Leviticus 17 - Yn Vible Casherick 1775 1819

CAB. XVII

¹ As loayr y Chiarn rish Moses, gra,

² Loayr rish Aaron, as rish e vec, as rish ooilley cloan Israel, as abbyr roo; Shoh’n red ta’n Chiarn er harey, gra,

³ Dooinney erbee jeh thie Israel, ta marroo dow, ny eayn, ny goayr, ayns y champ, ny dy varroo eh ass y champ,

⁴ As nagh vel dy choyrt lesh eh gys dorrys y chabbane-agglish, dy hebbal oural gys y Chiarn kiongoyrt rish cabbane y Chiarn: bee fuill er ny choyrt gys lieh yn dooinney shen; t’eh er gheayrtey fuill; as bee’n dooinney shen er ny yiarey jeh veih mastey e phobble:

⁵ Er coontey dy vod cloan Israel cur lhieu nyn ourallyn, t’ad dy hebbal ayns y vagher foshlit, eer dy der ad lhieu ad gys y Chiarn, gys dorrys y chabbane-agglish gys y taggyrt, as y hebbal ad son ourallyn-shee gys y Chiarn.

⁶ As nee’n saggyrt spreih yn uill er altar y Chiarn, ec dorrys y chabbane-agglish, as lostey yn eeh son soar millish gys y Chiarn.

⁷ As cha jeb ad ny-sodjey nyn ourallyn gys jouyil, roo t’ad er n’yannoo maarderys [spyrrydoil:] Bee shoh slattys kinjagh daue, trooid nyn sheelogheyn.

⁸ As nee oo gra roo, Dooinney erbee jeh thie Israel, ny jeh’n joarree ta troailt ny mast’ eu, ta chebbal oural-losht ny toyrtys-casherick,

⁹ As nagh vel coyrt lesh eh gys dorrys y chabbane-agglish dy hebbal eh gys y Chiarn: bee’n dooinney shen eer er ny yiarey jeh veih mastey e phobble.

¹⁰ As dooinney erbee jeh thie Israel, ny jeh’n joarree ta troailt ny mast’ eu, ta gee monney erbee dy uill; soie-yms m’eddin noi’n annym shen ta gee fuill, as eshyn y yiarey jeh veih mastey e phobble.

¹¹ Son ta bioys yn eill ’syn uill; as ta mish er chur eh diu er yn altar, dy yannoo lhiasaghey son nyn anmeenyn: son she’n uill ta jannoo lhiasaghey son yn annym.

¹² Shen-y-fa dooyrt mee rish cloan Israel, Cha jean annym erbee jiuish gee fuill, chamoo nee joarree erbee, ta goaill aaght ny-vud eu, gee fuill.

¹³ As dooinney erbee jeh cloan Israel, ny jeh ny joarreeyn ta ny-vud eu, ta shelg, as tayrtyn baagh erbee, ny eean, ta lowit dy ve eeit; nee eh dy shickyr deayrtey magh yn uill echey, as shen y choodaghey lesh joan.

¹⁴ Son ayns yn uill ta bioys dy chooilley eill, ta’n uill son y vioys echey: shen-y-fa dooyrt mee rish cloan Israel, Cha jean shiu gee fuill keint erbee dy eill: son ayns yn uill ta bioys dy chooilley eill: quoi-erbee ta gee shen, vees giarit jeh.

¹⁵ As dy chooilley annym, ta gee shen hooar baase jeh hene, ny va raipit ec beishtyn (edyr eh ve fer jeh’n cheer eu hene, ny joarree) nee eh niee e eaddagh, as faarkey eh hene ayns ushtey, as ve neu-ghlen derrey’n astyr; eisht bee eh glen.

¹⁶ Agh mannagh jean eh niee ad, ny faarkey e chorp; eisht nee eh gymmyrkey e pheccah.