ny thieyn ain gioal, dy chionnaghey arroo, kyndagh rish y ghortey.

⁴ Dooyrt feallagh elley neesht, Ta shin er eeasagh argid son keesh y ree, as shen er nyn magheryn, as nyn garaghyn-feeyney.

⁵ Ga dy vel yn eill ain myr feill nyn mraaraghyn, yn chloan ain myr y chloan ocsyn, as cur-my-ner, ta shin cur lhien ny mec as ny inneenyn ain fo bondiaght, dy ve sharvaantyn; as ta paart jeh ny inneenyn ain hannah fo bondiaght, chamoo te ayns nyn booar dy eaysley ad: son ta’n thalloo, as ny garaghyn-feeyney ain ec deiney elley.

⁶ As ghow mee feer olk rish, tra cheayll mee yn plaiynt oc, as ny goan shoh.

⁷ Eisht smooinee mee rhym pene, as hug mee oghsan da ny ard-gheiney, as ny fir-reill, as dooyrt mee roo, Ta shiu troggal use neu-lowal, dagh dooinney jeh e vraar. As ghreinnee mee yn chaglym mooar dy leih nyn ’oï.

⁸ As dooyrt mee roo, Ta shinyn, rere nyn booar, er veaysley nyn mraaraghyn ny Hewnyn, va creckit rish ny ashoonee: as jean shiuish eer nyn mraaraghyn y chreck dooinyn dy eaysley ad? Er shoh v’ad nyn dhost, as cha row fockle oc dy ghra.

⁹ Dooyrt mee ny-sodjey, Cha vel shiu jannoo dy mie, nagh lhisagh shiu gimmeeaght ayns aggle yn Jee ain, kyndagh rish oltooan ny ashoonee nyn noidyn?

¹⁰ Ta mish myrgeddin, as my vraaraghyn, as my vooinjer er lhiggey voïn argid as arroo gyn use: ta mee guee erriu, lhig dooin lhiggey sheese yn use shoh.

¹¹ Cur-jee daue reesht, ta mee guee erriu, er yn eer laa shoh, yn thalloo oc, ny garaghyn-feeyney, ny garaghyn-olive, as ny thieyn oc: myrgeddin yn cheeadoo ayrn jeh’n argid, as jeh’n arroo, yn feeyn, as yn ooil ta shiu dy hroggal jeu.

¹² Eisht dooyrt ad, Ver mayd daue ad, as cha drog mayd nhee erbee jeu; nee mayd myr t’ou dy ghra; Eisht deïe mee er ny saggyrtyn, as hug mee ad fo breearrey, dy jinnagh ad cordail rish y yialdyn shoh.

¹³ Eisht chrie mee my aght, as dooyrt mee, Er yn aght cheddin, dy grie Jee dy chooilley ghooinney veih e hie, as veih e chooid, nagh vel cooilleeney shoh e yialdyn; dy bee eh eer myr shoh criht magh as folmit. As dreggyr ooilley’n pobble, Amen, as hug ad moylley da’n Chiarn. As ren y pobble cordail rish y yialdyn shoh.

¹⁴ Nish, er-dyn traa va mee pointit dy ve my chiannoort orroo ayns cheer Yudah, veih’n feedoo vleïn, eer gys y nah vleïn yeig as feed jeh reill Artaxerxes y ree, ta shen, daa vleïn jeig, cha vel mish, ny my vraaraghyn, er n’ee lowance y chiannoort.

¹⁵ Agh ny kiannoortyn va roym, v’ad errey trome er y pobble, as er hroggal jeu arran as feeyn, marish da-eed shekel dy argid, ren eer ny sharvaantyn oc tranlaase er y theay: agh cha ren mish myr shen, son dy row mee fo aggle Yee.

¹⁶ Ren mee myrgeddin tannaghtyn kinjagh ayns obbyr y voalley shoh, chamoo chionnee shin veg y thalloo: as va ooilley my vooinjer er nyn jaglym cooidjagh gys yn obbyr.

¹⁷ Ny-sodjey, va ec my voayrd shiaght-feed as jeih jeh ny Hewnyn as fir-reill, cheu-mooie jeusyn haink hooin, veih ny ashoonee mygeayrt-y-mooin.

¹⁸ Nish shen v’er ny aarlaghey er my hon gagh laa, va un dow, as shey reih kirree; va eeanlee myrgeddin er nyn aarlaghey er my hon, as keayrt ayns jeih laa, stoyr jeh dy chooilley horch dy feeyn: agh, son ooilley shoh, cha hrog mee lowance y chiannoort, er-yn-oyr dy row yn errey trome er y pobble.

¹⁹ Smooinee orrym, my Yee, son mie, cordail rish ooilley ny ta mee er n’yannoo son y pobble shoh.