Leviticus 13 - Yn Vible Casherick 1775 1819

CAB. XIII

¹ As loayr y Chiarn rish Moses, gra,

² Tra vees ec dooinney ayns crackan yn eill echey att, screb, ny cron sollys, as shen dy ve ayns crackan yn eill echey, goll-rish y doghan dy louraanys; eisht bee eh er ny chur lesh gys Aaron y saggyrt, ny gys fer jeh e vec ny saggyrtyn.

³ As nee’n saggyrt jeeaghyn er y doghan, ayns crackan yn eill: as tra ta ny renaigyn ayns y doghan er hyndaa bane, as y doghan, ayns shilley, ny s’diuney na crackan yn eill echey; doghan dy louraanys eh: as nee’n saggyrt jeeaghyn er, as briwnys eh neu-ghlen.

⁴ My ta’n cron sollys gial ’sy chrackan, as nagh vel eh, ayns shilley, ny s’diuney na’n chrackan, as nagh vel y fynney echey er jyndaa bane; eisht ver y saggyrt eshyn ta’n doghan er ayns boayl er-lheh, son shiaght laa.

⁵ As nee’n saggyrt jeeaghyn er, yn chiaghtoo laa: cur-my-ner, mannagh vel y doghan, ayns y shilley echey, er n’gholl ny sodjey, as nagh vel y doghan er skeayley ayns y chrackan: eisht nee’n saggyrt eh y yeigh seose shiaght laa sodjey.

⁶ As jeeaghee yn saggyrt er reesht, yn chiaghtoo laa er-giyn: as cur-my-ner, my ta keint dy ghooïd er y boayl doghanit, as nagh vel eh er skeayley ayns y chrackan: nee’n saggyrt briwnys eh glen: cha vel eh agh y screb: as lhig da niee e eaddagh, as bee eh glen.

⁷ Agh my ta’n screb skeayley cooid vooar ayns y chrackan, lurg da’n saggyrt ve roïe er vakin eh son e ghlennid; bee eh er ny akin reesht liorish y taggyrt.

⁸ As my ta’n saggyrt fakin, as cur-my-ner dy vel y screb skeayley ayns y chrackan: eisht nee’n saggyrt eshyn y vriwnys neu-ghlen; louraanys t’ayn.

⁹ Tra ta doghan y louraanys ayns dooinney, eisht bee eh er ny chur lesh gys y taggyrt.

¹⁰ As nee’n saggyrt jeeaghyn er: as cur-my-ner, my ta’n att bane ’sy chrackan, as y fynney bane, as feill vio cheet rish ayns yn att;

¹¹ She shenn louraanys t’ayn, ayns crackan yn eill echey, as nee’n saggyrt eshyn y vriwnys neu-ghlen; as cha jean eh jeigh seose eh (son trial sodjey:) son t’eh neu-ghlen.

¹² As my ta louraanys brishey magh dy lhean ’sy chrackan, as y louraanys skeayley harrish ooilley’n crackan echeysyn ta’n doghan er, veih e chione eer gys e chassyn, raad erbee dy vel y saggyrt jeeaghyn;

¹³ Eisht nee’n saggyrt goaill tastey: as cur-my-ner, my ta’n louraanys er choodaghey ooilley’n eill echey, nee eh eshyn, ta’n doghan er, y vriwnys glen: te ooilley er jyndaa gial: t’eh glen.

¹⁴ Agh tra ta’n eill vio cheet rish aynsyn, bee eh neu-ghlen.

¹⁵ As nee yn saggyrt fakin yn eill vio, as briwnys eh neu-ghlen: son ta’n eill vio cowrey dy neu-ghlennid: she louraanys t’ayn.

¹⁶ Ny my ta’n eill vio chyndaa as caghlaa bane: hig eh gys y taggyrt.

¹⁷ As nee’n saggyrt jeeaghyn er: as cur-my-ner, my ta’n doghan er jyndaa bane; eisht nee’n saggyrt eshyn y vriwnys glen ta’n doghan er: t’eh glen.

¹⁸ Yn eill myrgeddin ayn, eer ayns y chrackan echey, va askaid, as t’er ny lheihys,

¹⁹ As ayns ynnyd yn askaid, ta att baney, as spot sollys baney, as lesh red ennagh dy yirgid, as shen er ny yeeaghyn da’n taggyrt;

²⁰ As tra ta’n saggyrt fakin eh, cur-my-ner, my te ayns shilley, ny s’diuney na’n chrackan, as y fynney er jyndaa bane: nee’n saggyrt briwnys eh neu-ghlen: she doghan y louraanys t’ayn, er vrishey magh ass yn askaid.

²¹ Agh my nee’n saggyrt jeeaghyn er, as cur-my-ner, nagh vel veg y fynney er jyndaa bane ayn, as mannagh vel eh ny s’diuney na’n chrackan, agh te red beg dorraghey: eisht nee’n saggyrt jeigh eh seose shiaght laa.

²² As my te skeayley magh mooarane ayns y chrackan, eisht nee’n saggyrt eh y vriwnys neu-ghlen; she’n louraanys t’ayn.

²³ Agh my ta’n cron sollys cummal ayns e ynnyd gyn skeayley, she askaid loshtee t’ayn; as nee’n saggyrt eh y vriwnys glen.

²⁴ Ny my ta feill erbee, ayns y chrackan echey, ta guin loshtee cheh, as dy vel ayns yn eill vio loshtee cron sollys, red beg jiarg, ny bane;

²⁵ Eisht nee’n saggyrt jeeaghyn er: as cur-my-ner, my ta ny renaigyn ayns y chron sollys er jyndaa bane, as ayns shilley, ny s’diuney na’n chrackan: she louraanys t’ayn er vrishey magh ayns y lostey: er shoh nee’n saggyrt eh y vriwnys neu-ghlen: te’n loihrey.

²⁶ Agh my nee’n saggyrt jeeaghyn er, as cur-my-ner, nagh vel y fynney bane er y chron sollys, as nagh vel eh veg s’diuney na’n chrackan, agh red beg dorraghey; eisht nee yn saggyrt jeigh seose eh shiaght laa.

²⁷ As nee yn saggyrt jeeaghyn er yn chiaghtoo laa: as my te er skeayley cooid vooar ayns y chrackan, eisht nee’n saggyrt eh y vriwnys neu-ghlen: yn loihrey t’ayn.

²⁸ Agh my ta’n cron sollys ’syn ynnyd myr ve, as nagh vel eh skeayley ’sy chrackan, agh jeeaghyn, red beg dorraghey; cha vel eh agh att veih’n lostey, as nee’n saggyrt eh y vriwnys glen: she chiass eh veih’n lostey.

²⁹ My ta ec dooinney ny ben doghan er y chione, ny’n aasaag,

³⁰ Eisht nee’n saggyrt jeeaghyn er y doghan: as cur-my-ner, my te, ayns shilley, ny s’diuney na’n chrackan, as fynney buigh thanney ayn: yn charrid chirrym eh, eer louraanys er y chione ny’n aasaag.

³¹ As my ta’n saggyrt jeeaghyn er doghan y charrid, as cur-my-ner, nagh vel eh, ayns shilley, ny s’diuney na’n chrackan, as nagh vel veg y folt doo ayn: eisht nee’n saggyrt jeigh seose eshyn ta’n doghan carragh er, shiaght laa.

³² As er y chiaghtoo laa nee’n saggyrt jeeaghyn er y doghan: as cur-my-ner, mannagh vel y charrid skeayley, as nagh vel y folt er jyndaa buigh ayn, as nagh vel y charrid, ayns shilley, ny s’diuney na’n chrackan.

³³ Bee eshyn er ny vaarey; agh y boayl carragh cha jean eh baarey: as nee’n saggyrt jeigh eh seose ta’n charrid er, shiaght laa sodjey.

³⁴ As er y chiaghtoo laa, nee’n saggyrt jeeaghyn er y boayl carragh: as cur-my-ner, mannagh vel y charrid er skeayley ’sy chrackan, ny ayns shilley, ny s’diuney na’n chrackan; eisht nee’n saggyrt eh y vriwnys glen: as nee eh niee e eaddagh, as bee eh glen.

³⁵ Agh my ta’n charrid skeayley cooid vooar ’sy chrackan lurg e ghlenney;

³⁶ Eisht nee’n saggyrt jeeaghyn er: as cur-my-ner, my ta’n charrid er skeayley ’sy chrackan, cha jean y saggyrt jeeaghyn son fynney buigh: t’eh neu-ghlen.

³⁷ Agh my ta’n charrid ayns e hilley myr ve, as dy vel folt doo er n’aase seose ayn; ta’n doghan er ny lheihys, t’eh glen: as nee’n saggyrt eh y vriwnys glen.

³⁸ Myrgeddin my ta ec dooinney ny ben ayns crackan yn eill oc spuitt sollys, ta shen spuitt sollys baney;

³⁹ Eisht nee’n saggyrt jeeaghyn; as cur-my-ner, my ta ny spuitt sollys ayns crackan yn eill oc glass; she boayl spottagh t’ayn, ta gaase ’sy chrackan; t’eh glen.

⁴⁰ As yn dooinney ta’n folt echey er duittym jeh e chione, cha vel eh agh meayl: t’eh glen.

⁴¹ As eshyn ta’n folt echey er duittym jeh veih erskyn glaare e eddin, t’eh meayl ’syn ayrn shen; t’eh glen.

⁴² As my ta ayns y chione meayl, cheu-chooylloo ny cheu-veealloo, ching banee jiarg; yn loihrey t’ayn, er n’irree seose ayns e chione meayl, ny erskyn e eddin meayl.

⁴³ Eisht nee’n saggyrt jeeaghyn er; as cur-my-ner, my ta att y ching bane jiarg ayns e chione meayl, ny erskyn e eddin meayl, myr ta’n louraanys ry-akin ayns crackan yn eill echey;

⁴⁴ T’eh ny lourane, t’eh neu-ghlen: nee’n saggyrt eh y vriwnys ooilley-magh neu-ghlen; ta’n doghan ayns e chione.

⁴⁵ As y lourane, ta’n doghan er, bee eh ayns eaddagh raipit, as e chione rooisht, as ver eh coodagh er e veill heose, as nee eh geam, Neu-ghlen, neu-ghlen.

⁴⁶ Ooilley ny laghyn vees y doghan er, t’eh neu-ghlen; t’eh neu-ghlen: nee eh baghey ny-lomarcan; cheu-mooie jeh’n champ vees e ynnyd-vaghee.

⁴⁷ Yn garmad neesht ta’n doghan ayn, my she garmad olley, ny garmad lieen eh.

⁴⁸ My she ’sy ghloo ny ’syn innagh te, dy lieen, ny dy ollan; ny ayns crackan, ny ayns obbyr erbee jeant dy chrackan:

⁴⁹ As my vees y spot geayney ny jiarg ayns y gharmad, ny ’sy chrackan, edyr ayns y ghloo, ny ’syn innagh, ny ayns stoo erbee dy chrackan; she doghan y louraanys t’ayn, as bee eh er ny yeeaghyn da’n taggyrt.

⁵⁰ As nee’n saggyrt jeeaghyn er y doghan, as ver eh dy lhiattee eshyn ta’n doghan ayn, shiaght laa.

⁵¹ As nee eh jeeaghyn er y doghan y chiaghtoo laa: as my te er skeayley ayns y gharmad, edyr ayns y ghloo, ny ayns yn innagh, ny ayns obbyr erbee ta jeant jeh crackan; loihrey dewil eh; te neu-ghlen.

⁵² Loshtee eh eisht yn garmad shen, edyr gloo ny innagh, ayns ollan ny lieen, ny stoo erbee dy chrackan, ayn ta’n doghan: son loihrey dewil eh; bee eh er ny lostey ’syn aile.

⁵³ As my hee-ys y saggyrt, as cur-my-ner, nagh vel y doghan er skeayley ’sy gharmad, edyr ayns y ghloo ny ayns yn innagh, ny ayns stoo erbee dy chrackan;

⁵⁴ Eisht nee’n saggyrt sarey, dy jean ad niee shen ta’n doghan ayn, as ver eh dy lhiattee eh shiaght laa sodjey.

⁵⁵ As nee’n saggyrt jeeaghyn er y doghan, lurg da ve nieet: as cur-my-ner, mannagh vel y doghan er caghlaa e ghaah, ga nagh vel eh er skeayley; te neu-ghlen, nee oo eh y lostey ’syn aile; te eeit ny hrooid, edyr eh ve lhome cheu-sthie ny cheu-mooie.

⁵⁶ As my ta’n saggyrt jeeaghyn, as cur-my-ner, dy vel y doghan red ennagh dorraghey, lurg da ve nieet; eisht nee eh shen y yiarey ass y gharmad, ny ass y chrackan, ny ass y ghloo, ny ass yn innagh.

⁵⁷ As my te foast cheet rish ayns y gharmad, edyr ayns y ghloo, ny ayns yn innagh, ny ayns red erbee dy chrackan; te doghan ta skeayley; nee oo lostey shen, ta’n doghan ayn, ’syn aile.

⁵⁸ As yn garmad, edyr gloo, ny innagh, ny jeh stoo erbee dy chrackan vees nieet, my ta’n doghan er n’gholl assdoo, eisht bee eh nieet yn nah cheayrt, as bee eh glen.

⁵⁹ Shoh’n leigh mychione y doghan dy louraanys, ayns garmad dy ollan ny dy lieen, edyr gloo ny innagh, ny ayns stoo erbee dy chraitnyn; dy vriwnys eh glen, ny dy vriwnys eh neu-ghlen.