Joel 1 - Yn Vible Casherick 1775 1819

CAB. I

¹ Goo yn Chiarn haink gys Joel mac Phethuel.

² Clasht-jee rish shoh, shiuish shenn gheiney, as eaisht-jee, ooilley shiuish chummaltee ny cheerey: vel shoh er ny ve ayns ny laghyn euish, ny dy jarroo ayns laghyn nyn shenn-ayryn?

³ Insh-jee shoh da nyn gloan, as lhig da yn chloan euish shen y insh da’n chloan ocsyn, as yn chloan ocsyn da yn nah heeloghe.

⁴ Shen ny ta’n veishteig-loauee er n’aagail, ta’n locust er n’ee; as shen ny ta’n locust er n’aagail, ta’n veishteig-vergagh er n’ee; as shen ny ta’n veishteig-vergagh er n’aagail, ta’n vraddag er n’ee.

⁵ Dooisht-jee, shiuish veshtallee, as keayn-jee: as gull-jee, ooilley shiuish iuderyn-feeyney, son y feeyn noa, er-yn-oyr dy vel eh giarit jeh veih nyn meeal.

⁶ Son ta ashoon er jeet seose er my heer, niartal, as gyn earroo, ta ny feeacklyn oc myr feeacklyn lion: as ta oc feeacklyn-keeilley lion mooar.

⁷ T’eh er choyrt mow my villey-feeyney, as er roostey my villey-figgagh: t’eh er n’yannoo eh glen-lhome, as er yiarey sheese eh, ta ny banglaneyn echey bane-fiojit.

⁸ Keayn-jee myr ben-aeg ayns aanrit-sack, son sheshey yn aegid eck.

⁹ Ta’n oural-arran, as yn oural-jough giarit jeh veih thie yn Chiarn, ta ny saggyrtyn, shirveishee yn Chiarn, dobberan.

¹⁰ Ta’n magher ny hraartys, ta’n thalloo dobberan, son ta’n arroo mow: ta’n feeyn noa chyrmit seose, ta’n ooil cherraghtyn.

¹¹ Bee-jee seaghnit, O shiuish eirinnee: yllee-jee, O shiuish ghareyderyn-feeyney, son y churnaght, as son yn oarn, son ta troar y vagheragh er n’gholl naardey.

¹² Ta’n billey-feeyney fiojit, as ta’n billey-figgagh creenagh, yn billey-pomegranate, yn billey-palm myrgeddin, as yn billey-ooyl, eer ooilley biljyn y vagheragh t’ad fiojit: as ta’n boggey fioghey ersooyl veih mec deiney.

¹³ Trog-jee erriu, as keayn-jee, shiuish haggyrtyn: yllee-jee shiuish shirveishee yn altar: tar-jee, lhie-jee fud-ny-hoie ayns aanrit-sack, shiuish shirveishee yn Jee aym’s: son ta’n oural-arran, as yn oural-jough er ny lhiettal voish thie yn Jee eu.

¹⁴ Jean-jee laa troshtee y chasherickey: cur-jee eam son feailley casherick dy ve er ny reayll: chaggle-jee yn chenndeeaght, as ooilley cummaltee ny cheerey, gys thie yn Chiarn y Jee eu, as eïe-jee gys y Chiarn,

¹⁵ Ah treih son y laa! son ta laa yn Chiarn er-gerrey, as goll-rish toyrt-mow veih yn Ooilley-niartal hig eh.

¹⁶ Nagh vel yn beaghey giarit jeh roish nyn sooillyn, eer boggey as gennallys veih thie yn Jee ain?

¹⁷ Ta’n sheel loau fo ny creaghyn, ta ny thieyn-arroo follym-faase, ta ny soaltyn nyn dholtanyn; son ta’n arroo fowanit.

¹⁸ Kys ta ny beïyn garveigagh! ta ny shellooyn ollagh seaghnit, son nagh vel aber oc: dy jarroo ta ny shioltaneyn keyrragh shymley ersooyl.

¹⁹ O Hiarn, hood’s nee’m geamagh: son ta’n aile er stroie aberyn yn aasagh, as ta’n aile er lostey ooilley biljyn y vagher.

²⁰ Ta beïyn y vagher geamagh myrgeddin hood’s: son ta ny hawinyn ushtey chyrmit seose, as ta’n aile er stroie aberyn yn aasagh.