Leviticus 25 - Yn Vible Casherick 1775 1819

CAB. XXV

¹ As loayr y Chiarn rish Moses, ayns slieau Sinai, gra,

² Loayr rish cloan Israel, as abbyr roo, Tra vees shiu er jeet gys y cheer ta mish dy chur diu, eisht bee doonaght (aash) ec y thalloo, da’n Chiarn.

³ Shey bleeaney nee oo cuirr dty vagher, as shey bleeaney nee oo pollal dty gharey-feeyney, as chaglym stiagh yn mess echey:

⁴ Agh er y chiaghtoo vleïn, vees doonaght dy aash ec y thalloo, doonaght da’n Chiarn: cha jean oo edyr cuirr dty vagher, ny pollal dty gharey-feeyney.

⁵ Shen ny ta gaase jeh hene jeh’n fouyr ayd, cha jean oo buinn, ny chaglym messyn dty villey-feeyney gyn-pollal: son ta shen bleïn dy aash da’n thalloo.

⁶ As bee doonaght y thallooin beaghey diu; dhyt’s, as da dty harvaant, as da dty inney-veyl, as da dty harvaant failt, as da’n joarree ta baghey mayrt,

⁷ As son dt’ollagh as son ny beiyn t’er dty halloo, bee ooilley yn bishagh echey son beaghey.

⁸ As nee uss coontey shiaght dooneeyn dy vleeantyn, shiaght keayrtyn shiaght bleeantyn; as bee earish ny shiaght dooneeyn dy vleeantyn dhyt’s nuy bleeaney as da-eed.

⁹ Eisht nee oo trumpet yn Jubile y heidey, er y jeihoo laa jeh’n chiaghtoo vee; er laa yn lhiasaghey, bee’n trumpet er ny helm trooid y slane cheer eu.

¹⁰ As nee shiu casherickey yn jeihoo vleïn as da-eed, as fockley magh reamys trooid ooilley’n cheer, gys ooilley ny cummaltee eck: bee shen Jubile diu; as nee dy chooilley ghooinney chyndaa gys e eiraght hene, as gys e chynney hene.

¹¹ Jubile vees yn jeihoo vleïn as da-eed shen diuish: cha jean shiu cuirr, ny buinn shen ny ta gaase jeh hene, ny chaglym messyn dty villey-feeyney gyn-pollal.

¹² Son te’n Jubile: bee eh casherick diu: nee shiu gee yn bishagh echey ass y vagher.

¹³ Ayns bleïn y Jubile shoh, nee shiu chyndaa dagh dooinney gys e eiraght.

¹⁴ As my t’ou creck veg rish dty naboo, ny kionnaghey veih laue dty naboo; cha jean shiu tranlaase er y cheilley.

¹⁵ Cordail rish earroo ny bleeantyn lurg y jubile, nee oo kionnaghey veih dty naboo, as cordail rish earroo bleeantyn ny messyn, nee eshyn creck rhyt’s.

¹⁶ Cordail rish earroo ny bleeantyn ta royd, wheesh shen smoo vees y phrice, as my sloo ta ny bleeantyn, my sloo vees y phrice: son lurg earroo bleeantyn ny messyn, t’eh creck rhyt.

¹⁷ Shen-y-fa, cha jean shiu tranlaase er y cheilley; agh nee uss goaill aggle roish dty Yee; son mish y Chiarn y Jee eu.

¹⁸ Shen-y-fa, nee shiu cooilleeney my lattyssyn, as freaylley my vriwnyssyn, as jannoo ad; as nee shiu cummal ’sy cheer ayns sauchys.

¹⁹ As nee’n thalloo gymmyrkey magh e mess, as bee shiu jeant magh dy palchey, as baghey ayn dy sauchey.

²⁰ As my nee shiu gra, Cre nee mayd son beaghey er y chiaghtoo vleïn? cur-my-ner, cha vel shin dy chuirr, ny dy haglym stiagh nyn droar:

²¹ Eisht ver-yms my vannaght erriu, ayns y cheyoo vleïn, as nee shen gymmyrkey mess cour three bleeaney.

²² As nee shiu cuirr er y hoghtoo vleïn, as foast beaghey er y chenn troar, derrey’n nuyoo vleïn; derrey hig y fouyr noa stiagh, nee shiu gee jeh’n chenn stoyr.

²³ Cha jean shiu yn thalloo y chreck son dy bragh: son lhiam’s y thalloo; son cha vel shiu agh myr joarreeyn as jiuleanyn dooys.

²⁴ As ayns ooilley thalloo nyn eiraght, nee shiu lowal reamys-feaysley son y thalloo.

²⁵ My ta dty vraar er jeet dy ve boght, as er chreck ersooyl kuse jeh e eiraght, as my hig veg jeh e chynney dy eaysley eh, eisht bee cairys-feaysley echeysyn jeh shen ny chreck e vraar.

²⁶ As mannagh vel carrey ec y dooinney dy eaysley eh, as eh hene er jeet dy ve fondagh dy eaysley eh;

²⁷ Eisht lhig da coontey ny bleeantyn neayr’s chreck eh eh, as chyndaa reesht ny ta harrish da’n dooinney chionnee eh: dy vod eh hene cheet reesht gys e eiraght.

²⁸ Agh mannagh vel y fort echey dy yannoo shen mie da, eisht, bee shen ny va creckit ayns laue y kionneyder gys bleïn y Jubile: as ayns y Jubile bee eh feayshlit, as nee eh chyndaa gys e eiraght.

²⁹ As my nee dooinney creck thie-vaghee ayns ard-valley voallit; eisht foddee eh shen y eaysley, cheu-sthie jeh slane bleïn lurg da ve creckit: cheu-sthie jeh slane bleïn foddee eh shen y eaysley.

³⁰ As mannagh bee eh er ny eaysley cheu-sthie jeh’n vleïn; eisht bee’n thie t’ayns yn ard-valley voallit leshyn chionnee eh, son dy bragh, trooid e heelogheyn: cha bee eh er ny eaysley ayns y Jubile.

³¹ Agh bee thieyn ny baljyn gyn voallaghyn mygeayrt-y-moo, coontit myr magheryn ny cheerey: bee ad shen er nyn veaysley, as livreit seose ayns y Jubile.

³² Ny-yeih, ard-valjyn ny Leviteyn, as thieyn ard-valjyn yn eiraght ocsyn, foddee ny Leviteyn feaysley ec traa erbee.

³³ As my ta dooinney kionnaghey veih ny Leviteyn; eisht bee’n thie va creckit, ayns ard-valley yn eiraght echey, er ny eaysley ayns bleïn y Jubile: son ta thieyn ard-valjyn ny Leviteyn yn eiraght oc mastey cloan Israel.

³⁴ Agh ny gleebyn, mysh ny ard-valjyn oc, cha vod ve creckit; son shen nyn eiraght shickyr.

³⁵ As my ta dty vraar er jeet dy ve boght, as gyn fort dy chooney lesh hene; eisht nee uss feaysley ’yannoo er: ga dy nee joarree ny troailtagh eh; dy vod eshyn baghey mayrt.

³⁶ Ny trog veg yn use ny bishagh jehsyn: agh gow aggle roish dty Yee: dy vod dty vraar baghey mayrt.

³⁷ Cha der oo dty argid da er use, ny dty veaghey y eeasagh da er-chee dy gheddyn cosney.

³⁸ Mish y Chiarn y Jee eu, hug lhiam shiu magh ass cheer Egypt, dy choyrt diu cheer Chanaan, as dy ve yn Jee eu.

³⁹ As my ta dty vraar ta baghey liort’s er jeet gys boghtynid, as er chreck eh hene rhyt (son beaghey;) cha der uss er shirveish myr sharvaant-bondiaght:

⁴⁰ Agh myr sharvaant failt, as myr jiulean, vees eh mayrt, dy hirveish oo gys bleïn y Jubile.

⁴¹ As eisht lhiggee oo yn raad da, as e chloan mârish, as hed eh reesht gys e vooinjer hene, as gys eiraght e ayrey nee eh chyndaa.

⁴² Son my harvaantyn’s ad, hug mish lhiam magh ass cheer Egypt: cha bee ad er nyn greck myr deiney-bondiaght.

⁴³ Cha jean oo reill harrish lesh dewlys, agh gowee oo aggle roish dty Yee.

⁴⁴ Bee chammah dty gheiney as dty vraane-bondiaght, jeh ny ashoonyn-quaagh ta mygeayrt-y-miu; jeusyn nee shiu kionnaghey deiney as mraane-bondiaght.

⁴⁵ Myrgeddin, jeh cloan y joarree ta baghey ny-vud eu, jeusyn nee shiu kionnaghey, as jeh’n sluight oc ta ruggit ’sy cheer eu: as bee adsyn myr nyn gooid.

⁴⁶ As nee shiu goaill ad myr eiraght da nyn gloan nyn yeï, son cooid eiraght: bee ad ny deiney-bondiaght eu son dy bragh: agh harrish nyn mraaraghyn cloan Israel, cha jean shiu reill lesh dewlys.

⁴⁷ As my nee troailtagh ny joarree cheet dy ve berchagh ny-vud eu, as dty vraar, ta cummal liorish, tuittym ayns boghtynid, as eh dy chreck eh hene rish y joarree ny’n troailtagh, ny rish veg jeh kynney’n joarree:

⁴⁸ Lurg da ve creckit, foddee eh v’er ny eaysley reesht; foddee fer jeh e gheiney eshyn y eaysley:

⁴⁹ Foddee e naim, ny mac e naim eshyn y casley, ny fer erbee jeh e chynney; ny my ta fort echey, foddee eh feaysley eh hene.

⁵⁰ As nee eh coontey rishyn chionnee eh, veih’n vleïn v’eh creckit rish, gys bleïn y Jubile: as bee price e chreck cordail rish earroo ny bleeantyn: myr traa sharvaant failt vees shen dasyn.

⁵¹ My vees mooarane bleeantyn ergooyl; corrym roo shen ver eh reesht price y feaysley echey, ass yn argid v’eh kionnit lesh.

⁵² As mannagh vel agh beggan dy vleeantyn ergooyl gys bleïn y jubile, eisht nee eh coontey rish, as corrym gys e vleeantyn ver eh dasyn reesht price e eaysley.

⁵³ Myr sharvaant failt gour y vleïn vees eh mârish: as cha vel eh dy reill harrish lesh dewlys ayns dty hilley’s.

⁵⁴ As mannagh bee eh er ny eaysley er yn aght shoh, eisht hed eh magh seyr ayns bleïn y Jubile; eh hene, as e chloan.

⁵⁵ Son ta cloan Israel my harvaantyn: my harvaantyn ad, hug mish lhiam ass cheer Egypt: Mish y Chiarn nyn Yee.