Joshua 1 - Yn Vible Casherick 1775 1819

CAB. I

¹ Nish lurg baase Voses sharvaant y Chiarn haink eh gy-kione, dy loayr y Chiarn rish Joshua mac Nun, shirveishagh Voses, gra,

² Ta Moses my harvaant marroo; nish er-y-fa shen trog ort, gow harrish yn awin shoh Jordan, uss, as ooilley yn pobble shoh, gys y cheer ta mee dy choyrt daue, dy jarroo da cloan Israel.

³ Dy chooilley voayl ver shiu boyn nyn goshey er, shen ta mee er choyrt diuish, myr dooyrt mee rish Moses.

⁴ Veih’n aasagh as Lebanon shoh, eer gys yn awin vooar, yn awin Euphrates, ooilley cheer ny Hittiteyn, as gys yn aarkey vooar lesh lhie ny greiney vees cagliagh y cheer eu.

⁵ Cha bee dooinney erbee abyl dy hassoo royd ooilley laghyn dty vea: myr va mee marish Moses, shen myr bee’m mayrt’s: cha jean-ym failleil, ny treigeil oo.

⁶ Bee dunnal as jeh cree mie; son da’n pobble shoh nee oo rheynn son eiraght yn cheer, loo mee da nyn ayraghyn dy choyrt daue.

⁷ Ynrycan bee jeh cree mie as feer dunnal, dy vod oo cur tastey dy yannoo cordail rish ooilley’n leigh hug Moses my harvaant ayns currym dhyt: ny chyndaa veih gys y laue yesh ny gys y laue hoshtal, dy vod oo bishaghey cre-erbee yn raad t’ou goll.

⁸ Bee’n lioar shoh jeh’n leigh dy kinjagh ayns dty veeal; as bee dty smooinaghtyn dowin ayn oie as laa, dy vod oo tastey y ghoaill dy yannoo cordail rish ooilley ny ta scruit ayn: son eisht hig dty chooishyn dy mie lhiat, as bee oo er dty vannaghey.

⁹ Nagh nee mish t’er choyrt sarey dhyt? Bee dunnal as creeoil; ny bee aggle ort, chamoo bee mettey: son ta’n Chiarn dty Yee mayrt cre-erbee yn raad t’ou chyndaa.

¹⁰ Eisht hug Joshua sarey da leeideilee yn pobble, gra,

¹¹ Gow-jee trooid y champ, as cur-jee currym da’n pobble, gra, Fow-jee aarloo dy chooilley nhee ta ymmyrchagh; son cheu-sthie jeh three laa hed shiu harrish yn Jordan shoh, dy gholl stiagh as dy ghoaill diu hene yn cheer, ta’n Chiarn yn Jee eu dy choyrt diu myr eiraght.

¹² As rish ny Reubeniteyn, as rish ny Gaditeyn, as rish lieh-tribe Vanasseh, loayr Joshua, gra,

¹³ Cooinee-jee er ny goan ren Moses sharvaant y Chiarn coyrt ayns currym diu, gra, Ta’n Chiarn y Jee eu er choyrt diuish fea, as er choyrt diu yn thalloo shoh.

¹⁴ Nee ny mraane, yn chloan, as y maase eu, tannaghtyn ayns y cheer hug Moses diu cheu shoh dy Yordan; agh hed shiu hene roish nyn mraaraghyn armit, ooilley ny deiney caggee niartal, as coon-jee lhieu,

¹⁵ Derrey vees y Chiarn er choyrt fea da nyn mraaraghyn, myr t’eh er choyrt diuish, as derrey t’adsyn myrgeddin er ghoaill possession jeh’n cheer ta’n Chiarn yn Jee eu dy choyrt daue: eisht nee shiuish chyndaa gys cheer yn eiraght eu hene, as soylley ’ghoaill jeh, ren Moses, sharvaant y Chiarn, coyrt diu er y cheu shoh dy Yordan, lesh irree ny greïney.

¹⁶ As dreggyr ad Joshua, gra, Ooilley ny t’ou dy harey dooin nee mayd jannoo, as raad erbee ver oo shin nee mayd goll.

¹⁷ Myr hug shin biallys da Moses ayns dy chooilley nhee, myr shen nee mayd geaishtagh rhyt’s: as dy row yn Chiarn dty Yee mayrt, myr v’eh marish Moses.

¹⁸ Quoi-erbee nee girree magh noi dty harey, as nagh der geill da dty ghoan ayns ooilley ny t’ou dy oardagh, bee eh er ny choyrt gy-baase: agh bee uss dunnal as jeh cree mie.