Nehemiah 12 - Yn Vible Casherick 1775 1819

CAB. XII

¹ Nish ad shoh ny saggyrtyn as ny Leviteyn, hie seose marish Zerubbabel mac Shealtiel, as Jeshua: Seraiah, Jeremiah, Ezra,

² Amariah, Malluch, Hattush,

³ Shechaniah, Rehum, Meremoth,

⁴ Iddo, Ginnetho, Abijah,

⁵ Miamin, Madiah, Bilgah,

⁶ Shemaiah, as Joiarib, Jedaiah,

⁷ Sallu, Amok, Hilkiah, Jedaiah: ad shoh va ard-gheiney mastey ny saggyrtyn, as nyn mraaraghyn, ayns laghyn Yeshua.

⁸ Myrgeddin ny Leviteyn: Jeshua, Binnui, Kadmiel, Sherebiah, Judah, as Mattaniah, va harrish y chiaulleeaght dy wooise, eh-hene as e vraaraghyn.

⁹ Myrgeddin Bakbukiah, as Unni nyn mraaraghyn goaill nyn goorse, ayns ny watchyn.

¹⁰ As hooar Jeshua Joiakim, hooar Joiakim myrgeddin Eliashib, as hooar Eliashib Joiada,

¹¹ As hooar Joiada Jonathan, as hooar Jonathan Jaddua.

¹² As ayns laghyn Joiakim, va saggyrtyn ny ard-ayraghyn: jeh Seraiah va Meraiah: jeh Jeremiah va Hananiah:

¹³ Jeh Ezra va Meshullam: jeh Amariah Jehohanan:

¹⁴ Jeh Melicu, Jonathan: jeh Shebaniah, Joseph:

¹⁵ Jeh Harim, Adna: jeh Meraioth, Helkai:

¹⁶ Jeh Iddo, Zechariah: jeh Ginnethon, Meshullam:

¹⁷ Jeh Abijah, Zichri: jeh Miniamin mac Moadiah, Piltai:

¹⁸ Jeh Bilgah, Shammua: jeh Shemaiah, Jehonathan:

¹⁹ As jeh Joiarib, Mattenai: jeh Jedaiah, Uzzi:

²⁰ Jeh Sallai, Kallai: jeh Amok, Eber:

²¹ Jeh Hilkiah, Hashabiah: jeh Jedaiah, Nethaneel.

²² Va ny Leviteyn ayns laghyn Eliashib, Joiada, as Johanan, as Jaddua, ny ayraghyn er recort: myrgeddin ny saggyrtyn, gys reill Darius y Persian.

²³ Va ard-ayraghyn, mec Levi, scruit ayns lioar ny traaghyn, eer gys laghyn Yohanan, mac Eliashib.

²⁴ As ny ard Leviteyn: Hashabiah, Sherebiah, as Jeshua mac Kadmiel, marish nyn mraaraghyn, fer lurg fer, dy choyrt moylley as booise ayns nyn goorseyn, cordail rish oardagh Ghavid yn dooinney dy Yee.

²⁵ Mattaniah, as Bakbukiah, Obadiah, Meshullam, Talmon, Akkub, va ny porteryn freayll arrey ec ny giattyn.

²⁶ V’ad shoh ayns lhing Yoiakim, mac Yeshua, mac Yozadak, as ayns lhing Nehemiah yn kiannoort, as Ezra yn saggyrt, yn scrudeyr.

²⁷ As ry-hoi casherickey, voalley Yerusalem, hug ad fys er ny Leviteyn, dy heet veih ooilley nyn gummallyn gys Jerusalem, dy reayll yn feailley dy chasherickys lesh gennallys, chammah lesh toyrt-booise, as lesh jannoo bingys lesh ny cymballyn, psaltereeyn, as claasaghyn.

²⁸ As haggil mec ny fir-chiaullee ad-hene cooidjagh, chammah ass y cheer mygeayrt Jerusalem, as veih baljyn-cheerey Netophathi.

²⁹ Myrgeddin, veih thie Gilgal, as veih magheryn Geba, as Azmaveth: son va ny fir-chiaullee er hroggal daue hene baljyn-cheerey mygeayrt Jerusalem.

³⁰ As ren ny saggyrtyn as ny Leviteyn casherickey ad-hene, as y pobble, as ny giattyn, as y voalley.

³¹ Eisht hug mee lhiam seose princeyn Yudah er y voalley, as phoint mee daa heshaght vooar dy choyrt booise, yn derrey ayrn jeu hie gys y laue yesh er y voalley, lesh giat yn eoylley:

³² As mâroosyn hie Hoshaiah, as lieh jeh princeyn Yudah,

³³ As Azariah, Ezra, as Meshullam,

³⁴ Judah, as Benjamin, as Shemaiah, as Jeremiah,

³⁵ As sheshaght jeh mec ny saggyrtyn lesh trumpetyn: v’ad shoh, Zechariah mac Yonathan, mac Shemaiah, mac Vattaniah, mac Vicaiah, mac Zaccur, mac Asaph:

³⁶ As e vraaraghyn, Shemaiah, as Azarael, Milalai, Gilalai, Maai, Nethaneel, as Judah, Hanani lesh greïnyn-kiaullee Ghavid yn dooinney dy Yee, as Ezra yn scrudeyr rhymboo.

³⁷ As ec giat y farrane va er y cheu elley, hie ad seose liorish greeishyn ard-valley Ghavid, gys mullagh y voalley, erskyn thie Ghavid, eer gys giat yn ushtey lesh y shiar.

³⁸ As hie yn cheshaght elley va dy choyrt booise er y cheu elley, as mish geiyrt orroo, as y derrey lieh jeh’n pobble er y voalley veih cheu elley jeh toor ny coirraghyn, eer gys y voalley lhean:

³⁹ As ny-sodjey seose na giat Ephraim, as erskyn y chenn yiat, as erskyn giat ny eeastee, as toor Hananeel, as toor Veah, eer gys giat ny geyrragh; as hass ad ayns giat y phryssoon.

⁴⁰ Shoh myr hass yn daa heshaght jeusyn hug booise ayns thie Yee, as mish as y derrey lieh jeh thie ny fir-reill mârym:

⁴¹ As ny saggyrtyn; Eliakim, Maaseiah, Miniamin, Michaiah, Elioenai, Zechariah, as Hananiah lesh trumpetyn:

⁴² As Maaseiah, as Shemaiah, as Eleazar, as Uzzi, as Jehohanan, as Malchijah, as Elam, as Ezer: as hrog ny fir-chiaullee nyn goraa seose dy ard, marish Jezrahiah, va harrystoo.

⁴³ Er yn laa shen myrgeddin heb ad ymmodee ourallyn mooarey, as ghow ad boggey; son va Jee er gherjaghey nyn greeaghyn lesh ard-voggey; va boggey myrgeddin er ny mraane as y chloan: myr shen dy row kiaull gerjoil Yerusalem er ny chlashtyn, foddey as gerrit.

⁴⁴ Ec y traa shen, va paart pointit harrish ny shamyryn, son ny tashtaghyn, son ny chebballyn, son ny chied-vessyn, as son ny jagheenyn, dy haglym stiagh ayndoo ass magheryn ny ard-valjyn, ny keeshyn cordail rish y leigh, da ny saggyrtyn as Leviteyn: son ghow Judah boggey jeh ny saggyrtyn as Leviteyn ny shirveishee.

⁴⁵ As ren chammah ny fir-chiaullee, as ny porteryn freayll currym y Jee oc, as y currym dy chummal seose casherickys y chiamble, cordail rish oardagh Ghavid, as Solomon e vac.

⁴⁶ Son ayns laghyn Ghavid as Asaph ’sy chenn earish, va mainshtyryn harrish ny fir-chiaullee, ayns ny arraneyn oc dy voylley as toyrt-booise gys Jee.

⁴⁷ As hug ooilley Israel ayns laghyn Zerubbabel, as ayns laghyn Nehemiah nyn lowance da ny fir-chiaullee, as da porteryn ny giattyn cour y laa, as hrog ad ny keeshyn casherick da ny Leviteyn, as hug ny Leviteyn ad dy lhiattee son cloan Aaron.