Micah 1 - Yn Vible Casherick 1775 1819

CAB. I

¹ Shoh goo yn Chiarn haink gys Micah yn Morasthite rish lhing Yotham, Ahaz, as Hezekiah, reeaghyn Yudah, shen honnick eh mychione Samaria as Jerusalem.

² Clasht-jee, ooilley shiuish phobble: eaisht, O halloo, as ooilley ny t’ayn: as lhig da’n Chiarn Jee ve feanish nyn ’oï, eer y Chiarn voish e hiamble casherick.

³ Son cur-my-ner, ta’n Chiarn cheet ass e ynnyd, as hig eh sheese, as shooylee eh er ynnydyn ard y thallooin.

⁴ As fosyn bee ny sleityn lheït as scoltaghyn ayns ny coanyn; myr kere-volley roish yn aile, as myr ny ushtaghyn ta roie sheese lesh yn eaynee.

⁵ Kyndagh rish shaghrynys Yacob ta ooilley shoh, as kyndagh rish peccaghyn thie Israel. Cre ta oyr shaghrynys Yacob? nagh nee Samaria? as cre ta oyr peccah Yudah? nagh nee Jerusalem?

⁶ Er-y-fa shen, nee’m Samaria y yannoo myr carnaneyn ayns magher traaueit, as myr smooirlagh y gharey-feeyney: as lhieg-yms sheese ny claghyn echey ayns y choan, as nee’m ny undinyn echey y hilgey bun-ry-skyn.

⁷ As bee ooilley ny jallooyn grainnit eck bwoailt ayns peeshyn, as bee ooilley yn cosney eck losht ’syn aile, as ooilley ny jallooyn eck nee’m y stroie: son ren ee ad y chosney lesh faill streebagh, as gys faill streebagh nee ad reesht chyndaa.

⁸ Shen-y-fa neem’s dobberan as keayney, hem rooisht as gyn eaddagh: nee’m gullal myr ny dragonyn, as cooagey myr ny hulladyn.

⁹ Son ta’n lhott eck gyn couyr; son te er roshtyn eer er Judah: t’eh er jeet gys giat my phobble, dy jarroo gys Jerusalem.

¹⁰ Ny insh-jee shoh ec Gath, ny jean-jee keayney edyr: ayns thie Aphrah jean oo hene y ymmylt ’sy joan.

¹¹ Royd oo, uss chummaltagh Saphir, lesh dty nearey rooisht: cha daink cummaltagh Zaanan magh ayns dobberan Veth-ezel; ga dy nee veueish haink e niart.

¹² Son ren cummaltagh Varoth farkiaght dy jeidjagh son kemmyrk; agh haink yn olk veih yn Chiarn gys giat Yerusalem.

¹³ O uss chummaltagh Lachish, yok-jee yn ainagh gys y baagh gastey: t’eeish bun peccah gys inneen Zion: son va mee-viallys Israel er ny gheddyn aynyd.

¹⁴ Shen-y-fa ver oo giootyn da Moresheth-gath: bee thieyn Achzib ny vreg da reeaghyn Israel.

¹⁵ Foast ver-ym lhiam eirey ort’s, O chummaltagh Vareshah: hig eh gys Adullam, gloyr Israel.

¹⁶ Jean oo hene meayl, as oo hene y vaarey son dty chloan dendeasagh; bee oo speeint myr yn urley ta coayl e edjagyn; son t’ad er n’gholl ayns cappeeys voïd.