Leviticus 14 - Yn Vible Casherick 1775 1819

CAB. XIV

¹ As loayr y Chiarn rish Moses, gra,

² Shoh vees y leigh mychione y lourane, ayns laa yn ghlenney echey: bee eh er ny chur lesh gys y taggyrt.

³ As hed y saggyrt magh ass y champ as nee’n saggyrt jeeaghyn, as cur-my-ner, my ta doghan yn loihrey er ny lheihys ayns y lourane,

⁴ Eisht nee’n saggyrt goardaghey dy ghoaill er y hon-syn ta dy v’er ny ghlenney, daa eean bio as glen, as fuygh-cedar, as scarleod, as hyssop.

⁵ As nee’m saggyrt goardaghey, unnane jeh ny eeanlee dy v’er ny varroo harrish ushtey-farrane, ayns saagh craie.

⁶ Agh son yn eean bio, nee eh goaill eh, as y fuygh-cedar, as y scarleod, as thummey ad shen as yn eean bio, ayns fuill yn eean v’er ny varroo harrish yn ushtey-farrane.

⁷ As nee eh spreih shen ersyn, ta dy v’er ny ghlenney veih’n louraanys, shiaght keayrtyn, as eh y vriwnys glen, as lhiggee eh yn raad da’n eean bio fud y vagher feayn.

⁸ As nee eshyn, ta dy v’er ny ghlenney, niee e eaddagh, as baarey jeh ooilley e olt, as niee eh hene ayns ushtey, dy vod eh ve glen: as ny lurg shen hig eh stiagh ’sy champ, agh cha jed eh stiagh ’sy chabbane echey hene, son shiaght laa.

⁹ As er y chiaghtoo laa nee eh baarey ooilley e olt jeh e chione, as e aasaag as e volleeyn, eer ooilley yn slane fynney nee eh baarey jeh; marish shoh nee eh e chorp y niee ayns ushtey, as bee eh glen.

¹⁰ As er yn hoghtoo laa, nee eshyn goaill daa eayn fyrryn fegooish lheamys, as un eayn bwoirryn jeh’n chied vleïn gyn lheamys, as mysh daa chaart jeig dy flooyr meein son oural-arran, lesh ooil ny chione, as lieh phunt dy ooil.

¹¹ As y saggyrt ta jannoo glen jeh, nee eh soiaghey magh yn dooinney hene, as ny reddyn shoh fenish y Chiarn, ec dorrys y chabbane-agglish.

¹² As nee’n saggyrt goaill un eayn fyrryn, as chebbal eh son oural-loght, as y lieh phunt dy ooil, as chebbal ad son oural-criht fenish y Chiarn.

¹³ As nee eh yn eayn y varroo raad t’eh marroo yn oural-peccah, as yn oural-losht, ’syn ynnyd casherick: son myr ta’n oural-losht cair y taggyrt, myr shen ta’n oural-loght: te slane casherick.

¹⁴ As nee’n saggyrt goaill kuse jeh fuill yn oural-loght, as ver yn saggyrt shen er baare y chleaysh yesh echeysyn ta dy v’er ny ghlenney, as er ordaag e laue yesh, as er ordaag vooar e chass yesh.

¹⁵ As nee’n saggyrt goaill kuse jeh’n log dy ooil, as deayrtey eh ayns bass e laue chiare hene.

¹⁶ As nee’n saggyrt thummey corrag e laue yesh ayns yn ooil t’ayns e laue chiare, as spreih yn ooil lesh e vair, shiaght keayrtyn fenish y Chiarn.

¹⁷ As yn chooid elley jeh’n ooil, t’ayns e laue, ver y saggyrt er baare y chleaysh echeysyn ta dy ve glennit, as er ordaag e laue yesh, as er ordaag vooar e chass yesh, er fuill yn oural-loght.

¹⁸ As fooilliagh yn ooil t’ayns laue y taggyrt, nee eh deayrtey er y chione echeysyn ta dy ve glennit: as nee’n saggyrt jannoo lhiasaghey er e hon fenish y Chiarn.

¹⁹ As nee’n saggyrt chebbal yn oural-peccah, as jannoo lhiasaghey er y hon-syn ta dy v’er ny ghlenney veih e ghoghan; as ny lurg shen nee eh marroo yn oural-losht.

²⁰ As nee’n saggyrt chebbal yn oural-losht, as yn oural-arran er yn altar: as nee’n saggyrt jannoo lhiasaghey er e hon, as bee eh glen.

²¹ As my t’eh boght, as nagh vod e laue roshtyn; eisht nee eh goaill un eayn son oural-loght-criht, dy yannoo lhiasaghey er e hon, as mysh kiare chaart dy flooyr meein, lesh ooil ny chione, son oural-arran, as punt dy ooil.

²² As daa chalmane-turtle, ny da eean calmane, lheid as oddys eh gheddyn; as bee’n derrey yeh oural-peccah, as y jeh elley oural-losht.

²³ As ver eh lesh ad er yn hoghtoo laa, gour e ghlenney, gys y taggyrt, gys dorrys y chabbane-agglish, fenish y Chiarn.

²⁴ As nee’n saggyrt goaill eayn yn oural-loght, as y punt dy ooil, as nee’n saggyrt chebbal ad son oural-criht fenish y Chiarn.

²⁵ As nee eh marroo eayn yn oural-loght, as nee’n saggyrt goaill kuse jeh fuill yn oural-loght, as cur shen er baare y chleaysh yesh echeysyn ta dy ve glennit, as er ordaag e laue yesh, as er ordaag vooar e chass yesh.

²⁶ As nee’n saggyrt deayrtey jeh’n ooil ayns bass e laue chiare hene.

²⁷ As nee’n saggyrt spreih lesh e chorrag kuse jeh’n ooil, t’ayns e laue chiare, shiaght keayrtyn, fenish y Chiarn.

²⁸ As ver y saggyrt jeh’n ooil t’ayns e laue er baare y chleaysh yesh echeysyn ta dy ve glennit, as er ordaag e laue yesh, as er ordaag vooar e chass yesh: er ynnyd fuill yn oural-loght.

²⁹ As yn chooid elley jeh’n ooil, t’ayns laue y taggyrt, ver eh er y chione echeysyn ta dy v’er ny ghlenney, dy yannoo lhiasaghey er e hon, fenish y Chiarn.

³⁰ As nee eh chebbal unnane jeh ny calmaneyn-turtle, ny jeh ny calmaneyn aegey, lheid as oddys eh gheddyn;

³¹ Eer lheid as oddys eh cheet huggey, yn derrey yeh son oural-peccah, as y jeh elley son oural-losht, marish yn oural-arran. As nee’n saggyrt jannoo lhiasaghey er y hon-syn ta dy v’er ny ghlenney, fenish y Chiarn.

³² Shoh yn leigh t’er y hon-syn, ta’n doghan dy louraanys er, nagh vel fort echey dy gheddyn lheid as ta cooie gour e ghlenney.

³³ As loayr y Chiarn rish Moses, as rish Aaron, gra,

³⁴ Tra vees shiu er jeet gys cheer Chanaan, ta mish dy choyrt diu son eiraght, as dy der-yms y doghan dy louraanys, ayns thie erbee jeh cheer nyn eiraght;

³⁵ As dy jig eshyn, s’liesh y thie, as ginsh da’n taggyrt, gra, Er-lhiam dy vel caslys y doghan dy louraanys ayns y thie:

³⁶ Eisht ver y saggyrt sarey, dy jean ad folmaghey yn thie roish my hed y saggyrt stiagh ayn, dy vriaght mychione y doghan; nagh bee ooilley ny t’ayns y thie jeant neu-ghlen: as eisht hed y saggyrt stiagh dy akin y thie.

³⁷ As nee eh jeeaghyn son y doghan, as cur-my-ner, my ta’n doghan ayns voallaghyn y thie, lesh schimmeigyn dowiney; geayney ny jiarg, ry-akin dowin ’sy voalley;

³⁸ Eisht hed y saggyrt magh er dorrys y thie, as nee eh jeigh seose y thie shiaght laa.

³⁹ As hig y saggyrt reesht kione y chiaghtoo laa, as jeeaghyn; as cur-my-ner, my ta’n doghan er skeayley er voallaghyn y thie;

⁴⁰ Eisht nee’n saggyrt sarey ad dy ghoaill ersooyl ny claghyn ta’n doghan ayndoo, as ad y hilgey ayns ynnyd neu-ghlen, cheu-mooie jeh’n ard-valley.

⁴¹ As ver y saggyrt er y thie dy ve scrapit cheu-sthie ooilley mygeayrt, as deayrtee ad magh y joan hig jeu, cheu-mooie jeh’n ard-valley, ayns boayl neu-ghlen.

⁴² As gowee ad claghyn elley, dy choyrt ayns ynnyd ny claghyn shen; as gowee ad mortar noa, dy phlastrail y thie.

⁴³ As my hig y doghan reesht, as brishey magh ’sy thie, lurg ny claghyn ve goit ersooyl, as lurg da’n thie ve scrapit, as lurg y phlastrail;

⁴⁴ Eisht hig y saggyrt as jeeaghyn, as cur-my-ner, my ta’n doghan er skeayley ayns y thie, te louraanys dewil ayns y thie: te neu-ghlen.

⁴⁵ As nee eh yn thie y lhieggal, ny claghyn, as y fuygh, as ooilley mortar y thie: as ver eh lesh ad magh ass yn ard-valley, gys boayl neu-ghlen.

⁴⁶ Bee eshyn myrgeddin, hed stiagh ’sy thie, choud as te dy ve jeight seose, neu-ghlen gys yn astyr.

⁴⁷ As eshyn lhie-ys ’sy thie, lhig da niee e eaddagh: as eh ta goaill beaghey ’sy thie, lhig da niee e eaddagh.

⁴⁸ As my hig y saggyrt stiagh, as jeeaghyn er, as cur-my-ner, nagh vel y doghan er skeayley ’sy thie, lurg da’n thie v’er ny phlastrail: eisht nee’n saggyrt briwnys y thie dy ve glen, er-yn-oyr dy vel y doghan er ny lheihys.

⁴⁹ As nee eh goaill, dy ghlenney yn thie, daa eean, as fuygh-cedar, as scarleod, as hyssop.

⁵⁰ As nee eh marroo unnane jeh ny eeanlee ayns saagh craie, harrish ushtey-farrane.

⁵¹ As nee eh goaill yn fuygh-cedar, as yn hyssop, as y scarleod, as yn eean bio, as thummey ad ayns fuill yn eean marroo, as ayns yn ushtey-farrane, as spreih yn thie shiaght keayrtyn.

⁵² As nee eh glenney yn thie lesh fuill yn eean as lesh yn ushtey-farrane, as lesh yn eean bio, as lesh y fuygh-cedar, as lesh yn hyssop, as lesh yn scarleod.

⁵³ Agh lhiggee eh yn raad da’n eean bio, ass yn ard-valley, gys reamys ny magheryn, as lhiasaghey ’yannoo son y thie: as bee eh glen.

⁵⁴ Shoh’n leigh son dy chooilley cheint dy ghoghan, dy louraanys, as carrid,

⁵⁵ As son louraanys garmad, as thie,

⁵⁶ As son askaid, as son screb, as son cron sollys,

⁵⁷ Dy hoilshaghey tra te neu-ghlen, as tra te glen: shoh’n leigh mychione y loihrey.