Leviticus 11 - Yn Vible Casherick 1775 1819

CAB. XI

¹ As loayr y Chiarn rish Moses, as rish Aaron, gra roo,

² Loayr-jee rish cloan Israel gra, Ad shoh ny beiyn nee shiuish gee mastey ooilley beiyn y thallooin.

³ Cre-erbee ta rheynn yn yngyn, as ta lesh cass skeilt, as caigney-cheeilley mastey ny beiyn, shen nee shiu gee.

⁴ Agh ad shoh cha jean shiu gee, jeusyn ta caigney-cheeilley, ny jeusyn ta rheynn yn yngyn; lheid as y camel, ga dy vel eh caigney-cheeilley, agh cha vel eh rheynn yn yngyn: te neu-ghlen diu.

⁵ As y conning, ga dy vel eh caigney-cheeilley, agh cha vel eh rheynn yn yngyn, te neu-ghlen diu.

⁶ As yn mwaagh, er-yn-oyr, dy vel eh caigney-cheeilley, agh cha vel eh rheynn yn yngyn: te neu-ghlen diu.

⁷ As y vuc, ga dy vel eh rheynn yn yngyn, as skeilt-chassagh; ny-yeih cha vel eh caigney-cheeilley ta neu-ghlen diu.

⁸ Jeh’n eill oc cha jean shiu gee: as rish y chorp marroo oc cha jean shiu bentyn: t’ad neu-ghlen diu.

⁹ Ad shoh nee shiu gee: jeh ooilley ny t’ayns ny ushtaghyn cre-erbee ta skianyn as scaailey er, ayns ny ushtaghyn, ayns ny faarkaghyn, as ayns ny awinyn; ad shen foddee shiu gee.

¹⁰ As ooilley nagh vel skianyn ny scaailey orroo ayns ny faarkaghyn, as ayns ny awinyn, jeh ooilley ny ta snaue ayns ny ushtaghyn, ny jeh nhee erbee bio, ta ayns ny ushtaghyn; bee ad feohdoil diu.

¹¹ Bee ad eer feohdoil diu: cha jean shiu gee jeh’n eill oc, agh bee ny kirp oc feohdoil diu.

¹² Cre-erbee nagh vel skianyn, ny scaailey er ayns ny ushtaghyn, bee eh feohdoil diu.

¹³ As shoh adsyn, vees feohdoil diu, mastey ny eeanlee; cha bee ad er nyn ee, t’ad feohdoil: yn eagle, as yn ossifrage, as yn ospray,

¹⁴ As y vulture, as y shyrragh, lurg e ghooie,

¹⁵ Dy chooilley feeagh lurg e ghooie,

¹⁶ As y hullad, as y shawk-oie, as y chooag, as dagh shawk, lurg e ghooie,

¹⁷ As yn hullad beg, as y cormorant, as yn hullad mooar,

¹⁸ Yn ollay, as y pelican, as yn urley sloo,

¹⁹ As y stork, yn choar lurg e ghooie, as yn earkan, as y chraitnag.

²⁰ Dy chooilley pheisteig skianagh ta snaue er kiare cassyn, bee ad feohdoil diu.

²¹ Agh ad shoh foddee shiu gee jeh dy chooilley chretoor etlagh snauee, ta goll er kiare cassyn, as lurgaghyn oc erskyn nyn gassyn, dy lheim lhieu er y thalloo:

²² Jeu shoh hene foddee shiu gee; yn locust lurg e ghooie, as y locust-meayl lurg e ghooie, as y locust sloo lurg e ghooie, as y lheimeyder-faiyr lurg e ghooie.

²³ Agh dy chooilley nhee etlagh elley, ta snaue er kiare cassyn, vees feohdoil diu.

²⁴ Son lioroo shoh bee shiu neu-ghlen: quoi-erbee vennys rish y chorp marroo oc, bee eh neu-ghlen derrey’n astyr.

²⁵ As quoi-erbee hroggys lesh veg jeh’n challin oc, shegin da niee e choamrey, as bee eh neu-ghlen derrey’n astyr.

²⁶ Callinyn dagh baagh ta rheynn yn yngyn, as nagh vel e chass skeilt, ny caigney-cheeilley, t’ad neu-ghlen diu: bee dagh unnane vennys roo neu-ghlen.

²⁷ As cre-erbee ta goll er e spaagyn, mastey ooilley ny beiyn kiare-chassagh, t’ad shoh neu-ghlen diu: quoi-erbee vennys rish ny callinyn oc, bee eh neu-ghlen derrey’n astyr.

²⁸ As eshyn hroggys y challin oc, lhig da niee e eaddagh, as bee eh neu-ghlen derrey’n astyr: t’ad neu-ghlen diu.

²⁹ Bee ad shoh neesht neu-ghlen diu, mastey reddyn snauee y thallooin; yn assag, as y lugh, as y tortoise lurg e ghooie,

³⁰ As y ferret, as y chameleon, as y lizard, as y chrammag, as y mole.

³¹ T’ad shoh neu-ghlen diu mastey dy chooilley nhee snauee: quoi-erbee vennys roo, as ad marroo, bee eh neu-ghlen derrey’n astyr.

³² As er cre-erbee nee veg jeu tuittym, as ad marroo, bee shen neu-ghlen; edyr eh ve saagh-fuygh, ny coamrey, ny crackan, ny sack; saagh erbee t’er ny ve ayns ymmyd, te dy ve currit ayns ushtey, as bee eh neu-ghlen derrey’n astyr: myr shen vees eh er ny ghlenney.

³³ As dy chooilley haagh craie, nee veg jeu tuittym ayn, cre-erbee t’ayn bee eh neu-ghlen; as nee shiu brishey eh.

³⁴ Jeh dy chooilley vee cooie son beaghey, as lheid yn ushtey dy heet er, bee eh neu-ghlen: as dy chooilley yough ta iut ass lheid y saagh, bee eh neu-ghlen.

³⁵ As dy chooilley nhee, er huittys ayrn erbee jeh’n challin, bee shen neu-ghlen, lheid as oghe, ny binkyn son siyn craie, bee ad er nyn mrishey sheese; son t’ad neu-ghlen, as bee ad neu-ghlen diu.

³⁶ Ny-yeih, farrane ny chibbyr raad ta palchey ushtey, bee shen glen: agh shen vennys rish y challin oc, bee eh neu-ghlen.

³⁷ As my ta veg jeh’n challin oc tuittym er sheel correy erbee, ta dy ve cuirt, bee shen glen.

³⁸ Agh my vees veg yn ushtey er ny choyrt er y rass, as ayrn erbee jeh’n challin oc tuittym er shen, bee eh neu-ghlen diu.

³⁹ As my ta baagh erbee, ta cooie son beaghey, geddyn baase; bee eshyn vennys rish y challin echey neu-ghlen derrey’n astyr

⁴⁰ As nee eshyn, ta gee jeh’n eill echey, niee e eaddagh, as bee eh neu-ghlen derrey’n astyr.

⁴¹ As dagh nhee ta snaue er yn ooir bee shen feohdoil, cha bee eh er ny ee.

⁴² Cre-erbee ta snaue er e volg, as cre-erbee ta goll er kiare cassyn, ny cre-erbee ta ny smoo dy chassyn echey, mastey ooilley reddyn snauee yn ooir, ad shoh cha jean shiu gee; son t’ad feohdoil.

⁴³ Cha jean shiu neu-ghlen jiu hene lesh red snauee erbee, chamoo nee shiu shiu hene y vroghey lioroo.

⁴⁴ Son mish y Chiarn y Jee eu: nee shiu er-y-fa shen shiu hene y chasherickey, as bee shiu casherick, son ta mish casherick; chamoo nee shiu neu-ghlen jiu hene lesh keint erbee dy red snauee t’er yn ooir.

⁴⁵ Son ta mish y Chiarn, hug lhiam shiu magh ass cheer Egypt, dy ve yn Jee eu: bee-jee shiuish er-y-fa shen casherick, son ta mish casherick.

⁴⁶ Shoh yn leigh mychione ny beiyn, as mychione ny eeanlee, as mychione dy chooilley cretoor bio ta snaue ayns ny ushtaghyn, as dy chooilley chretoor ta snaue er yn ooir.

⁴⁷ Dy scarrey eddyr neu-ghlen as glen, eddyr yn baagh ta cooie son beaghey, as y baagh nagh vel cooie.