Jonah 3 - Yn Vible Casherick 1775 1819

CAB. III

¹ As haink goo yn Chiarn gys Jonah yn nah cheayrt, gra,

² Trog ort, immee gys Nineveh yn ard-valley mooar shen, as jean preacheil ayn ny goan ver-ym royd.

³ Myr shen dirree Jonah, as hie eh gys Nineveh cordail rish goo yn Chiarn: (nish va Nineveh ard-valley feer vooar jeh jurnah three laa.)

⁴ As ghow Jonah toshiaght dy gholl stiagh ’syn ard-valley lesh jurnah laa, as dockle eh magh e choraa, as dooyrt eh, Foast ec kione da-eed laa, as bee Nineveh er ny stroie.

⁵ Myr shen ren sleih Nineveh credjal ayns Jee, as doardee ad laa troshtee, as hug ad orroo aanrit-sack veih’n vooinjer b’yrjey jeu, dy jarroo gys yn vooinjer b’inshley jeu.

⁶ Son haink y goo gys ree Nineveh, as dirree eh veih e stoyl-reeoil, as hug eh jeh e choamrey reeoil, as choodee eh eh-hene lesh aanrit-sack, as lhie eh ’sy leoie.

⁷ As doardee eh eam dy v’er ny ockley magh, as er ny hoilshaghey trooid Nineveh (liorish sarey yn ree as e gheiney ooasle) gra, Ny lhig da dooinney ny baagh, shelloo ny shioltane blaystyn nhee erbee; ny lhig daue goaill beaghey, ny giu ushtey.

⁸ Agh lhig da dooinney as baagh ve er ny choodaghey lesh aanrit-sack, as geamagh dy jeean gys Jee: dy jarroo lhig daue chyndaa dy chooilley unnane veih e ghrogh raad, as veih’n tranlaase t’ayns nyn laueyn.

⁹ Quoi ec ta fys my nee Jee chyndaa as meiyghey, as e yymmoose hrome y lhiettal, nagh jean mayd cherraghtyn?

¹⁰ As honnick Jee nyn obbraghyn, dy hyndaa ad veih nyn ghrogh raad, as ren Jee meiyghey mychione yn olk, v’eh er chiarail dy choyrt orroo, as cha dug eh orroo eh.