Joshua 15 - Yn Vible Casherick 1775 1819

CAB. XV

¹ Shoh eisht va cronney tribe cloan Yudah lurg ny kynneeyn oc, gys ardjyn Edom; va faasagh Zin my-yiass yn chagliagh sodjey magh lesh y sheear-ass.

² As va’n chagliagh shiar-ass oc veih oirr yn Aarkey Sailjey, veih’n baïe ta lhie lesh y jiass:

³ As hie eh magh my-yiass gys Maaleh-acrabbim, as roie eh er-lhongst gys Zin, as hie eh seose er y cheu jiass gys Kadesh-barnea; goll er y hoshiaght gys Hezron, as seose gys Adar, as ghow eh combaase gys Karkaa:

⁴ Veih shen hie eh lesh Azmon, roshtyn gys awin Egypt; cagleeyn y cheer cheddin va ec yn aarkey. Shoh vees y chagliagh jiass eu.

⁵ As va’n Faarkey Sailjey choud as beeal Yordan yn chagliagh har. As va’n chagliagh twoaie, veih baïe yn aarkey, ec beeal Yordan:

⁶ As va’n chagliagh roie seose gys Beth-hogla, as hie eh veih shen rish cheu-twoaie Beth-arabah; as roie’n chagliagh seose gys clagh-hoit Vohan mac Reuben:

⁷ As hie’n chagliagh seose lesh Debir veih coan Achor, as myr shen my-hwoaie, lesh Gilgal, ta er y raad seose gys Adummim, ta er cheu-jiass yn awin: as hie’n chagliagh lesh ushtaghyn En-shemesh, as ren eh jerrey ec Enrogel:

⁸ As hie’n chagliagh seose rish coan mac Hinnom, gys cheu-jiass y Jebusite; ta shen Jerusalem: as hie eh seose gys mullagh y clieau erskyn coan Hinnom sheear, ta ec kione-twoaie coan ny foawir:

⁹ As va’n chagliagh tayrnit veih mullagh y chronk gys farrane ushtey Nephtoah, as rosh eh gys ard-valjyn cronk Ephron; as va’n chagliagh er ny hayrn gys Baalah, ta Kirjath-jearim:

¹⁰ As hie’n chagliagh mygeayrt veih Baalah lesh y sheear gys cronk Seir, as veih shen derrey slyst cronk Jearim (ta Chesalon) er y twoaie, as hie eh sheese gys Beth-shemesh, as veih shen gys Timnah:

¹¹ As hie’n chagliagh magh my-hwoaie, gys lhiattee Ekron: as va’n chagliagh er ny hayrn gys Shicron, as roie eh jeeragh magh gys cronk Baalah, as hie eh magh gys Jabneel; as va kione sodjey magh y chagliagh ec yn aarkey.

¹² As va’n chagliagh heear gys coast yn aarkey mooar. Shoh ayrn cloan Yudah ooilley mygeayrt, cordail rish nyn gynneeyn.

¹³ As da Caleb mac Jephunneh hug eh ayrn mastey cloan Yudah, cordail rish sarey’n Chiarn da Joshua, eer ard-valley Arba ayr Anak, ta shen Hebron.

¹⁴ As deiyr Caleb veih shen three mec Anak, Sheshai, as Ahiman, as Talmai, cloan Anak.

¹⁵ As hie eh seose veih shen noi cummaltee Debir: as va ennym Debir roish shen Kirjath-sepher.

¹⁶ As dooyrt Caleb, Eshyn hed noi Kirjath-sepher, as goaill eh, dasyn ver-yms Achsah my inneen son ben.

¹⁷ As ren Othniel mac Kenaz, braar Caleb, goaill eh: as hug eh da Achsah e inneen son ben.

¹⁸ As haink eh gy-kione, tra v’eh dy choyrt lesh ee thie, dy ren ee coyrlaghey eh dy hirrey magher er yn ayr eck: as harlheim ee veih e assyl; as dooyrt Caleb ree, Cre ta dty yeearree?

¹⁹ As dreggyr ish, Cur dou dty vannaght; myr t’ou er choyrt dou thalloo chirrym, cur dou myrgeddin thalloo farraneagh. As hug eh jee ny farraneyn heose as heese.

²⁰ Shoh eiraght tribe cloan Yudah rere ny kynneeyn oc.

²¹ As ny baljyn sodjey magh jeh tribe cloan Yudah, my-yiass lesh ardjyn Edom, v’ad Kabzeel, as Eder, as Jagur,

²² As Kinah, as Dimonah, as Adadah,

²³ As Kedesh, as Hazor, as Ithnan.

²⁴ Ziph, as Telem, as Bealoth,

²⁵ As Hazor, Hadattah, as Kerioth, as Hezron, ta shen Hazor,

²⁶ Amam, as Shema, as Moladah,

²⁷ As Hazar-gaddah, as Heshmon, as Beth-palet,

²⁸ As Hazar-shual, as Beer-sheba, as Bizjothjah,

²⁹ Baalah, as Iim, as Azem,

³⁰ As Eltolad, as Chesil, as Hormah,

³¹ As Ziklag, as Madmannah, as Sansannah,

³² As Lebaoth, as Shilhim, as Ain, as Rimmon: ta ooilley ny baljyn-mooarey nuy as feed, marish nyn maljyn-beggey:

³³ As ayns y choan, va Eshtaol, as Zoreah, as Ashnah,

³⁴ As Zanoah, as En-gannim, Tappuah, as Enam,

³⁵ Jarmuth, as Adullam, Socoh, as Azekah,

³⁶ As Sharaim, as Adithaim, as Gederah, as Gederothaim; kiare baljyn jeig mooarey, marish nyn maljyn-beggey:

³⁷ Zenan, as Hadashah, as Migdal-gad,

³⁸ As Dilean, as Mizpeh, as Joktheel,

³⁹ Lachish, as Boscath, as Eglon,

⁴⁰ As Cabbon, as Lahmam, as Kithlish,

⁴¹ As Gederoth, as Beth-dagon, as Naamah, as Makkedah; shey baljyn jeig mooarey, marish nyn maljyn-beggey:

⁴² Libnah, as Ether, as Ashan,

⁴³ As Jiphtah, as Ashnah, as Nezib,

⁴⁴ As Keilah, as Achzib, as Mareshah; nuy baljyn-mooarey, marish nyn maljyn-beggey:

⁴⁵ Ekron marish e baljyn, as e baljyn-beggey:

⁴⁶ Veih Ekron eer gys yn aarkey, ooilley ny va er-gerrey da Ashdod, marish ny baljyn-beggey oc:

⁴⁷ Ashdod lesh e baljyn mooar as beg, Gaza as e baljyn mooar as beg, gys awin Egypt, as y faarkey mooar, as y slyst echey:

⁴⁸ As ayns ny sleityn, Shamir, as Jattir, as Socoh,

⁴⁹ As Dannah, as Kirjath-sannah, ta Debir,

⁵⁰ As Anab, as Eshtemoh, as Anim,

⁵¹ As Goshen, as Holon, as Giloh; un valley jeig, marish nyn maljyn-beggey:

⁵² Arab, as Dumah, as Eshean,

⁵³ As Janum, as Beth-tappuah, as Aphekah.

⁵⁴ As Humtah, as Kirjath-arba, (ta shen Hebron,) as Zior; nuy baljyn-mooarey, marish nyn maljyn-beggey:

⁵⁵ Maon, Carmel, as Ziph, as Juttah,

⁵⁶ As Jezreel, as Jokdeam, as Zanoah,

⁵⁷ Cain, Gibeah, as Timnah; jeih baljyn-mooarey, marish nyn maljyn-beggey:

⁵⁸ Halhul, Beth-zur, as Gedor,

⁵⁹ As Maarath, as Beth-anoth, as Eltekon; shey baljyn-mooarey, marish nyn maljyn-beggey.

⁶⁰ Kirjath-baal, (ta Kirjath-jearim,) as Rabbah; daa ard-valley, marish nyn maljyn-beggey:

⁶¹ Ayns yn aasagh, Beth-arabah, Middin, as Secacah,

⁶² As Nibshan, as yn ard-valley sollanagh, as En-gedi; shey baljyn-mooarey, marish nyn maljyn-beggey.

⁶³ Agh er son ny Jebusiteyn, cummaltee Yerusalem, cha yarg cloan Israel ad y eiyrt magh: agh ta ny Jebusiteyn cummal marish cloan Yudah ec Jerusalem, gys y laa jiu.