Joshua 2 - Yn Vible Casherick 1775 1819

CAB. II

¹ As hug Joshua mac Nun magh daa ghooinney veih Shittim dy vriaght dy follit, gra roo, Immee-jee, gow-jee baght mie jeh’n cheer, dy jarroo jeh Jericho. As jimmee ad, as haink ad gys thie ben oast, enmyssit Rahab, as ghow ad aaght ayns shen.

² As ve er ny insh da ree Yericho, gra, Cur-my-ner, ta deiney er jeet stiagh ayns shoh noght jeh cloan Israel, dy scrial magh y cheer.

³ As hug ree Yericho fys gys Rahab, gra, Cur lhiat magh ny deiney t’er jeet hood’s, as ta nish ayns dty hie: son er-chee dy scrial magh ooilley yn cheer t’ad er jeet.

⁴ As ghow’n ven yn daa ghooinney, as ren ee follaghey ad, as dooyrt ec, Haink deiney gys my hie, agh cha row fys aym cre veih v’ad.

⁵ As haink eh gy-kione, mysh traa dooney ny giattey, ’sy chomleayrtys, dy jagh ny deiney magh: cre’n raad hie ny deiney cha vel fys aym: eiyr-jee orroo dy tappee; son berree shiu orroo.

⁶ Agh va ish er choyrt lh’ee ad seose gys mullagh y thie, as er vollaghey ad lesh gish dy lieen, v’ee er chiartaghey er mullagh y thie.

⁷ As hie ny deiney er nyn eiyrt’s yn raad gys Jordan, choud’s ny aaghyn: as cha leah as va ny eiyrtyssee er n’gholl magh, yeigh ad y giat.

⁸ As roish my row ad er lhie sheese, haink ee seose huc gys mullagh y thie;

⁹ As dooyrt ee rish ny deiney, Ta fys aym dy vel y Chiarn er choyrt diu yn cheer, as dy vel atchim reueish er duittym orrinyn, as dy vel ooilley cummaltee yn cheer er choayl nyn mree kyndagh riuish.

¹⁰ Son ta shin er chlashtyn kys ren y Chiarn chyrmaghey seose ushtey yn Aarkey Jiarg er ny son euish, tra haink shiu magh ass cheer Egypt; as cre ren shiu rish daa ree ny Amoriteyn va er cheu elley dy Yordan, Sihon as Og, ren shiu stroie dy bollagh.

¹¹ As cha leah’s cheayll shin ny reddyn shoh, ren ny creeaghyn ain lheïe, chamoo va veg y vree ayns dooinney erbee, kyndagh riuish: son y Chiarn yn Jee eu, t’eh ny Yee ayns niau heose, as er y thalloo wass.

¹² Nish er-y-fa shen, ta mee guee erriu, loo-jee dou liorish y Chiarn, fakin dy vel mish er yeeaghyn kenjallys diuish, dy jean shiuish myrgeddin kenjallys y yeeaghyn da thie my ayrey; as cur-jee cowrey shickyr dou:

¹³ As dy jean shiu sauail bio my ayr, as my voir, as my vraaraghyn, as my hayraghyn, as ooilley ny t’oc, as nyn mioys y livrey veih baase.

¹⁴ As dreggyr ny deiney ee, yn vioys ain son y vioys euish, my nee shiu keiltyn yn chooish ta shin mysh. As hig eh gy-kione, tra vees y Chiarn er choyrt dooin yn cheer, dy jean mayd dellal dy dooie as dy firrinagh rhyt.

¹⁵ Eisht lhig ee sheese ad er coyrd trooid yn uinniag: son va’n thie eck er voalley yn valley, as v’ee cummal er y voalley.

¹⁶ As dooyrt ee roo, Cosne-jee gys y clieau, er-aggle dy berr ny eiyrtyssee erriu; as follee-jee shiu hene ayns shen three laa, derrey vees ny eiyrtyssee er jyndaa: as ny lurg shen foddee shiu goll er nyn raad.

¹⁷ As dooyrt ny deiney ree, Bee mayd seyr jeh’n loo shoh t’ou uss er choyrt orrin dy ghoaill.

¹⁸ Jeeagh, tra hig mayd gys y cheer, nee oo yn skeog shoh dy naie scarleod y chiangley ’syn uinniag ny hrooid ren oo shin y lhiggey sheese; as ver oo lhiat dty ayr, as dty voir, as dty vraaraghyn, as ooilley lught-thie dty ayrey, gys dty hie hene.

¹⁹ As hig eh gy-kione, quoi-erbee hed magh er dorryssyn dty hie gys y traid, dy bee yn uill echey er y chione hene, as bee shinyn neu-chyndagh: as quoi-erbee vees mayrt’s ayns y thie, bee yn uill echeysyn er y chione ain, my ver dooinney erbee laue er.

²⁰ As my nee uss shoh nyn gooish y vrah, eisht vees shinyn feayshlit veih’n loo hug oo orrin y ghoaill.

²¹ As dooyrt ish, Cordail rish ny goan eu hene myr shen dy row eh. As hug ee ad ersooyl, as hie ad roue, as chiangle ee yn skeog scarleod syn uinniag.

²² As chossyn ad roue, as haink ad gys y clieau, as duirree ad ayns shen three laa, derrey va ny eiyrtyssee er jyndaa: As ren ny eiyrtyssee briaght er nyn son trooid ooilley yn raad, agh cha row ad ry-gheddyn.

²³ Myr shen hyndaa y daa ghooinney, as haink ad neose veih’n clieau, as hie ad harrish (Jordan), as haink ad gys Joshua mac Nun, as dinsh ad da ooilley v’er daghyrt daue:

²⁴ As dooyrt ad rish Joshua, Dy feer ta’n Chiarn er livrey ooilley yn cheer gys ny laueyn ain; son ta eer ooilley cummaltee ny cheerey coayl nyn gree ayns aggle roïn.