Leviticus 20 - Yn Vible Casherick 1775 1819

CAB. XX

¹ As loayr y Chiarn rish Moses, gra,

² Nee oo gra, ny sodjey, rish cloan Israel, Quoi-erbee eh jeh cloan Israel, ny jeh’n joarree ta cummal ayns Israel, ta chebbal veg jeh e luight da Molech: bee eh dy shickyr er ny choyrt gy-baase; nee sleih ny cheerey eshyn y chlaghey.

³ As neem’s soiaghey m’eddin noi’n dooinney shen, as eshyn y yiarey jeh veih mastey’n pobble; er-yn-oyr dy vel eh er hebbal jeh e luight da Molech, dy chur cooyl rish my ynnyd, casherick, as dy hoiaghey beg jeh m’ennym casherick.

⁴ As my ta sleih ny cheerey jeh nyn yoïn follaghey nyn sooillyn veih’n dooinney, tra t’eh chebbal jeh e luight da Molech, as nagh vel ad dy stroie eh;

⁵ Eisht neem’s soiaghey m’eddin noi’n dooinney shen, as noi e chynney; as nee’m eh y yiarey jeh, as ooilley ny ta geiyrt er ayns e pheccah, dy hebbal e luight gys Molech, veih mastey’n pobble.

⁶ As yn annym ta geiyrt orroosyn ta cur-rish obbeeys, as buitcheraght, as jannoo maarderys [spyrrydoil] roo, neem’s soiaghey m’eddin noi’n annym shen, as eshyn y yiarey ersooyl veih mastey’n pobble.

⁷ Jean-jee shiu hene y casherickey er-y-fa shen, as bee-jee casherick: son mish y Chiarn y Jee eu.

⁸ As nee shiuish freaylley my lattyssyn, as y chooilleeney ad: Mish y Chiarn ta dy chasherickey shiu.

⁹ Quoi-erbee ta gwee mollaght da e ayr, ny e voir, bee eh er ny choyrt gy-baase; er hene vees yn uill echey.

¹⁰ As y dooinney ta foiljagh jeh brishey poosey rish ben ghooinney elley, eer eshyn ta brishey poosey rish ben e naboo, bee’n maarderagh as y streebagh dy shickyr er nyn goyrt gy-baase.

¹¹ As y dooinney ta lhie marish ben e ayrey t’eh er roostey nearey e ayrey: bee ad nyn-neesht er nyn goyrt gy-baase: orroo hene vees yn uill oc.

¹² My nee dooinney lhie marish e inneen-’sy-leigh, bee ad nyn-neesht er nyn goyrt gy-baase: t’ad er vrishey’n oardagh cooie; bee’n uill oc orroo hene.

¹³ My ta dooinney lhie marish dooinney, myr marish ben, t’ad nyn-neesht er n’yannoo peccah feohdagh: bee ad dy shickyr er nyn goyrt gy-baase: orroo hene vees yn uill oc.

¹⁴ My ta dooinney goaill huggey ben as e moir, te peccah trome; bee ad er nyn lostey ’syn aile, chammah eshyn as adsyn; son nagh bee lheid y drogh-yannoo ny-vud eu.

¹⁵ As my ta dooinney lhie marish baagh, bee eh, son shickyrys, er ny choyrt gy-baase.

¹⁶ As my ta ben lhie sheese roish baagh erbee, nee uss yn ven as y baagh y varroo: bee ad, son shickyrys, er nyn goyrt gy-baase: bee’n uill oc orroo hene.

¹⁷ My nee dooinney goaill e huyr, inneen e ayrey, ny inneen e vayrey, as ad dy lhie cooidjagh; te red feer peccoil; as bee ad er ny yiarey jeh ayns shilley’n pobble oc: t’eh er roostey nearey e huyr; nee eh e pheccah y ymmyrkey.

¹⁸ As my nee dooinney lhie marish ben, as e chingys dooghyssagh urree, as roostey yn nearey eck; t’eh er vrah yn roie-folley eck, as ish myrgeddin: as bee ad nyn-neesht er ny yiarey jeh veih mastey’n pobble.

¹⁹ As cha jean oo roostey nearey shuyr dty vayrey, ny shuyr dty ayrey: son t’eh roostey nearey yn kynney faggys echey: nee ad gymmyrkey nyn loght.

²⁰ As my nee dooinney lhie marish ben e naim, t’eh er roostey nearey e naim: nee ad gymmyrkey nyn beccah; yiow ad baase gyn sluight.

²¹ As my nee dooinney goaill ben e vraarey, te red neu-ghlen: t’eh er roostey nearey e vraar; bee ad gyn sluight.

²² Nee shiu, er-y-fa shoh, freaylley ooilley my lattyssyn, as my vriwnyssyn, as jannoo ad, nagh jean y cheer huggey ta mish dy choyrt lhiam shiu dy chummal, shiu y skeeah magh.

²³ As cha n’eiyr shiu er cliaghtaghyn ny ashoonyn, ta mish tilgey magh rhymbiu: son v’adsyn kyndagh jeh ooilley ny peccaghyn shoh, as myr shen hug mee feoh daue.

²⁴ Agh ta mee er ghra riu, Nee shiu yn cheer oc y ghoaill son eiraght, as diuish ver-yms eh dy ghoaill eh diu hene; cheer ta palchey ayns bainney as mill: Mish y Chiarn y Jee eu, ta er scarrey shiu veih dy chooilley phobble elley.

²⁵ Shen-y-fa ver shiu scarrey eddyr beiyn glen as neu-ghlen, as eddyr eeanlee glen as neu-ghlen: as cha jean shiu shiu-hene feohdagh liorish baagh ny eean, ny liorish keint erbee dy red bio ta snaue er y thalloo, shen ta mish er lhiettal veue myr neu-ghlen.

²⁶ As bee shiu casherick dooys: son mish y Chiarn, ta casherick, as er scarrey shiu veih dy chooilley phobble elley, dy vod shiu ve lhiam pene.

²⁷ Dooinney neesht ny ben, ta cur-rish obbeeys, ny buitcheraght, vees dy feer er nyn goyrt gy-baase; bee ad er nyn glaghey: bee’n uill oc orroo hene.