Joshua 19 - Yn Vible Casherick 1775 1819

CAB. XIX

¹ As haink yn nah lot magh er Simeon, ta shen er tribe cloan Simeon lurg nyn gynneeyn: as va’n eiraght oc cheu-sthie jeh eiraght cloan Yudah.

² As v’oc ayns nyn eiraght, Beer-sheba, as Sheba, as Moladah,

³ As Hazar-shual, as Balah, as Azem,

⁴ As Eltolad, as Bethul, as Hormah,

⁵ As Ziklag, as Beth-marcaboth, as Hazar-susah,

⁶ As Beth-lebaoth, as Sharuhen; three ard-valjyn jeig, as nyn maljyn-beggey:

⁷ Ain, Remmon, as Ether, as Ashan; kiare ard-valjyn, as nyn maljyn-beggey:

⁸ As ooilley ny baljyn-beggey va mygeayrt ny ard-valjyn shoh gys Baalath-beer, Ramath ’sy jiass. Shoh eiraght tribe cloan Simeon lurg nyn gynneeyn.

⁹ Ass ayrn cloan Yudah va eiraght cloan Simeon; son va ayrn ro vooar ec cloan Yudah; shen-y-fa va eiraght cloan Simeon er cheu-sthie jeh’n eiraght ocsyn.

¹⁰ As haink y trass lot magh er cloan Zebulun, cordail rish nyn gynneeyn: as va cagliagh yn eiraght oc derrey Sarid:

¹¹ As hie’n chagliagh oc seose lesh y cheayn, as Maralah, as rosh eh gys Dabbasheth, as veih shen gys yn awin ta roish Jokneam;

¹² As hyndaa eh shiar veih Sarid lesh irree ny greïney, gys cagliagh Chisloth-tabor, as eisht goll magh gys Daberath, as seose gys Japhia,

¹³ As veih shen te goll er y hoshiaght lesh y shiar gys Gittah-hepher, gys Ittah-kazin, as goll magh lesh Remmon-methoar gys Neah:

¹⁴ As ta’n chagliagh goll mygeayrt er y cheu-twoaie gys Hannathon: as ta’n kione mooie echey ayns coan Jiphthah-el:

¹⁵ As Kattath, as Nahallal, as Shimron, as Idala, as Beth-lehem: daa ard-valley jeig, marish nyn maljyn-beggey.

¹⁶ Shoh eiraght cloan Zebulun cordail rish nyn gynneeyn, ny ard-valjyn shoh, marish nyn maljyn-beggey.

¹⁷ As haink yn chiarroo lot magh er cloan Issachar cordail rish ny kynneeyn oc.

¹⁸ As roie’n chagliagh ocsyn lesh Jezreel, as Chesulloth, as Shunem,

¹⁹ As Hapharaim, as Shion, as Anaharath,

²⁰ As Rabbith, as Kishion, as Abez,

²¹ As Remeth, as En-gannim, as En-haddah, as Beth-pazzez;

²² As ta’n chagliagh roshtyn gys Tabor, as Shahazimah, as Beth-shemesh; as va kione nyn gagliagh ec Jordan: shey ard-valjyn jeig, marish nyn maljyn-beggey.

²³ Shoh eiraght tribe cloan Issachar cordail rish nyn gynneeyn, ny ard-valjyn, as ny baljyn-beggey.

²⁴ As haink yn wheiggoo lot magh son tribe cloan Asher cordail rish nyn gynneeyn.

²⁵ As va’n chagliagh ocsyn Helkath, as Hali, as Beten, as Achshaph,

²⁶ As Alammelech, as Amad, as Misheal; as roshtyn gys Carmel lesh y sheear, as gys Shihor-libnath;

²⁷ As chyndaa lesh y shiar gys Beth-dagon, as roshtyn gys Zebulun, as gys coan Jiphthah-el, lesh y twoaie jeh Veth-emek, as Neiel, as goll magh gys Cabul, er y laue chiare,

²⁸ As Hebron, as Rehob, as Hammon, as Kanah, choud as Zidon mooar;

²⁹ Eisht ta’n chagliagh chyndaa gys Ramah, as gys ard-valley lajer Tyre; as veih shen gys Hosah; as ta’n kione echey ec y cheayn, veih’n traie gys Achzib:

³⁰ Ummah myrgeddin, as Aphek, as Rehob: daa ard-valley as feed marish nyn maljyn-beggey.

³¹ Shoh eiraght tribe cloan Asher cordail rish nyn gynneeyn, ny ard-valjyn shoh, marish nyn maljyn-beggey.

³² Haink y cheyoo lot magh son cloan Naphtali, lurg nyn gynneeyn.

³³ As va’n chagliagh ocsyn veih Heleph, veih Allon gys Zaanannim, as Adami, Nekeb, as Jabneel, derrey Lakum; as va’n kione b’odjey magh jeh ec Jordan;

³⁴ As eisht ta’n chagliagh chyndaa sheear gys Aznoth-tabor, as magh veih shen gys Hukkok, as roshtyn gys Zebulun er y cheu jiass, as gys Asher er y cheu-heear, as gys Judah er Jordan lesh y shiar.

³⁵ As ny ard-valjyn fencit t’ad Ziddim, Zer, as Hammath, Rakkath, as Cinnereth.

³⁶ As Adamah, as Ramah, as Hazor,

³⁷ As Kedesh, as Edrei, as En-hazor,

³⁸ As Iron, as Migdal-el, Horem, as Beth-anath, as Beth-shemesh; nuy ard-valjyn jeig marish nyn maljyn-beggey.

³⁹ Shoh eiraght tribe cloan Naphtali cordail rish nyn gynneeyn, ny ard-valjyn, as nyn maljyn-beggey.

⁴⁰ As haink yn chiaghtoo lot magh son tribe cloan Dan cordail rish nyn gynneeyn.

⁴¹ As va cagliagh nyn eiraght Zorah, as Eshtaol, as Ir-shemesh,

⁴² As Shaalabbin, as Ajalon, as Jethlah,

⁴³ As Elon, as Thimnathah, as Ekron,

⁴⁴ As Eltekeh, as Gibbethon, as Baalath,

⁴⁵ As Jehud, as Bene-berak, as Gath-rimmon,

⁴⁶ As Me-jarkon, as Rakkon, as y slyst jeeragh er Japho.

⁴⁷ As va cagliagh cloan Dan ro choon er nyn son: shen-y-fa hie cloan Dan seose dy chaggey noi Leshem, as ghow ad eh, as woaill ad eh lesh foyr y chliwe, as ghow ad possession jeh, as chum ad ayn, as Leshem denmys ad Dan, lurg ennym Dan nyn shenn-ayr.

⁴⁸ Shoh eiraght tribe cloan Dan cordail rish nyn gynneeyn, ny ard-valjyn shoh, marish nyn maljyn-beggey.

⁴⁹ Erreish daue v’er rheynn y cheer son eiraght da ny tribeyn, hug cloan Israel eiraght da Joshua mac Nun ny mast ’oc:

⁵⁰ Cordail rish raa’n Chiarn, hug ad da yn ard-valley v’eh er yeearree, eer Timnath-serah ayns cronk Ephraim: as hrog eh yn ard-valley, as chum eh ayn.

⁵¹ Shoh ny eiraghtyn ren Eleazar y saggyrt, as Joshua mac Nun, as ard-reiltee tribeyn cloan Israel, y rheynn liorish lottyn son eiraght ayns Shiloh kiongoyrt rish y Chiarn, ec dorrys y chabbane-agglish: as shoh myr rheynn ad y cheer.