Leviticus 19 - Yn Vible Casherick 1775 1819

CAB. XIX

¹ As loayr y Chiarn rish Moses, gra,

² Loayr rish slane sheshaght chloan Israel, as abbyr roo, Bee-jee shiuish casherick: son ta mish y Chiarn y Jee eu casherick.

³ Nee shiu dy chooilley ghooinney cur arrym da e voir as e ayr, as freayll my ghooneeyn: Mish y Chiarn y Jee eu.

⁴ Cha chyndaa shiu gys jallooyn, ny jannoo diu hene jeeghyn grainnit: Mish y Chiarn y Jee eu.

⁵ As my vees shiu chebbal toyrtys-casherick dy ourallyn-shee gys y Chiarn, nee shiu chebbal eh, jeh nyn aigney arryltagh.

⁶ Bee eh er ny ee yn laa cheddin ta shiu chebbal eh, as er laa-ny-vairagh: as my vees veg er-mayrn gys y trass laa, bee eh er ny lostey ’syn aile.

⁷ As my vees eh er ny ee edyr er y trass laa, te feohdoil; cha bee soiagh jeant jeh.

⁸ Shen-y-fa, nee eshyn ta gee eh gymmyrkey e pheccah, son dy vel eh er chur gys drogh ymmyd shen ny va casherick gys y Chiarn: as bee’n annym shen er ny yiarey jeh veih’n pobble.

⁹ As tra ta shiu buinn yn troar-arroo ’syn ouyr, cha jean oo buinn dy bollagh corneilyn dty vagher, chamoo nee oo chaglym jeeassyn y fouyr ayd.

¹⁰ As cha jean oo jeelym dty gharey-feeyney, chamoo nee oo chaglym dy bollagh dy chooilley verrish t’ayns dty gharey-feeyney; nee oo faagail ad gour y voght as y joarree: Mish y Chiarn y Jee eu.

¹¹ Cha jean shiu geid, ny dellal dy molteyragh, ny ginsh breg ry-cheilley.

¹² As cha jean shiu loo liorish m’ennym’s dy foalsey; chamoo ghoys oo ennym dty Yee ayns fardail: Mish y Chiarn.

¹³ Cha jean oo molley dty naboo, ny tranlaase ’yannoo er: cha bee faill y labree ayns dty laue fud-ny-hoie, derrey’n voghrey.

¹⁴ Cha jean oo gweeaghyn da’n bouyr, ny kiap-snapperal y choyrt roish y doal; agh gowee oo aggle roish Jee: Mish y Chiarn.

¹⁵ Cha jean shiu veg y neu-chairys ayns briwnys; cha jean oo soiaghey jeh persoon y voght, ny cur geill da persoon y verchagh: agh ayns cairys nee uss briwnys dty naboo.

¹⁶ Cha jed oo mygeayrt, myr skeealleyder mastey dty phobble: chamoo nee oo shassoo noi fuill dty naboo: Mish y Chiarn.

¹⁷ Cha bee dwoaie ayd er dty naboo ayns dty chree: ver oo dy dooie oghsan da dty naboo, as gyn lhiggey da tannaghtyn ayns e pheccah.

¹⁸ Cha gow cooilleeney ec dty laue hene, ny gymmyrkey drogh-aigney erbee noi cloan dty phobble: agh ver oo graih da dty naboo myr dhyt hene: Mish y Chiarn.

¹⁹ Nee shiu freaylley my lattyssyn: cha lhig oo da dty ollagh gientyn rish maase jeh dooghys elley: cha jean oo cuirr dty halloo lesh caghlaa rass fud-y-cheilley: cha jean oo ceau garmad dy linsee-woolsee.

²⁰ As quoi-erbee ta lhie marish inney-veyl, nasht rish dooinney, as nagh vel ee dy slane feayshlit, ny e reamys eck; bee ish scuitchit: cha bee ad nyn goyrt gy-baase, er-yn-oyr nagh row e slane seyrsnys eck.

²¹ As ver y dooinney lesh e oural-loght gys y Chiarn, gys dorrys y chabbane-agglish; ta shen, rea son oural-losht.

²² As nee’n saggyrt lhiasaghey ’yannoo er e hon, lesh rea yn oural-loght, fenish y Chiarn, son e pheccah t’eh er n’yannoo: as bee e pheccah er ny leih da.

²³ As tra vees shiu er jeet gys y cheer, as er hoiaghey dy chooilley cheint dy viljyn, gour beaghey; eisht nee shiu coontey yn mess oc myr neu-ghlen: three bleeaney bee eh myr shoh diu neu-ghlen: cha bee eh er ny ee.

²⁴ Agh ayns y chiarroo vleïn, bee’n slane mess echey casherick, gys moylley’n Chiarn.

²⁵ As ayns y wheiggoo vleïn, nee shiu gee jeh’n mess oc, dy vod bannaght smoo ve er y vishagh oc: Mish y Chiarn y Jee eu.

²⁶ Cha jean shiu veg y ee vees yn uill ayn: chamoo nee shiu obbeeys y chliaghtey, ny geill (faase-chredjuagh) ’choyrt da traaghyn.

²⁷ Cha jean shiu baarey nyn ghing runt mygeayrt, chamoo nee oo mhilley cummey dty aasaag.

²⁸ Cha jean shiu giaraghyn y choyrt ayns yn eill eu son ny merriu, ny cronnyn erbee y choyrt erriu: Mish y Chiarn.

²⁹ Ny jean dty inneen y injillaghey, dy chur urree dy ve ny streebagh; er-aggle dy duitt y cheer gys maarderys, as y cheer cheet dy ve lane dy olkys.

³⁰ Nee shiu freaylley my ghooneeyn, as graih onnoroil y hoilshaghey da m’ynnyd casherick: Mish y Chiarn.

³¹ Ny cur-jee geill dauesyn ta cur-rish faishnys; chamoo eiyr-jee er fir-obbee, dy ve cleaynit lioroo: Mish y Chiarn y Jee eu.

³² Nee uss girree seose kionfenish y chione lheeah, as ooashley y choyrt da’n chenndeeaght, as aggle y ghoaill roish dty Yee: Mish y Chiarn.

³³ As my ta joarree cummal mayrt ’sy cheer, cha jean shiu tranlaase er.

³⁴ Agh bee’n joarree, ta cummal mêriu, diuish myr fer ruggit ny mast’ eu, as ver oo graih da myr dhyt hene; son va shiuish nyn yoarreeyn ayns cheer Egypt: Mish y Chiarn y Jee eu.

³⁵ Cha jean shiu neu-chairys erbee ayns briwnys, ayns towse-lhiurid, ny towse-trimmid, ny ayns towse-saagh.

³⁶ Meihaghyn corrym, weightyn corrym, as siyn-towse kiart, vees eu: Mish y Chiarn y Jee eu, hug lhiam shiu magh as cheer Egypt.

³⁷ Shen-y-fa nee shiuish freaylley ooilley my lattyssyn, as ooilley my vriwnyssyn, dy chooilleeney ad: Mish y Chiarn.