Leviticus 12 - Yn Vible Casherick 1775 1819

CAB. XII

¹ As loayr y Chiarn rish Moses, gra,

² Loayr rish cloan Israel, gra, My ta ben er yientyn, as er ymmyrkey lhiannoo-mac: eisht bee ish neu-ghlen shiaght laa: cordail rish ny laghyn-scarree, er coontey’n doghan dooghyssagh eck bee ish neu-ghlen.

³ As er yn hoghtoo laa, bee eh er ny yiarey-chymmylt ’syn eill.

⁴ As eisht nee ish tannaghtyn ayns e ghlenney-folley three laa jeig as feed: cha benn ee rish nhee erbee casherick, ny cheet ayns yn ynnyd casherick, derrey vees laghyn e ghlenney cooilleenit.

⁵ As my t’ee gymmyrkey lhiannoo-inneen, eisht bee ish neu-ghlen daa hiaghtin, myr ayns y traa-scarree eck: as nee ish tannaghtyn ayns e ghlenney-folley, three-feed as shey laa.

⁶ As tra ta laghyn e ghlenney cooilleenit, son mac, ny son inneen; ver ee lh’ee eayn jeh’n chied vleïn son oural-losht, as eean calmane, ny calmane-turtle son oural-peccah, gys dorrys y chabbane-agglish gys y taggyrt:

⁷ Eh nee shen y hebbal roish y Chiarn, as jannoo lhiasaghey er e son; as bee ish glennit veih’n roie-folley eck. Shoh’n leigh jeeish ta er n’ymmyrkey mac ny inneen.

⁸ As mannagh bee’n fort eck dy chur lh’ee eayn, eisht ver ee lh’ee daa chalmane-turtle, ny daa eean calmane; yn derrey yeh son yn oural-losht, as y jeh elley son oural-peccah: as nee’n saggyrt jannoo lhiasaghey er e son, as bee ish glen.