Micah 2 - Yn Vible Casherick 1775 1819

CAB. II

¹ Smerg dauesyn ta shêgin er mee-chairys, as smooinaghtyn er yn olk er nyn lhiabbaghyn! cha leah’s ta’n moghrey soilshaghey t’ad cur rish, er-yn-oyr dy vel eh ayns pooar nyn laue.

² As t’ad coyrt saynt da magheryn, as goaill ad er niart; as da thieyn, as goaill daue hene ad: myr shen t’ad roostey dooinney as e hie, dy jarroo dooinney as e eiraght.

³ Shen-y-fa shoh myr ta’n Chiarn dy ghra, Cur-my-ner noi yn lught-thie shoh, ta mee kiarail olk, voish cha vod shiu shaghney nyn mwannallyn, chamoo hed shiu dy mooaralagh: son ta’n imbagh shoh seaghnagh.

⁴ Ayns y laa shen nee fer goaill seose coraa-dorraghey nyn ’oï, as nee eh dobberan lesh dobberan hrimshagh, as jir eh, Ta shin dy bollagh spooillit: t’eh er chaghlaa eiraght my phobble: kys t’eh er scughey foddey voym eh! caghlaa yn chagliagh t’eh er rheynn nyn magheryn.

⁵ Shen-y-fa, cha bee unnane ayd, nee coyrd cronney y hayrn er dty hon’s, ayns co-chruinnaght y Chiarn.

⁶ Ny jean-jee phadeyrys, jir ad roosyn ta phadeyrys: cha jean ad phadeyrys daue, nagh gow ad nearey.

⁷ O uss ta enmyssit thie Yacob, vel spyrryd y Chiarn er ny leodaghey? nee shoh yn jannoo echeysyn? nagh vel my ghoan jannoo mie dasyn ta gimmeeaght dy cairal?

⁸ Dy jarroo er y gherrit shoh ta my phobble er n’irree seose myr noid: ta shiu roostey yn coamrey, as y garmad jeh ny troailtee sheeoil, sleih nagh vel son caggey.

⁹ Ta shiu er n’eebyrt mraane my phobble ass nyn dhieyn aalin, veih nyn gloan ta shiu er n’ghoaill ersooyl my ghloyr son dy bragh.

¹⁰ Trog-jee erriu, as gow-jee reue, son cha nee shoh yn ynnyd-vaghee eu: er-yn-oyr dy vel eh neu-ghlen, nee eh shiu y stroie lesh stroialtys seiyjagh.

¹¹ My ta dooinney gimmeeaght ayns spyrryd dy oalsaght, cur rish breagyn, gra, Nee’m phadeyrys dhyt mychione feeyn as jough lajer; bee eshyn eer phadeyr yn phobble shoh.

¹² Nee’m, son shickyrys, chaglym, O Yacob, dagh unnane jeed: nee’m dy firrinagh chaglym fooilliagh Israel, ver-ym lhiam ad cooidjagh myr kirree Vozrah, myr shioltane ayns mean nyn mwoaillee, nee ad feiyr mooar y yannoo son ny earrooyn dy leih.

¹³ Ta’n brisheyder er jeet seose rhymboo: t’ad feayshlit, as er n’gholl trooid y yiat, as er n’immeeaght magh er, as hed yn ree oc rhymboo, as bee yn Chiarn nyn leeideilagh.