Leviticus 2 - Yn Vible Casherick 1775 1819

CAB. II

¹ As tra nee fer erbee chebbal oural-arran da’n Chiarn ta’n oural echey dy ve flooyr meein: as nee eh deayrtey ooil er, as coyrt frankincense huggey.

² As ver eh lesh shen gys ny saggyrtyn mec Aaron: as nee fer jeu goaill ass lane e ghurn jeh’n flooyr, as jeh’n ooil marish ooilley yn frankincense; as nee’n saggyrt lostey ayrn jeh son cowrey er yn altar, dy ve oural jeant lesh aile gys yn Chiarn.

³ As bee yn chooid elley jeh’n oural-arran lesh Aaron as e vec; te’n red smoo casherick jeh ourallyn y Chiarn jeant lesh aile.

⁴ As my ver oo lhiat toyrtys dy oural-arran dy ve aarlit ’syn oghe, shegin da ve keeakyn gyn soorit dy flooyr meein lesh ooil ny chione, ny gyn soorit slaiyt lesh ooil.

⁵ As my vees toyrtys yn oural-arran ayd’s dy ve aarlit ayns pan, shegin da ve flooyr meein slaiyt lesh ooil.

⁶ Nee oo brishey eh ayns peeshyn as deayrtey ooil er: te oural-arran.

⁷ As my vees toyrtys dty oural-arran dy ve aarlit ayns frynepan, shegin da ve jeant dy flooyr meein lesh ooil.

⁸ As ver oo lhiat yn oural-arran, ta dy ve jeant jeh ny reddyn shoh, gys y Chiarn: as tra te er ny choyrt da’n saggyrt, ver eshyn lesh eh gys yn altar.

⁹ As nee’n saggyrt goaill veih’n oural-arran sample jeh, as shen y lostey er yn altar: ta shoh oural jeant lesh aile dy hoar millish gys y Chiarn.

¹⁰ As bee shen ny ta er-mayrn jeh’n oural-arran, lesh Aaron as e vec: te’n red smoo casherick, jeh ourallyn y Chiarn jeant lesh aile.

¹¹ Cha bee veg jeh’n oural-arran, ver shiu lhieu gys y Chiarn, jeant lesh soorit: son cha jean shiu lostey veg y soorit, ny veg y vill, ayns oural erbee gys y Chiarn jeant lesh aile.

¹² Agh son yn oural jeh toshiaght ny messyn, nee shiu chebbal ad gys y Chiarn: agh cha bee ad er nyn lostey er yn altar, son soar millish.

¹³ As dagh toyrtys jeh dty oural-arran, nee uss y yannoo blaystal lesh sollan; chamoo faagys oo ass dty oural-arran sollan chonaant dty Yee: lesh ooilley dty ourallyn nee oo chebbal sollan.

¹⁴ As my t’ou chebbal oural-arran jeh toshiaght dty vessyn da’n Chiarn, nee oo chebbal, son yn oural-arran jeh dty chied-vessyn, jeeassyn glass dy arroo, chyrmit rish yn aile, eer arroo bwoailt magh ass jeeassyn lane.

¹⁵ As ver oo ooil er, as frankincense y choyrt gys shen; she oural-arran eh.

¹⁶ As nee’n saggyrt lostey yn sample jeh, ayrn jeh’n arroo bwoailt, as ayrn jeh’n ooil, marish ooilley’n frankincense: ta shoh chebbal jeant lesh aile gys yn Chiarn.