Joshua 18 - Yn Vible Casherick 1775 1819

CAB. XVIII

¹ As va slane sheshaght cloan Israel er nyn jaglym cooidjagh ec Shiloh, as hoie ad seose y chabbane-agglish ayns shen. As va’n slane cheer lhieu hene.

² As va mastey cloan Israel shiaght tribeyn nagh row foast er gheddyn nyn eiraght.

³ As dooyrt Joshua rish cloan Israel, Caïd vees shiu lhag dy ghoaill possession jeh’n cheer ta’n Chiarn Jee ny ayraghyn eu er choyrt diu?

⁴ Reih-jee veih ny mast’ eu three deiney ass dagh tribe: as ver-ym magh ad, as hed ad mygeayrt trooid y cheer, as nee ad soiaghey magh eh cordail rish nyn eiraght, as hig ad reesht hym’s.

⁵ As rheynnee ad eh ayns shiaght ayrnyn: nee Judah tannaghtyn ayns nyn eiraght hene my-yiass, as nee thie Yoseph cummal ayns nyn eiraght hene my-hwoaie.

⁶ Nee shiu er-y-fa shen soiaghey magh y cheer ayns shiaght ayrnyn, as ver shiu roym’s yn rheynn ta shiu er n’yannoo, dy voddym lottyn y hilgey er nyn son ayns shoh kiongoyrt rish y Chiarn nyn Yee.

⁷ Agh cha vel ayrn ec ny Leviteyn nyn mastey; son ta saggyrtys y Chiarn yn eiraght ocsyn: as ta Gad as Reuben, as lieh-tribe Vanasseh, er gheddyn nyn eiraght shiar veih Jordan, shen hug Moses sharvaant y Chiarn daue.

⁸ As hrog ny deiney orroo, as hie ad rhymboo: as hug Joshua currym orroosyn hie dy rheynn y cheer, gra, Immee-jee as shooyl-jee trooid y cheer, as soie-jee magh eh, as tar-jee reesht hym’s, dy voddyms ayns shoh lottyn y cheau er nyn son kiongoyrt rish y Chiarn ayns Shiloh.

⁹ As jimmee ny deiney, as hie ad trooid y cheer, as hoie ad eh magh ayns shiaght ayrnyn, ayns lioar, lurg nyn ard-valjyn; as haink ad gys Joshua reesht gys y champ ec Shiloh.

¹⁰ As cheau Joshua lottyn er nyn son ayns Shiloh kiongoyrt rish y Chiarn: as ayns shen rheynn Joshua yn cheer er cloan Israel, myr ve er ny hoiaghey magh.

¹¹ As haink lot tribe cloan Venjamin magh cordail rish nyn gynneeyn: as haghyr ayrn y lot ocsyn dy ve eddyr cloan Yudah as cloan Yoseph.

¹² As va’n chagliagh oc er y twoaie veih Jordan, as hie eh seose rish lhiattee Yericho er cheu-twoaie, as seose trooid ny sleityn lesh y sheear; as va’n kione echey ec faasagh Veth-aven.

¹³ As roie’n chagliagh harrish veih shen lesh Luz, rish lhiattee Luz, (ta Beth-el,) my-yiass; as hie’n chagliagh sheese gys Ataroth-adar, er-gerrey da’n chronk ta lhie er cheu-jiass yn Veth-horon heese.

¹⁴ As va’n chagliagh tayrnit veih shen, goaill combaase lesh y sheear-ass gys y cheayn, veih’n chronk ta lhie jeeragh er Beth-horon my-yiass; as va’n kione echey ec Kirjath-baal, (ta shen Kirjath-jearim,) ard-valley cloan Yudah: shoh va’n lhiattee heear.

¹⁵ As va’n lhiattee jiass veih kione Kirjath-jearim; as roie’n chagliagh sheear, gys chibbyr ushtaghyn Nephtoah:

¹⁶ As haink eh neose gys kione y clieau ta lhie jeeragh er coan mac Hinnom, as ta ayns glione ny foawir my-hwoaie, as hie eh sheese lesh coan Hinnom, gys lhiattee Yebusi er y jiass, as sheese gys Enrogel,

¹⁷ As ve tayrnit veih’n twoaie, as hie eh magh gys En-shemesh, as veih shen lesh Geliloth, ta jeeragh er y raad gys Adummim, as sheese gys clagh-hoit Vohan mac Reuben,

¹⁸ As veih shen rish y lhiattee lesh Arabah my-hwoaie, sheese gys Arabah:

¹⁹ As hie’n chagliagh trooid gys lhiattee Veth-hoglah my-hwoaie: as va kione y chagliagh ec baïe twoaie yn cheayn sailjey, ec kione jiass Yordan: shoh va’n chagliagh jiass.

²⁰ As va Jordan yn cagliagh er y cheu har. Shoh va eiraght cloan Venjamin, cordail rish ny cagleeyn ooilley mygeayrt, rere nyn gynneeyn.

²¹ Nish ard-valjyn tribe cloan Venjamin, cordail rish ny kynneeyn oc, va Jericho, as Beth-hoglah, as coan Keziz,

²² As Beth-arabah, as Zemaraim, as Beth-el,

²³ As Avim, as Parah, as Ophrah,

²⁴ As Chephar-haammonai, as Ophni, as Gaba; daa ard-valley jeig, marish nyn maljyn-beggey:

²⁵ Gibeon, as Ramah, as Beeroth,

²⁶ As Mizpeh, as Chephirah, as Mozah,

²⁷ As Rekem, as Irpeel, as Taralah,

²⁸ As Zelah, as Eleph, as Jebusi, (ta shen Jerusalem,) Gibeath, as Kirjath; kiare ard-valjyn jeig, marish nyn maljyn-beggey. Shoh eiraght cloan Venjamin, cordail rish nyn gynneeyn.