Leviticus 18 - Yn Vible Casherick 1775 1819

CAB. XVIII

¹ As loayr y Chiarn rish Moses, gra,

² Loayr rish cloan Israel, as abbyr roo, Mish y Chiarn y Jee eu.

³ Cha n’eiyr shiu er cliaghtaghyn cheer Egypt, raad va shiu cummal; as lurg cliaghtaghyn cheer Chanaan, raad ta mee dy choyrt shiu, cha jean shiu; chamoo nee shiu gimmeeaght lurg nyn oardaghyn.

⁴ Nee shiu cooilleeney my vriwnyssyn, as freaylley my leighyn, dy immeeaght ayndoo: Mish y Chiarn y Jee eu.

⁵ Nee shiu er-y-fa shen, freayll my lattyssyn as my vriwnyssyn, ad shoh my nee dooinney ’chooilleeney, bee ad bioys da: Mish y Chiarn.

⁶ Cha jig fer erbee eu er-gerrey jeeish ta faggys caardys da, dy phoosey ee: Mish y Chiarn.

⁷ Nearey dty ayr, ny nearey dty voir, cha jean oo roostey: dty voir ee, cha jean oo roostey yn nearey eck.

⁸ Nearey ben dt’ayrey cha jean oo roostey: te rooishtid dt’ayrey.

⁹ Nearey dty huyr, ta inneen dt’ayrey, ny inneen dty vayrey, ruggit ec y thie, ny ruggit veih’n thie, yn nearey oc cha jean oo roostey.

¹⁰ Nearey inneen dty vac, ny inneen dty inneen hene, cha jean oo roostey; son te myr dty nearey hene.

¹¹ Nearey inneen ben dt’ayrey, er ny gheddyn jeh dty ayr, (dty huyr ee) yn nearey eck cha jean oo roostey.

¹² Cha jean oo roostey nearey shuyr dt’ayrey: ish ben-vooinjerey faggys dt’ayrey.

¹³ Cha jean oo roostey nearey inneen dty vayrey: son ish ben-vooinjerey faggys dty voir.

¹⁴ Cha jean oo roostey nearey braar dt’ayrey, cha jig uss er-gerrey da’n ven echey: dty naunt ee.

¹⁵ Cha jean oo roostey nearey dty inneen-’sy-leigh: ben dty vac ee, yn nearey eck cha rooisht oo.

¹⁶ Cha jean oo roostey nearey ben dty vraarey: nearey dty vraar eh.

¹⁷ Cha jean oo roostey nearey ben as e inneen, chamoo ghoys oo inneen e mac, ny inneen e inneen, dy roostey yn nearey eck: son ad ny mraane-mooinjerey faggys eck: she croiaght eh.

¹⁸ Chamoo ghoys oo ben as e shuyr, dy choyrt seaghyn urree, dy phoosey ee, ayns lhing y chied ven.

¹⁹ Myrgeddin, cha jig uss er-gerrey da ben, dy roostey’n nearey eck, choud as t’ee fo’n neu-ghlennid eck.

²⁰ Marish shoh, cha bee ayd dy yannoo rish ben dty naboo, dy yannoo oo hene foiljagh mâree.

²¹ Cha lhig oo veg jeh dty luight goll trooid yn aile gys Molech, chamoo nee oo tayrn mee-ooashley er ennym dty Yee: Mish y Chiarn.

²² Cha jean oo lhie marish dooinney, myr marish ben: shen feohdys.

²³ Chamoo nee oo lhie marish baagh erbee, dy hayrn oo hene fo neu-ghlennid eajee: chamoo nee ben erbee shassoo roish baagh, dy lhie sheese huggey: te noi dooghys.

²⁴ Ny jean-jee shiu hene neu-ghlen lesh veg jeh ny peccaghyn dwoaiagh shoh; son lesh lheid ny reddyn ta ny ashoonyn, ta mish er n’imman magh rhymbiu, er n’yannoo ad hene eajee ayns my hilley.

²⁵ As ta’n cheer fo slane broïd: shen-y-fa, ta mish goaill kerraghey er ny peccaghyn eck, as ta’n cheer hene skeeah magh e cummaltee.

²⁶ Nee shiuish, er-y-fa shen, freayll ny slattyssyn as ny briwnyssyn aym’s, as cha jean shiu cur-rish veg jeh ny peccaghyn eajee shoh; chamoo veg jeh’n ashoon eu hene, ny joarree erbee ta nyn mastey;

²⁷ (Son ooilley ny obbraghyn eajee shoh ta cummaltee yn cheer, va reue, er n’yannoo; as ta’n cheer fo mollaght.)

²⁸ Nagh jean y cheer shiuish y skeeah magh myrgeddin, tra ta shiu broghey ee, myr ren ee skeeah ny ashoonyn v’ayn rhymbiu.

²⁹ Son quoi-erbee nee cur-rish veg jeh ny peccaghyn dwoaiagh shoh, bee’n annym shen er ny yiarey jeh veih mastey’n pobble.

³⁰ Shen-y-fa nee shiu freayll my oardagh, nagh jean shiu cur-rish veg jeh ny cliaghtaghyn eajee, hug adsyn roo va reue, nagh jean-jee dwoaiagh jeu hene lioroo: Mish y Chiarn y Jee eu.