Jeremiah 8 - Yn Vible Casherick 1775 1819

CAB. VIII

¹ Ec y traa shen, ta’n Chiarn dy ghra, ver ad lhieu magh ass ny oaiaghyn craueyn reeaghyn Yudah, as craueyn e phrinceyn, as craueyn ny saggyrtyn, as craueyn ny phadeyryn, as craueyn cummaltee Yerusalem:

² As nee ad skeayley ad roish y ghrian, as yn eayst, as slane armee rollageagh yn aer, orroosyn va nyn ghraih soit, as adsyn t’ad er hirveish, as nyn lurg t’ad er n’immeeaght, as hucsyn ren ad shirrey, as daue hug ad ooashley: cha bee ad er nyn jaglym, ny er nyn oanluckey; bee ad son eoylley er eaghtyr y thallooin.

³ As bee’n baase, as cha nee bioys, er ny ghoaill myr reih liorish ooilley yn jeelym jeusyn vees er-mayrn jeh’n cheeloghe vee-chrauee shoh, vees faagit bio ayns dy chooilley voayl raad ta mee er n’eiyrt ad, ta Chiarn ny pooaraghyn flaunyssagh dy ghra.

⁴ Ny-sodjey, jir uss roo, Myr shoh ta’n Chiarn dy ghra; Jean ad tuittym, as nagh n’irree ad reesht? jean eh chyndaa ersooyl, as nagh jig eh reesht?

⁵ Cre’n-fa eisht ta pobble Yerusalem er chooyl-skyrraghtyn voym’s foddey as kinjagh? t’ad greimmey chion er molteyrys, t’ad gobbal dy hyndaa.

⁶ Deaisht mee as chlin mee, agh va ny goan oc foalsey; cha ghow dooinney jeu arrys son e vee-chraueeaght, gra, Cre shoh ta mee er n’yannoo? dagh fer chyndaa gys e henn chliaghtey, myr ta’n cabbyl chionney stiagh gys y chaggey.

⁷ S’feer eh, dy vel y stork ’syn aer goaill baght jeh ny imbaghyn dooghyssagh; as ta’n turtle, as y choar, as gollan-geayee, freayll gys y traa t’ad ry-hoi cheet; agh cha vel my phobble’s cur veg y gheill da briwnys y Chiarn.

⁸ Kys oddys shiu gra, Ta shinyn creeney, as mârin ta leigh’n Chiarn? Cur-my-ner, son shickyrys ta pen ny scrudeyryn dellal ayns molteyrys.

⁹ Ta ny deiney creeney oc fo nearey, t’ad er choayl nyn dappey as goit ayns ribbey: cur-my-ner, t’ad er hoiaghey beg jeh goo yn Chiarn, as cre’n chreenaght t’ayndoo?

¹⁰ Shen-y-fa ver-yms ny mraane oc da feallagh elley, as ny magheryn oc da eiraghyn joarree: son ta dy chooilley unnane, veih’n er sloo gys yn er smoo, sondagh er cosney; veih’n phadeyr eer gys y taggyrt, ta dy chooilley unnane dellal dy foalsey.

¹¹ Son s’coan t’ad er scryssey harrish lhott inneen my phobble, gra, Shee, shee; tra nagh vel shee nyn gour.

¹² Row nearey orroo tra v’ad er n’yannoo yn peccah dwoaiagh? beggan, cha ghow ad veg y nearey, chamoo ren ad jiargaghey: shen-y-fa nee ad tuittym ny mast’ oc shen huittys; tra hig-yms orroo ayns kerraghey, bee ad lhieggit gys yn ooir, ta’n Chiarn dy ghra.

¹³ Ver-yms mow ad son shickyrys, ta’n Chiarn dy ghra: cha bee veg y vess er y villey-feeyney, ny figgyn er y villey-figgagh, as nee’n duillag fioghey; as nee’n chooid hug mee daue shymley ersooyl voue.

¹⁴ Kys dy vel shin soie myr shoh? chaggle-jee shiu hene, as lhig dooin cosney stiagh gys ny ard-valjyn voallit, as lhig dooin ve nyn dhost ayns shen; son ta’n Chiarn nyn Yee er choyrt shin nyn dhost, as er chur dooin ushtey galley dy iu, er-yn-oyr dy vel shin er n’yannoo peccah noi’n Chiarn.

¹⁵ Va shin jeeaghyn son shee, agh cha daink mie erbee orrin; as son earish dy hauchys, as cur-my-ner seaghyn!

¹⁶ Va stronneraght e chabbil er ny chlashtyn veih Dan; va’n slane cheer er-creau ec sheean shutternee e chabbil caggee; son t’ad er roshtyn, as er chur naardey yn cheer, as ooilley ny t’ayn: yn ard-valley as e cummaltee.

¹⁷ Son cur-my-ner, ver-yms magh ard-nieughyn, cockatriceyn, nyn mastey, nagh bee cleaynit lesh pishagyn, as nee ad shiu y lhottey, ta’n Chiarn dy ghra.

¹⁸ Tra ta mee son gerjagh y gheddyn noi trimshey, ta my chree traashtit cheu-sthie jee’m.

¹⁹ Cur-my-ner, coraa accan inneen my phobble, kyndagh roosyn ta cummal ayns cheer foddey. Nagh vel y Chiarn ayns Zion? nagh vel y ree ecksh aynjee? cre’n-fa eisht t’ad er my vrasnaghey gys corree lesh nyn yallooyn grainnit, as lesh fardalyssyn joarree?

²⁰ Ta’n fouyr harrish, ta’n sourey ec kione, as foast cha vel feaysley ain.

²¹ Son doghan inneen my phobble ta mee doghanit; ta mee ’sy dorraghys doo; ta atchim er my ghreimmey.

²² Vel veg y valm ayns Gilead? vel fer-lhee erbee ayns shen? Cre’n-fa eisht nagh vel aslaynt inneen my phobble er ny choural?