Nehemiah 11 - Yn Vible Casherick 1775 1819

CAB. XI

¹ As va fir-reill y pobble cummal ayns Jerusalem: hilg yn chooid elley jeh’n pobble lottyn, dy chur lhieu dy chooilley yeihoo ghooinney dy vaghey ayns Jerusalem yn ard-valley casherick, as nuy ayrnyn dy vaghey ayns ny ard-valjyn elley.

² As vannee yn pobble ooilley ny deiney, heb ad-hene dy arryltagh, dy chummal ayns Jerusalem.

³ Nish ad shoh ard-gheiney yn rheam, va cummal ayns Jerusalem: agh ayns ard-valjyn Yudah, va dagh unnane ayns e chummal ayns ny ard-valjyn oc; ta shen, Israel, ny saggyrtyn, as ny Leviteyn, as ny Nethinimee, as cloan fir-oik Solomon.

⁴ As va cummal ec Jerusalem paart jeh cloan Yudah, as jeh cloan Venjamin: jeh cloan Yudah; Athaiah mac Uzziah, mac Zechariah, mac Amariah, mac Shephatiah, mac Mahalaleel, jeh cloan Pherez;

⁵ As Maaseiah, mac Baruch, mac Col-hozeh, mac Hazaiah, mac Adaiah, mac Joiarib, mac Zechariah, mac Shiloni.

⁶ As va ooilley mec Pherez, va cummal ec Jerusalem, kiare cheead three-feed as hoght dy gheiney dunnal.

⁷ As ad shoh mec Venjamin; Sallu mac Meshullam, mac Joed, mac Pedaiah, mac Kolaiah, mac Maaseiah, mac Ithiel, mac Yesaiah.

⁸ As ny lurg-syn Gabbai, Sallai, nuy cheead as hoght as feed.

⁹ As va Joel mac Zichri soit harrystoo; as Judah mac Senuah va’n nah er-oik harrish yn ard-valley.

¹⁰ Jeh ny saggyrtyn: Jedaiah mac Joiarib, Jachin.

¹¹ Seraiah, mac Hilkiah, mac Meshullam, mac Zadok, mac Meraioth, mac Ahitub, va ny er-reill harrish thie Yee.

¹² As va nyn mraaraghyn va mysh obbyr y thie, hoght cheead as jees as feed: as Adaiah mac Yeroham, mac Pelaliah, mac Amzi, mac Zechariah, mac Pashur, mac Malchiah,

¹³ As e vraaraghyn, ard-gheiney ny ayraghyn, daa cheead as jees as da-eed: as Amashai, mac Azareel, mac Ahasai, mac Meshillemoth, mac Immer,

¹⁴ As nyn mraaraghyn deiney dunnal caggee, shey-feed as hoght: as va Zabdiel, mac fer jeh ny ard-gheiney soit harrystoo.

¹⁵ Myrgeddin jeh ny Leviteyn: Shemaiah, mac Hashub, mac Azrikam, mac Hashabiah, mac Bunni.

¹⁶ As va ec Shabbethai, as Jozabad ny ard Leviteyn yn currym harrish obbyr mooie thie Yee.

¹⁷ As Mattaniah, mac Vicha, mac Zabdi, mac Asaph, va’n ard-er, dy gholl lesh ny arraneyn-moyllee ayns padjer: as Bakbukiah yn nah er mastey e vraaraghyn, as Abda, mac Shammua, mac Galal, mac Yeduthun.

¹⁸ Va ooilley ny Leviteyn, ’syn ard-valley casherick, daa cheead kiare-feed as kiare.

¹⁹ Ny-sodjey, va porteryn ny giattyn Akkub, Talmon as e vraaraghyn hoght-feed as ghaa-yeig.

²⁰ As va’n chooid elley jeh Israel, jeh ny saggyrtyn, as ny Leviteyn, ayns ooilley ard-valjyn Yudah, dagh unnane ayns e eiraght.

²¹ Agh va ny Nethinimee cummal ayns Ophel: as va Ziha as Gispa harrish ny Nethinimee.

²² Va eshyn myrgeddin, va harrish ny Leviteyn ec Jerusalem, Uzzi, mac Bani, mac Hashabiah, mac Vattaniah, mac Vicha: jeh mec Asaph, va ny fir-chiaullee dy ghoaill kiarail jeh thie Yee.

²³ Son ve sarey’n ree mychione oc, dy beagh lowance kinjagh son ny fir-chiaullee, cour dagh laa.

²⁴ As va Pethahiah mac Meshezabeel jeh cloan Zerah, mac Yudah, ec laue yn ree, ayns dy chooilley chooish mychione y pobble,

²⁵ As mychione ny baljyn-cheerey, as ny magheryn oc, ren paart jeh cloan Yudah cummal ec Kirjath-arba as e baljyn; as ec Dibon as e baljyn, as ec Jekabzeel as e baljyn,

²⁶ As ec Jeshua, as ec Moladah, as ec Beth-phelet,

²⁷ As ec Hazar-shual, as ec Beer-sheba as e baljyn,

²⁸ As ec Ziklag, as Mekonah, as nyn maljyn,

²⁹ As ec En-rimmon, as ec Zareah, as ec Jarmuth,

³⁰ Zanoah, Adullam, as ny baljyn oc, ec Lachish as e magheryn, ec Azekah as e baljyn. As ren ad cummal veih Beer-sheba gys coan Hinnom.

³¹ Ren cloan Venjamin myrgeddin veih Geba, cummal ec Michmash, Aija, as Beth-el, as ayns nyn maljyn,

³² As ec Anathoth, Nob Ananiah,

³³ Hazor, Rama, Gittaim,

³⁴ Hadid, Zeboim, Neballat,

³⁵ Lod, as Ono, cloan ny fir-cheirdee.

³⁶ As va ny Leviteyn er ny rheynn eddyr Judah as Benjamin.