Micah 3 - Yn Vible Casherick 1775 1819

CAB. III

¹ As dooyrt mish, clasht-jee, ta mee guee erriu, O shiuish leeideilee Yacob, as shiuish phrinceyn thie Israel, nagh vel eh bentyn diuish dy hoiggal briwnys?

² Ta dwoaie eu er yn vie, as graih eu er yn olk, ta speeiney nyn grackan jeu, as scryssey yn eill oc veih nyn graueyn.

³ Ta myrgeddin gee feill my phobble, as fanney jeu nyn grackan, as t’ad brishey nyn graueyn, as broo ad ayns peeshyn, myr son y phot, as myr feill ayns y choirrey.

⁴ Eisht nee ad geamagh gys y Chiarn, agh cha jean eh ad y chlashtyn: nee eh dy jarroo e eddin y cheiltyn voue ec y traa shen, myr t’ad er n’ymmyrkey ad-hene dy olk ayns nyn yannoo.

⁵ Myr shoh ta’n Chiarn dy ghra mychione ny phadeyryn, ta coyrt shaghrynys er my phobble, ta lhottey lesh nyn veeacklyn, as fockley magh, Shee: as dy jarroo t’ad jannoo ad-hene aarloo gys caggey, noi eshyn nagh vel er lhieeney nyn meeal.

⁶ Shen-y-fa bee shiu ayns dorraghys, nagh bee ashlish eu, as bee shiu ayns dooid, nagh vod shiu phadeyrys, as hed y ghrian sheese er ny phadeyryn, as bee yn laa dorraghey er-nyn-skyn.

⁷ Eisht, bee ny fakyderyn, naareydagh, as ny phadeyryn ec kione nyn geiley: dy jarroo, nee ad ooilley coodaghey nyn meillyn, son nagh vel ansoor oc veih Jee.

⁸ Agh dy firrinagh ta mish ayns slane bree liorish spyrryd y Chiarn, as lesh briwnys, as lesh niart, dy hoilshaghey da Jacob e vee-chairys, as da Israel e pheccah.

⁹ Eaisht-jee rish shoh, ta mee guee erriu, shiuish leeideilee thie Yacob, as princeyn thie Israel, ta dwoaiagh er briwnys, as cassey dy chooilley chairys.

¹⁰ T’ad troggal Zion lesh fuill, as Jerusalem lesh mee-chairys.

¹¹ Ta ny briwnyn eck briwnys son leagh, as ny saggyrtyn eck gynsagh son faill, as ny phadeyryn eck phadeyrys son argid: ny-yeih t’ad goaill orroo dy ve ass lieh yn Chiarn, as gra, Nagh vel y Chiarn ny mast’ ain? cha jig olk erbee orrin.

¹² Shen-y-fa kyndagh riuish bee Zion er ny hraaue myr magher, as hig Jerusalem dy ve carnaneyn, as bee slieau yn chiamble myr ard-aasaghyn ny keylley.