Leviticus 27 - Yn Vible Casherick 1775 1819

CAB. XXVII

¹ As loayr y Chiarn rish Moses, gra,

² Loayr rish cloan Israel, as abbyr roo, Tra ta dooinney jannoo breearrey casherick, bee’n phrice son feaysley ny persoonyn lesh y Chiarn, myr ver uss orroo.

³ As my te son dooinney veih feed gys three-feed bleïn dy eash; bee’n phrice-feaysley echey jeih shekelyn as da-eed dy argid, lurg shekel yn ynnyd casherick.

⁴ As my te son ben, eisht bee eh jeih shekelyn as feed.

⁵ As my vees eh son queig gys feed bleïn dy eash; eisht bee’n phrice son y fyrrynagh feed shekel dy argid, as son y bwoirrynagh jeih shekelyn.

⁶ As my vees eh son mee, gys queig bleeaney dy eash; eisht bee’n phrice son y lhiannoo-mac queig shekelyn dy argid, as son inneen three shekelyn dy argid.

⁷ As my vees eh son three-feed bleïn d’eash, as erskyn: my te son dooinney, bee’n phrice queig shekelyn jeig, as son ben jeih shekelyn.

⁸ Agh mannagh vel fort echey dy eeck y phrice v’er ny choyrt er; eisht hig eh fenish y taggyrt, as nee’n saggyrt price y hoiaghey er: cordail rish y fort echeysyn ren breearrey, ver y saggyrt price er.

⁹ As my she baagh t’ayn, jeh nyn lheid as ta sleih chebbal gys y Chiarn: cre-erbee y lheid ta dooinney dy choyrt da’n Chiarn, bee eh casherick.

¹⁰ Cha jean eh caghlaa, ny coonrey eh, mie son sie, ny sie son mie; as my nee eh coonrey baagh son baagh; eisht bee ad ny-neesht casherick.

¹¹ As my she baagh neu-ghlen t’ayn, nagh vod ve chebbit gys y Chiarn; eisht ver eh lesh y baagh fenish y taggyrt:

¹² As nee’n saggyrt priceil eh, my she mie ny sie te; myr t’ou uss, O haggyrt, coyrt price er, shen myr vees eh.

¹³ As my nee eh feaysley eh; eisht ver eh huggey yn wheiggoo ayrn jeh’n phrice hug uss er.

¹⁴ As tra ta dooinney chebbal e hie dy ve casherick da’n Chiarn; eisht nee’n saggyrt y phriceil eh, my she mie ny sie te: myr nee’n saggyrt priceil eh, shen myr vees eh.

¹⁵ As my ta aigney echeysyn, heb y thie, dy eaysley eh: eisht ver eh yn wheiggoo ayrn jeh’n phrice huggey, as bee eh lesh hene.

¹⁶ As my nee dooinney chebbal da’n Chiarn ayrn jeh magher e eiraght; eisht bee’n phrice cordail rish yn arroo-correy echey; bee homer dy oarn-chorrey er ny phriceil ec jeih shekelyn as da-eed dy argid.

¹⁷ My nee eh chebbal e vagher veih bleïn y jubile, corrym rish y phrice nee eh shassoo.

¹⁸ Agh my t’eh chebbal e vagher lurg y jubile; eisht nee’n saggyrt coontey dasyn yn argid cordail rish ny bleeantyn ta ry-heet, eer derrey bleïn y jubile, as bee wheesh shen er ny ghoaill veih’n phrice.

¹⁹ As my ta aigney echeysyn, ren chebbal y magher, dy eaysley eh; eisht ver eh huggey yn wheiggoo ayrn jeh argid y phrice, as bee eh lesh hene.

²⁰ As mannagh jean eh feaysley yn magher, ny’n magher ve creckit rish fer elley; cha bee eh er ny eaysley arragh.

²¹ Agh tra te roie magh ayns y jubile, bee’n magher casherick da’n Chiarn, myr magher fo breearrey: bee’n eiraght echey lesh ny saggyrtyn.

²² As my ta dooinney chebbal da’n Chiarn magher kionnit, nagh vel jeh magheryn e eiraght;

²³ Eisht nee’n saggyrt coontey dasyn yn phrice hug uss er, eer gys bleïn y jubile: as eeckee eh yn phrice er y laa cheddin, myr cooid casherick y Chiarn.

²⁴ Er bleïn y jubile, bee’n magher er ny hyndaa huggeysyn ve kionnit veih, eer huggeysyn, yn eiraght echey ve.

²⁵ As bee dy chooilley phrice jeu shoh cordail rish shekel yn ynnyd casherick: feed gerah gys un shekel.

²⁶ Agh y chied-ruggit jeh’n maase, ta dy ve cairys y Chiarn, cha jean dooinney erbee shen y vreearrey; lhig eh ve dow, ny keyrrey: te hannah lesh y Chiarn.

²⁷ As my te jeh baagh neu-ghlen, eisht nee eshyn geeck er y hon, cordail rish y phrice ver oo er, as ver eh yn wheiggoo ayrn jeh shen huggey, as mannagh bee eh er ny eaysley, eisht bee eh er ny chreck cordail rish y phrice ver oo er.

²⁸ Ny-yeih, cha vod nhee erbee t’er ny chasherickey gys y Chiarn, lhig da ve dooinney ny baagh, ny thalloo-eiraght, ve creckit ny feayshlit: ta dagh nhee fo breearrey, feer casherick gys y Chiarn.

²⁹ Cre-erbee vees [myr shoh] er ny chasherickey gys y Chiarn, cha bee eh er ny eaysley: agh bee eh dy shickyr er ny choyrt gy-baase.

³⁰ As ooilley jaghee’n thallooin, lhig eh ve jeh troar y vagheragh, ny jeh mess ny biljyn, te lesh y Chiarn: te casherick gys y Chiarn.

³¹ As my nee dooinney erbee feaysley veg jeh’n jaghee echey; ver eh yn wheiggoo ayrn jeh ny sheeagh eh lesh.

³² As mychione jaghee yn chelloo, ny’n chioltane, jeh cre-erbee ta cheet fo’n lorg bee’n jeihoo casherick da’n Chiarn.

³³ Cha jean eh briaght, nee mie ny sie te, chamoo nee eh coonrey eh: as my nee eh coonrey eh ec traa erbee, eisht bee shen as y coonrey ny-neesht casherick; cha bee eh er n’eaysley.

³⁴ Shoh ny oardaghyn ren y Chiarn sarey da Moses, son cloan Israel, ayns slieau Sinai.