Joshua 21 - Yn Vible Casherick 1775 1819

CAB. XXI

¹ Eisht haink er-gerrey ard-gheiney ayraghyn ny Leviteyn gys Eleazar y saggyrt, as gys Joshua mac Nun, as gys ny shenn-ayryn leeideilee tribeyn Israel;

² As loayr ad roo ec Shiloh ayns cheer Chanaan, gra, Hug y Chiarn sarey liorish Moses dy choyrt dooin ard-valjyn dy chummal ayndoo, marish ny gleebyn mygeayrt-y-moo son nyn maase.

³ As hug cloan Israel da ny Leviteyn ass nyn eiraght hene, ec sarey’n Chiarn, ny ard-valjyn shoh lesh nyn ghleebyn.

⁴ As haink yn lot magh son kynneeyn ny Kohathiteyn: as ec ny Leviteyn, cloan Aaron y saggyrt, va three ard-valjyn jeig liorish lot, veih tribe Yudah, as tribe Simeon, as tribe Venjamin.

⁵ As v’ec y chooid elley jeh cloan Kohath liorish lot, veih kynneeyn tribe Ephraim, as tribe Dan, as veih lieh-tribe Vanasseh, jeih ard-valjyn.

⁶ As v’ec cloan Ghershom liorish lot, veih kynneeyn tribe Issachar, as veih tribe Asher, as veih tribe Naphtali, as veih lieh-tribe Vanasseh ayns Bashan, three ard-valjyn jeig.

⁷ Va ec cloan Merari lurg nyn gynneeyn, veih tribe Reuben, as veih tribe Ghad, as veih tribe Zebulun, daa ard-valley jeig.

⁸ As hug cloan Israel liorish lot da ny Leviteyn ny ard-valjyn shoh marish ny gleebyn mygeayrt-y-moo, myr va’n Chiarn er harey liorish Moses.

⁹ As hug ad ass tribe cloan Yudah, as veih tribe cloan Simeon, ny ard-valjyn shoh myr t’ad ayns shoh enmyssit:

¹⁰ Ad shoh hooar cloan Aaron, va jeh kynney ny Kohathiteyn, jeh cloan Levi: (son lhieusyn va’n chied chronney.)

¹¹ As hug ad daue ard-valley Arba ayr Anak, (ta shen Hebron,) ayns cheer sleitagh Yudah, lesh y ghleeb va lhie mygeayrt-y-mysh.

¹² Agh magheryn yn ard-valley, as ny baljyn-beggey, hug ad da Caleb mac Jephunneh son yn eiraght echeysyn.

¹³ Myr shoh hug ad da cloan Aaron y saggyrt, Hebron lesh e gleebyn, dy ve son ard-valley dy hauchys da’n marrooder, as Libnah lesh e gleebyn,

¹⁴ As Jattir lesh e gleebyn, as Eshtemoa lesh e gleebyn,

¹⁵ As Holon lesh e gleebyn, as Debir lesh e gleebyn,

¹⁶ As Ain lesh e gleebyn, as Juttah lesh e gleebyn, as Beth-shemesh lesh e gleebyn; nuy ard-valjyn ass y daa hribe shen.

¹⁷ As veih tribe Venjamin, Gibeon lesh e gleebyn, Geba lesh e gleebyn,

¹⁸ Anathoth lesh e gleebyn, as Almon lesh e gleebyn; kiare ard-valjyn.

¹⁹ Va ooilley ard-valjyn cloan Aaron, ny saggyrtyn, three ard-valjyn jeig, marish ny gleebyn oc.

²⁰ As va ec sluight cloan Kohath, ny Leviteyn v’er-mayrn jeh cloan Kohath, ard-valjyn nyn gronney ass tribe Ephraim.

²¹ Son hug ad daue Shechem, lesh e gleebyn ayns cronk Ephraim, son ard-valley dy hauchys da’n marrooder, as Gezer lesh e gleebyn,

²² As Kibzaim as e gleebyn, as Beth-horon lesh e gleebyn; kiare ard-valjyn.

²³ As veih tribe Dan, Eltekeh lesh e gleebyn, as Gibbethon lesh e gleebyn,

²⁴ As Aijalon, as Gath-rimmon lesh e gleebyn; kiare ard-valjyn.

²⁵ As veih lieh-tribe Vanasseh, Taanach lesh e gleebyn, as Gath-rimmon lesh e gleebyn; daa ard-valley.

²⁶ Va ooilley ny ard-valjyn jeih, lesh nyn ghleebyn, son y chooid elley jeh kynneeyn cloan Kohath.

²⁷ As da cloan Ghershom, jeh kynney ny Leviteyn, veih lieh-tribe elley Vanasseh, hug ad Golan ayns Bashan, lesh e gleebyn, son ard-valley dy hauchys da’n marrooder; as Beesh-terah lesh e gleebyn; daa ard-valley.

²⁸ As veih tribe Issachar, Kishon, as Dabareh, lesh nyn ghleebyn.

²⁹ Jarmuth, as En-gannim, lesh nyn ghleebyn; kiare ard-valjyn.

³⁰ As veih tribe Asher, Mishal, as Abdon, lesh nyn ghleebyn,

³¹ As Helkath, as Rehob lesh nyn ghleebyn; kiare ard-valjyn.

³² As veih tribe Naphtali, Kedesh ayns Galilee, lesh e gleebyn, son ard-valley dy hauchys da’n marrooder, as Hammoth-dor, as Kartan, lesh nyn ghleebyn; three ard-valjyn.

³³ Va ooilley ard-valjyn ny Gershoniteyn, lurg nyn gynneeyn, three ard-valjyn jeig marish nyn ghleebyn.

³⁴ As va ec kynneeyn cloan Merari, ny Leviteyn elley, veih tribe Zebulun, Jokneam, as Kartah, lesh nyn ghleebyn,

³⁵ Dimnah, as Nahalal, lesh nyn ghleebyn; kiare ard-valjyn.

³⁶ As veih tribe Reuben, Bezer, as Jahazah, lesh nyn ghleebyn,

³⁷ As Kedemoth, as Mephaath, lesh nyn ghleebyn; kiare ard-valjyn.

³⁸ As veih tribe Ghad, Ramoth ayns Gilead lesh e gleebyn, dy ve ard-valley dy hauchys da’n marrooder; as Mahanaim lesh e gleebyn,

³⁹ Heshbon, as Jazer, lesh nyn ghleebyn; kiare ard-valjyn.

⁴⁰ Myr shoh, ooilley ny ard-valjyn son cloan Merari, liorish nyn gynneeyn, va’n chooid elley jeh sluight ny Leviteyn, v’ad liorish nyn gronney daa ard-valley jeig.

⁴¹ Va ooilley ard-valjyn ny Leviteyn trooid eiraght cloan Israel, hoght ard-valjyn as da-eed, lesh nyn ghleebyn.

⁴² Va ooilley ny ard-valjyn shoh, as nyn ghleebyn mygeayrt-y-moo: shoh myr v’ad ooilley.

⁴³ As hug y Chiarn da Israel ooilley’n thalloo vreear eh dy choyrt da ny ayraghyn oc: as ve oc son eiraght, as chum ad ayn.

⁴⁴ As hug y Chiarn daue shee er dy chooilley heu, cordail rish bree yn loo ren eh da ny ayraghyn oc: as cha hass dooinney jeh ooilley nyn noidyn kiongoyrt roo; livrey’n Chiarn ooilley nyn noidyn gys nyn laue.

⁴⁵ Cha ren nhee erbee failleil jeh ooilley ny reddyn mie shen va’n Chiarn er yialdyn da thie Israel; ve dy slane cooilleenit.