Leviticus 24 - Yn Vible Casherick 1775 1819

CAB. XXIV

¹ As loayr y Chiarn rish Moses, gra,

² Oardee da cloan Israel, dy der ad lhieu hood’s yn ooil-olive share as s’glenney, son soilshey, dy vod ny lampyn lossey dy kinjagh.

³ Cheu-mooie jeh curtan yn eanish, ayns y chabbane-agglish, nee Aaron y hoiaghey magh ad, veih’n astyr gys y voghrey, fenish y Chiarn dy kinjagh. Bee shen slattys beayn ayns nyn sheelogheyn.

⁴ Nee eshyn soiaghey ny lampyn er y chainlere glen airhey, fenish y Chiarn dy kinjagh.

⁵ As nee uss goaill flooyr meein, as jeih bwilleenyn jeh shen y aarlaghey: hoght kaartyn vees ayns un willeen.

⁶ As nee uss soiaghey ad magh ayns daa choorse, shey ayns coorse, er y voayrd glen airhey fenish y Chiarn.

⁷ As ver uss frankincense ghlen er dagh coorse, dy vod eh ve er yn arran son imraa, eer oural jeant lesh aile gys y Chiarn.

⁸ Dagh doonaght nee eh shen y hoiaghey magh roish y Chiarn dy kinjagh, ec cost cloan Israel, liorish conaant kinjagh.

⁹ As bee shen lesh Aaron as e vec; as nee adsyn gee shen ’syn ynnyd casherick: son te er ny chasherickey dasyn, jeh ourallyn y Chiarn, jeant lesh aile, liorish slattys kinjagh.

¹⁰ As hie mac ben va ny Israelite, va e ayr ny Egyptian, magh mastey cloan Israel: as va streeu eddyr yn mac shoh jeh ben yn Israelite, as dooinney jeh Israel ayns y champ.

¹¹ As ren mac y ven jeh Israel loayrt goan mollaghtagh noi ennym y Chiarn, as gweeaghyn: as hug ad lhieu eh fenish Voses (as va ennym e voir Shelomith, inneen Dibri, jeh tribe Dan):

¹² As hug ad eh ayns pryssoon, dy voddagh aigney yn Chiarn v’er ny hoilshaghey daue.

¹³ As loayr y Chiarn rish Moses, gra,

¹⁴ Cur lhiat magh eshyn ren gwee mollaght cheu-mooie jeh’n champ: as lhig dauesyn ooilley, ren clashtyn eh, cur nyn laueyn er e chione, as lhig da ooilley’n cheshaght eshyn y chlaghey.

¹⁵ As nee uss loayrt rish cloan Israel, gra, Fer erbee dy vel gweeaghyn da e Yee, nee eh gymmyrkey e pheccah.

¹⁶ As eshyn ta loayrt goan mollaghtagh noi ennym y Chiarn, bee eh dy shickyr er ny choyrt gy-baase; nee ooilley’n pobble dy shickyr eshyn y chlaghey; bee chammah yn joarree, as eshyn ta ruggit ’sy cheer, tra t’eh goltooaney ennym y Chiarn, er ny choyrt gy-baase.

¹⁷ As bee eshyn ta goaill ersooyl bioys dooinney erbee, dy shickyr er ny choyrt gy-baase.

¹⁸ As nee eshyn, ta marroo baagh, shen y yannoo mie; baagh son baagh.

¹⁹ As my ver dooinney lheamys er e naboo; myr t’eh er n’yannoo, shen myr vees eh jeant rish hene:

²⁰ Brishey son brishey, sooill son sooill, feeackle son feeackle: myr t’eh er choyrt lheamys er dooinney, myr shen vees eh cooilleenit er hene.

²¹ As eshyn ta marroo baagh, ver eh baagh er y hon: as eshyn ta marroo dooinney, bee eh er ny choyrt gy-baase.

²² Yn un leigh vees eu, chammah son y joarree, as son fer jeh’n cheer eu hene: son mish y Chiarn y Jee eu.

²³ As loayr Moses rish cloan Israel, ad dy choyrt lhieu magh eshyn, va er ghwee mollaght, magh ass y champ, as eh y chlaghey: as ren cloan Israel myr va’n Chiarn er harey da Moses.