Leviticus 7 - Yn Vible Casherick 1775 1819

CAB. VII

¹ Shoh myrgeddin leigh yn oural-loght: te ard casherick.

² ’Syn ynnyd raad t’ad marroo yn oural-losht, nee ad marroo yn oural-loght: as yn uill nee eh spreih mygeayrt er yn altar.

³ As jeh nee eh chebbal ooilley yn eeh, yn curpin, as yn eeh ta coodaghey yn mynnagh.

⁴ As yn daa aarey, as yn eeh t’orroo, liorish ny shleaystyn, as y skairt erskyn yn aane, marish ny aaraghyn, shen nee eh goaill ersooyl.

⁵ As nee yn saggyrt lostey ad er yn altar, son oural jeant lesh aile gys y Chiarn: te son oural-loght.

⁶ Nee dy chooilley mac dooinney mastey ny saggyrtyn gee jeh: bee eh er ny ee ’syn ynnyd casherick: te ard casherick.

⁷ Myr ta’n oural-peccah, shen myr ta’n oural-loght; yn un leigh ta daue ny-neesht: te cair y taggyrt ta jannoo lhiasaghey lesh.

⁸ As yn saggyrt ta chebbal oural-losht son dooinney erbee, bee crackan yn oural-losht, t’eh dy hebbal, lesh hene.

⁹ As ooilley yn oural-arran, t’er ny aarlaghey ’syn oghe, as ooilley ny ta aarlit ’sy frynepan, as ayns y phan, bee eh lesh y taggyrt ta dy hebbal eh.

¹⁰ As dagh oural-arran, ta ooil ny chione, ny chirrym, bee eh co-chorrym mastey ooilley mec Aaron.

¹¹ As shoh’n leigh mychione chebbal casherick ny ourallyn-shee, nee eh chebbal gys y Chiarn.

¹² My t’eh chebbal eh son toyrt-booise, eisht nee eh chebbal, marish yn oural dy wooise, keeakyn gyn soorit jeant lesh ooil, as lesh waferyn gyn soorit, slaiyt lesh ooil, as keeakyn jeant lesh ooil, dy flooyr meein, er nyn fryal.

¹³ Marish ny keeakyn, nee eh chebbal son yn oural echey, arran soorit, lesh oural-booise e hebballyn-shee.

¹⁴ As jeh shen, nee eh chebbal un cheeak, ass yn slane oural, son chebbal-troggit seose gys y Chiarn: as bee shen lesh y taggyrt ta spreih fuill ny ourallyn-shee.

¹⁵ As bee feill ny ourallyn-shee echey son toyrt-booise, er ny ee yn laa cheddin te chebbit: cha bee veg jeh faagit gys y voghrey.

¹⁶ Agh my she son cooilleeney breearrey, ny son oural-arryltagh vees y chebbal echey, bee shen er ny ee er y laa cheddin: as er y laa er-giyn neesht bee ny vees er-mayrn jeh er ny ee.

¹⁷ Agh bee ny vees er-mayrn jeh feill yn oural er y trass laa, er ny lostey ’syn aile.

¹⁸ As my vees veg jeh feill e ourallyn-shee er ny ee er y trass laa, cha bee soiagh jeant jeh, chamoo vees eh gys veg y vondeish dasyn ta dy hebbal eh: te red mollaghtagh, quoi-erbee ee-ys jeh, nee eh gymmyrkey e loght.

¹⁹ As yn eill ta bentyn rish red erbee neu-ghlen, cha bee eh er ny ee; bee eh er ny lostey ’syn aile: as er son yn eill, nee ooilley ny ta glen gee jeh.

²⁰ As eshyn ta gee feill ny ourallyn-shee, ta chebbit gys y Chiarn, as eh fo e neu-ghlennid, bee’n annym shen er ny yiarey jeh veih e phobble.

²¹ Marish shoh, yn persoon shen vennys rish neu-ghlennid dooinney, ny baagh, ny rish neu-ghlennid dwoaiagh erbee elley, as ee-ys jeh feill ny ourallyn-shee ta chebbit gys y Chiarn, bee’n annym shen er ny stroie veih e phobble.

²² As loayr y Chiarn rish Moses, gra,

²³ Loayr rish cloan Israel, gra, Eeh dow, ny keyrrey, ny goayr, cha jean shiu gee.

²⁴ As eeh’n baagh ta geddyn baase jeh hene, as yn eeh jeh shen ny ta raipit ec beishtyn, foddee shiu goaill son ymmyd erbee elley: agh cha jean eh mie diu gee jeh.

²⁵ Son fer erbee ta gee jeh eeh yn vaagh ta er ny hebbal son oural-losht gys y Chiarn, bee’n annym shen er ny yiarey jeih veih e phobble.

²⁶ Marish shoh, cha jean shiu gee veg yn uill, edyr eh ve dy eean ny dy vaagh, ayns veg jeh ny cummallyn eu.

²⁷ Quoi-erbee eh nee gee fuill erbee, bee eh er ny yiarey jeh veih e phobble.

²⁸ As loayr y Chiarn rish Moses, gra,

²⁹ Loayr rish cloan Israel, gra, Eshyn ta chebbal ny ourallyn-shee echey gys y Chiarn, ver eh lesh yn oural-arran echey gys y Chiarn, jeh ny ourallyn-shee echey.

³⁰ Ayns e laueyn hene ver eh lesh ourallyn y Chiarn jeant lesh aile, yn eeh marish y vreast ver eh lesh, dy vod y breast ve criht noon as noal, son oural roish y Chiarn.

³¹ As nee’n saggyrt lostey yn eeh er yn altar: agh bee’n vreast lesh Aaron as e vec.

³² As y clingan yesh nee shiu coyrt da’n saggyrt, oural dy ve criht, jeh chebballyn nyn ourallyn-shee.

³³ Eshyn mastey mec Aaron ta chebbal fuill yn oural-shee, as yn eeh, yiow eh yn clingan yesh da hene.

³⁴ Son y breast criht noon as noal, as y clingan troggit seose, ta mee er ghoaill veih ourallyn-shee chloan Israel, as er choyrt ad da Aaron y saggyrt, as da e vec, liorish slattys kinjagh mastey cloan Israel.

³⁵ Ta shoh ayrn Aaron as e vec, er coontey nyn ooilaghey, veih ourallyn y Chiarn jeant lesh aile er-dyn laa v’ad er nyn gasherickey, dy hirveish gys y Chiarn ayns oik y taggyrtys:

³⁶ Shoh doardee yn Chiarn dy v’er ny choyrt daue, liorish cloan Israel, er y laa ren Moses adsyn y ooilaghey, liorish slattys kinjagh trooid nyn sheelogheyn.

³⁷ Shoh leigh yn oural-losht, yn oural-arran, yn oural-peccah, yn oural-loght, as son oural y chasherickys, as son ny ourallyn-shee;

³⁸ Ad ren y Chiarn y oardaghey da Moses er slieau Sinai, er y laa doardee eh da cloan Israel nyn ourallyn y hebbal gys y Chiarn, ayns faasagh Sinai.