Malachi 2 - Yn Vible Casherick 1775 1819

CAB. II

¹ As nish O shiuish haggyrtyn, diuish ta’n sarey shoh.

² Mannagh jean shiu clashtyn, mannagh gow shiu gys nyn gree eh, dy ghloyraghey my ennym’s, ver-ym eer mollaght erriu, as ver-ym mollaght er ny bannaghtyn eu; lioar, ta mee hannah er chur mollaght orroo, er-yn-oyr nagh vel shiu goaill eh gys nyn gree.

³ Cur-jee my-ner, mhill-yms nyn arroo-correy, as skeayl-yms eoylley er yn eddin eu, eer gaerr ny feaillaghyn casherick eu, as bee shiuish tilgit magh mârish.

⁴ As bee fys eu, dy vel mish er chur yn sarey shoh diu, dy reayll my chonaant rish Levi, ta’n Chiarn Jee ny flaunyssee, dy ghra.

⁵ Rishyn va my chonaant dy vea as shee; dasyn hug mee ad, son yn arrym, lesh v’eh arrymagh dou, as e aggle roish my ennym.

⁶ Va’n leigh dy ynrickys ayns e veeal, as cha row loght er ny gheddyn ayns e veillyn: jimmee eh mârym’s ayns shee as cairys, as hyndaa eh ymmodee veih mee-chairys.

⁷ Son lhisagh meillyn ny saggyrtyn freayll tushtey, as lhisagh ad shirrey yn leigh ec e veeal, son eshyn chaghter Chiarn ny flaunyssee.

⁸ Agh ta shiuish er-shaghryn veih’n raad, ta shiu er chur er ymmodee dy leaystey ayns y leigh, ta shiu er rassey conaant Levi, ta’n Chiarn, Jee ny flaunyssee, dy ghra.

⁹ Er-y-fa shen, ta mish myrgeddin er n’yannoo beg dy ve soit j’iu, as er n’injillaghey shiu roish y pobble; eer myr nagh vel shiuish er reayll my raaidyn, agh er n’yannoo soiaghey jeh persoonyn ayns y leigh.

¹⁰ Nagh vel yn un ayr ain ooilley? nagh vel yn un Jee er chroo shin? cre’n-fa ta shin dellal dy molteyragh dy chooilley ghooinney rish e vraar? liorish brishey conaant nyn ayraghyn.

¹¹ Ta Judah er ghellal dy foalsey, as ta peccah eajee jeant ayns Israel as ayns Jerusalem, son ta Judah er hayrn scammylt er casherickys y Chiarn, shen bynney lesh, as er phoosey inneen Yee quaagh.

¹² Giaree yn Chiarn jeh yn dooinney ta jannoo shoh, yn mainshtyr, as y schoillar ass cabbaneyn Yacob, as eshyn ta chebbal oural gys Chiarn ny flaunyssee.

¹³ As shoh ta shiu er n’yannoo myrgeddin, coodaghey altar y Chiarn lesh jeïr, lesh dobberan, as lesh osnaghyn; ayns wheesh as nagh vel eh soiaghey jeh nyn ourallyn ny smoo, chamoo t’eh goaill eh lesh aigney-mie ec nyn laueyn.

¹⁴ Foast ta shiuish gra, Cre’n-oyr? er-yn-oyr dy vel y Chiarn er ve feanish eddyr uss as ben dty aegid, noi eck t’ou er ghellal dy foalsey: foast she dty heshey ee, as ben dty vreearrey.

¹⁵ As nagh ren eh croo agh unnane? ga dy row pooar sodjey echey; as cre’n-fa unnane? agh dy gheddyn sluight chrauee: gow-jee er-y-fa shen tastey jeh nyn spyrryd, as ny lhig da fer erbee dellal dy molteyragh noi ben e aegid.

¹⁶ Son ta’n Chiarn Jee Israel gra, dy vel dwoaie echey er scarrey; son ta fer coodaghey tranlaase lesh e gharmad, ta Chiarn ny flaunyssee dy ghra: shen-y-fa smaghtee-jee nyn yeearreeyn, nagh jean shiu dellal dy molteyragh.

¹⁷ Ta shiu er n’yannoo skee jeh’n Chiarn, lesh ny goan eu: foast ta shiu gra, Cre ayn ta shin er n’yannoo skee jeh? Tra ta shiu gra, Dy vel dy chooilley unnane ta cur-rish olk, mie ayns shilley yn Chiarn, as dy vel taitnys echey ayndoo; er aght elley, Cre vel yn Jee dy vriwnys?