Jeremiah 6 - Yn Vible Casherick 1775 1819

CAB. VI

¹ O shiuish chloan Venjamin, chaggle-jee shiu hene cooidjagh dy chosney ersooyl ass mean Yerusalem, as jean-jee yn trumpet y heidey ayns Tekoa, as soie-jee seose aile cronnal ayns Beth-haccerem: son ta olk troggal ass y twoaie, as lhome-hraartys.

² Ta mee er hoylaghey inneen Zion gys aber aalin as menoyr.

³ Hig ny bochillyn lesh nyn shioltaneyn stiagh ayn; nee ad nyn mwaagyn y hoiaghey seose ayn cruin mygeayrt; nee ad gyndyr dy chooilley hioltane ayns e oayll hene.

⁴ Fow-jee aarloo dy chaggey n’oï; trog-jee, as lhig dooin goll seose ec y vun-laa. Smerg dooinyn! son ta’n laa goll shaghey, son ta scadooyn yn astyr er ny heeyney magh.

⁵ Trog-jee, as lhig dooin goll ’syn oie, as lhig dooin ny plaaseyn eck y stroie.

⁶ Son shoh myr ta Chiarn ny sheshaghtyn flaunyssagh er ghra, Giare-jee sheese biljyn, as trog-jee cronk-caggee noi Jerusalem: shoh’n ard-valley ta ry-hoi kerraghey; cha vel monney agh tranlaase cheu-sthie j’ee.

⁷ Myr ta farrane cur magh ny ushtaghyn eck, myr shen t’eeish cur magh e mee-chraueeaght: ta eam dy hranlaase as spooilley er ny chlashtyn aynjee; ayns my hilley’s dy kinjagh ta trimshey as lhottyn.

⁸ Gow-jee ynsaghey, O Yerusalem, er-aggle dy der m’annym cooyl rhyt; nagh jean-ym oo ny hraartys, cheer gyn cummaltee.

⁹ Myr shoh ta Chiarn ny sheshaghtyn flaunyssagh dy ghra, Nee ad fooilliagh Israel y heiy dy bollagh myr billey-feeyney: chyndaa dty laue myr teiyder ny berrishyn-feeyney ayns ny baskadyn.

¹⁰ Quoi rish loayr-ym as ver-ym raaue, dy vod ad clashtyn? Cur-my-ner, ta’n chleaysh oc chymmyltagh, as cha vod ad clashtyn: cur-my-ner, cha vel goo yn Chiarn agh craid dauesyn; cha vel veg y taitnys oc ayn.

¹¹ Shen-y-fa ta mee lane jeh eulys y Chiarn; te pian dou dy lhiettal eh: deayrt-ym magh eh er y chloan dy lhean, as er co-chruinnaght ny deiney aegey; son bee eer y dooinney marish e ven goit ersooyl, eshyn t’ayns slane eash mârishyn ta lane dy laghyn.

¹² As bee ny thieyn oc er ny hyndaa harrish da feallagh elley, marish nyn magheryn as nyn mraane dy cheilley: son sheeyn-yms magh my laue er cummaltee’n cheer, ta’n Chiarn dy ghra.

¹³ Son veih’n fer sloo eer gys y fer smoo jeu, ta dy chooilley unnane sondagh er cosney; as veih’n phadeyr eer gys y taggyrt, ta dy chooilley er dellal dy molteyragh.

¹⁴ As s’coan t’ad er lheihys lhott inneen my phobble, gra, Shee, shee; tra nagh vel shee nyn gour.

¹⁵ Row nearey orroo tra v’ad er n’yannoo yn peccah dwoaiagh? beggan, cha row veg y nearey orroo, chamoo ren ad jiargaghey; shen-y-fa nee ad tuittym mastey ad shen huittys: tra hig-yms orroo ayns kerraghey bee ad lhieggit gys yn ooir, ta’n Chiarn dy ghra.

¹⁶ Myr shoh ta’n Chiarn dy ghra, shass-jee ayns ny raaidyn as shir-jee, as brie-jee son ny shenn cassanyn, eer yn raad mie shen, as eiyr-jee er, as yiow shiu fea gys nyn anmeenyn. Agh dooyrt ad, Cha jean mayd gimmeeaght ayndoo.

¹⁷ Myrgeddin hoie mee arreyderyn erriu, gra, Eaisht-jee rish feiyr y trumpet. Agh dooyrt ad, Cha jean mayd geaishtagh.

¹⁸ Shen-y-fa clasht-jee, O ashoonee, as toig-jee, O cho-chruinnaght, cre ta ny mast’ oc.

¹⁹ Lhig da’n seihll clashtyn; cur-my-ner, ver-yms lhiam olk er y pobble shoh, eer mess ny smooinaghtyn oc hene, er-yn-oyr nagh vel ad er n’eaishtagh rish my ghoan’s, ny rish my leigh’s, agh er hoiaghey beg jeh.

²⁰ Gys cre’n ymmyd ta incense cheet hym’s veih Sheba, as y cane millish veih cheer foddey jeh? cha vel taitnys aym ayns nyn jebballyn-losht, chamoo ta nyn ourallyn gys my aigney,

²¹ Shen-y-fa myr shoh ta’n Chiarn dy ghra, Cur-my-ner, neem’s kiapyn snapperal y hoiaghey ayns raad y phobble shoh, as nee ny ayraghyn as ny mec dy cheilley tuittym lioroo; nee’n naboo as e charrey cherraghtyn.

²² Shoh myr ta’n Chiarn dy ghra, Cur-my-ner, ta pobble cheet veih’n cheer twoaie, as nee ashoon mooar troggal veih slystyn y theihll.

²³ Nee ad yn vhow as yn shleiy y loaghtey; t’ad dewil, as gyn myghin: ta’n sheean oc freaney myr yn aarkey; as t’ad markiagh er cabbil, myr deiney soit ayns order-caggee dt’oï, O inneen Zion.

²⁴ Ta shin er chlashtyn skeeal jeu; ta ny laueyn ain gaase moal: ta angaish er ghoaill greme orrin, as pian myr ben er-troailt.

²⁵ Ny gow-jee magh gys y vagher, chamoo shooyl-jee er y raad; son ta cliwe y noid as aggle er dy chooilley heu.

²⁶ O inneen my phobble, jean aanrit-sack y chryssey mood, as seiy oo hene ’sy leoie; jean farrarey trimshagh myr son ynrycan mac, yn dobberan s’doogh: son hig y roosteyr doaltattym orrin.

²⁷ Ta mee er dty hoiaghey son toor as carrick mastey my phobble, dy vod oo toiggal as prowal nyn raaidyn.

²⁸ T’ad ooilley nyn ard-vee-viallee, gimmeeaght lesh scammyltyn: t’ad prash as yiarn; t’ad ooilley-cooidjagh shleeuit er olk.

²⁹ Ta ny builg-sheidee losht, ta’n leoie er n’gholl naardey ’syn aile; ta’n lheieder lheïe ayns fardail; son cha vel ny mee-chrauee er ny ghaartlian ass.

³⁰ Trustyr dy argid nee sleih ad y enmys, son dy vel y Chiarn er hilgey jeh ad.